Read Diospa Simin Qelqa ISAÍAS 64 Bible Online

ISAÍAS 64 - Diospa Simin Qelqa bible

ISAÍAS 64

¹¡Hanaq pachata kicharillawaqña, hinaspa uraykamullawaqña! Chaymi orqokunaqa qanta rikuspa khatatatanman

²rawrashaq nina patapi t'impushaq unu hina. Uraykamullawaqña awqaykikunaman qan kikiykita reqsichikunaykipaq, hinan hatun suyukunapas qayllaykipi khatatatanqaku.

³Qanqa uraykamuspa mana hayk'aq suyasqayku musphanakunata ruwaqtiykin, orqokuna qayllaykipi khatatatarqan.

⁴Ñawpamantapachan mana pipas uyarirqanchu, repararqanchu, rikurqanchu wak diostaqa, aswanpas qanllatan. Qanllan suyakuqniykikunapaqqa chaykunata ruwapunki.

⁵Qanmi kusisqa chanin ruwaqta chaskinki, munayniykiman hina kawsay munaqta chaskinki, chaypas ñoqaykuqa huchallikurqaykun, qantaqmi phiñakurqanki, chay hinaqa, ¿imaynatan qespichisqa kaykuman?

⁶Llapallaykun qhelli runa hina kayku, tukuy chanin kaqkuna ruwasqaykupas millay qhelli thanta hinan, llapallaykun raphi hina naq'eykapuyku, huchallikusqaykupas wayra hinan apawanku.

⁷Manan pipas qanmanta mañakamunchu, manan pipas qanman hap'ipakamunchu, chaymi mana qhawarimuwankikuchu, millay ruwasqaykupi naq'enaykupaqmi saqerpariwarqankiku.

⁸Chaypas, Señor Diosnillayku, qanmi taytaykuqa kanki. Ñoqaykuqa t'urullan kayku, qantaq llut'aqniyku kanki, llapallaykutan ruwawarqankiku.

⁹Señor Diosnillayku, ama sinchita phiñakuychu, amallataq mana chanin ruwasqaykutapas yuyarishallaychu. ¡Llapallaykun llaqtayki kayku, chayrayku qhawarimuwayku!

¹⁰Ch'uya llaqtaykikunan purun kapushan, Sión llaqtan raqay-raqay kapushan, Jerusalenmi thunisqa kapushan.

¹¹Tayta-mamaykuq qanta yupaychamunanku ancha sumaq ch'uya wasiykun ninaq ruphasqan kapushan, tukuy aswan munasqayku cheqaskunan thunisqa kapushan.

¹²Chay hina kashaqtinqa, Señor Diosnillayku, ¿manachu imanankipas? ¿Upallakunkichu? ¿Sinchitapunichu llakichiwankiku? nispa.