Read Diospa Simin Qelqa ISAÍAS 65 Bible Online

ISAÍAS 65 - Diospa Simin Qelqa bible

ISAÍAS 65

¹Señor Diosmi nin: Ñoqaqa chaypin maskhawanankupaq kasharqani, ichaqa manan ñoqamanta tapukurqankuchu, chaypin tariwanankupaq kasharqani, ichaqa manan maskhawarqankuchu, ñoqamanta mana mañakuq suyutan nirqani: Kaypin kashani, yanapaykusqaykin, nispa.

²P'unchay-ch'isiyaqmi makiyta haywarayarqani k'ulluchakuq runakunata asuykachikunaypaq, kay llaqtan waqllisqa ñanninta purin, yuyaykusqankuman hinan kawsanku.

³Paykunaqa sut'itan phiñachishallawankupuni huertakunapi dioskunaman sacrificiota haywaspa, ladrillo altarkunapi inciensota q'apachispa.

⁴Wañusqakunata tapunankupaqmi aya p'ampanakunapi tiyanku, paka cheqaskunapin tutantin qhawapakuspa rikch'anku. Khuchi aychatan mikhunku, qhelli animalkunaq aychantan t'impuchinku.

⁵Runakunatan ninku: Chayllapi kaychis, ama asuykamuwaykuchu, sinchi ch'uyan kashayku, ama llamiykuwaykuchu, nispa. Paykunaqa q'osñishaq nina hinan, p'unchay-ch'isiyaqmi umayta nanachishawanku.

⁶Chay ruwasqakunaqa llapallanmi ñawpaqeypi qelqasqa kashan, manan upallakusaqchu, aswanpas paykuna kikinkutan muchuchisaq.

⁷Paykunataqa muchuchisaqpunin mana chaninkuna ruwasqankumanta, tayta-mamankuq mana chaninkuna ruwasqankumantapas. Paykunan orqo patakunapi inciensota q'apachirqanku, moqo patakunapipas k'amiwarqanku, chaymi ñoqaqa ruwasqankutaraq tupusaq, hinaspan chayman hina paykunata muchuchisaq, nispa.

⁸Señor Diosmi nin: Imaynan unuyoqraq uvasta tarispa ninku: Ama usuchiychu, chaypiqa kashanraqmi vino, nispa. Chay hinatan ñoqapas llaqtaytaqa mana llapantachu wañuchisaq, aswanpas kamachiykunataqa qespichisaqmi.

⁹Jacobmantan runa mirayta paqarichisaq, Judamantataq runakunata sayarichisaq, paykunan suyuy orqo-orqopi tiyanqaku, akllakusqaykunaqa suyuytan chaskinqaku, chaypin kamachiykunaqa tiyanqaku.

¹⁰Yupaychawaqniy llaqtaqa Sharón nisqa pampapin uywakunata michinqa, Acor wayq'opipas wakatan michinqa.

¹¹Yaw, saqepuwaqniykuna, qankunapaqqa manan chay hinachu kanqa, qankunaqa ch'uya orqoytan saqepunkichis, qankunaqa Gad diospaqmi mikhunata mast'ankichis allin suertepaq, qankunaqa Mení diosmanmi tupachisqa ukyanata haywankichis qhepaman ama ima mana allinpipas kanaykichispaq.

¹²Chaymi qankunaqa qhepaman espadawan wañuchisqa kankichis, llapallaykichismi qhorusqa kankichis. Waqyarqaykichismi manataq kutichimuwarqankichischu, rimaqtiypas manataq uyarimuwarqankichischu, aswanpas mana allinkaqtan ñawpaqeypi ruwarqankichis, millakusqaytan akllakurqankichispas.

¹³Chayraykun ñoqa Apu Señor Diosqa niykichis: Kamachiykunan mikhunqa, qankunataq yarqachikunkichis. Kamachiykunan ukyanqa, qankunataq ch'akichikunkichis. Kamachiykunan kusikunqa, qankunataq p'enqachisqa kankichis.

¹⁴Kamachiykunan kusisqa sonqontin takinqa, qankunataq llakisqa sonqontin waqankichis, llakiq ñit'isqan sonqontin qaparinkichis.

¹⁵Sutiykichiswanmi akllakusqay runakunaqa huk runakunata ñakanqaku, ñoqa Apu Señor Diosmi wañuchisqaykichis, kamachiykunatataq ichaqa mosoq sutiwan sutichasaq.

¹⁶Pipas kay suyupi saminchasqa kayta munaqqa ninqan: Hunt'aq Diosnilláy, saminchaykuway, nispa. Pipas kay suyupi juraqqa ninqan: Hunt'aq Diospa sutinpin jurani, nispa. Ñawpaqkaq llaki-phutiykunaqa qonqasqañan kapunqa, manañan chaykunata yuyarisaqchu, nispa.

¹⁷Señor Diosmi nin: Ñoqaqa mosoq hanaq pachatan mosoq hallp'a pachatawanmi kamasaq, ñawpaq sucedesqankunaqa qonqasqan kapunqa, manañan yuyarisqapasñachu kanqa.

¹⁸Ñoqan Jerusalenta chaypi tiyaq runakunatapas kamasaq, chaypin kusikunqakupas kusichinqakupas, chaykunatan kamasaq, chayrayku, wiñaypaq kusikuychispas q'ochukuychispas.

¹⁹Jerusalén hawan kusikusaq, llaqtay hawan q'ochukusaq. Manañan hayk'aqpas chaypiqa waqaypas llakipakuypas uyarikunqachu.

²⁰Manañan chaypiqa pisi p'unchaykunallamantachu wawaqa wañunqa, runaqa llapallanmi thultu yuyaq kanankama kawsanqa, pachak watayoq wañuqqa “waynallaraq wañuq”, nisqan kanqa, pachak wataman mana chayaspa wañuqqa “ñakasqa runa”, nisqan kanqa.

²¹Wasitan wasichanqaku, hinaspan chaykunapi tiyanqaku, uvastan plantanqaku, chaypa rurusqantan mikhunqaku.

²²Manan wakpa tiyananpaqchu wasichanqaku, manan wakpa mikhunanpaqchu mallkinqaku. Mallkiq kawsasqanta hinan llaqtayqa unayta kawsanqa, akllakusqaykunaqa llank'asqankuq rurusqantan kusisqa mikhunqaku.

²³Manan yanqachu llank'anqaku, manan wawankuqa mana wañunanpipaschu wañunqa, ñoqa Señor Diosmi paykunatapas mirayninkutapas saminchashallasaqpuni.

²⁴Manaraq waqyakamushaqtinkun ñoqaqa kutichimusaq, rimashallaqtinkuraqmi ñoqaqa uyarisaq.

²⁵Lobopas borregopas kuskan mikhunqaku, leonpas toro hinan q'achuta mikhunqa, mach'aqwaytaq ñut'u hallp'ata mikhunqa. Manan pipas ch'uya orqoypa may cheqasllanpipas ima mana allintapas ruwanqachu, nispa.