Read Diospa Simin Qelqa ISAÍAS 7 Bible Online

ISAÍAS 7 - Diospa Simin Qelqa bible

ISAÍAS 7

¹Uziaspa churin Jotampa churin Ahaz Judá suyupi rey kashaqtinmi, Siria suyu rey Rezimpiwan Israel suyu rey Remaliaspa churin Pecapiwan Jerusalenta wicharqanku munaychakunankupaq, ichaqa manan atiparqanchu.

²Chaypachan rey Ahazman Judá runakunamanwan willarqanku: Siria suyu runakunan Israel suyu runakunawan huñuykunakun, nispanku. Hinan reypas llaqta runakunapas mancharisqa khatatatarqanku, imaynan sach'akunapas wayra-wayramuqtin chhaphchikun hinata.

³Chaymi Señor Diosqa Isaiasta nirqan: Qanpiwan churiyki Sear-jasubpiwan[1] rey Ahazman riychis, “Hanaq p'uytu” nisqamanta lloqsiq yarqha qayllapi T'aqsaqkunaq hallp'an nisqaman rishaq ñanpin tupankichis.

⁴Hinaspa niy: Makilla qhawakuy, ama khatatataychu, ama manchapakuypaschu. Amataq pisi kallpayaypaschu Siria rey Rezín hawa Israel rey Peca hawa, hinaña sinchi phiñasqa kashanku chaypas, paykunaqa q'osñirishaq k'aspikuna hinallan kanku.

⁵Siria runakunan Israel runakunapiwan rey Pecapiwan mana allin ruwayta yuyaykusunkiku, paykunan ninku:

⁶Haku Judá suyuman phawaykusun, ñut'uta ruwaspataq chay llaqtata phasminakusun, hinaspa Tabeelpa churinta reyta churamusunchis, nispanku, nispa.

⁷Ichaqa Apu Señor Diosmi nin: Chay yuyaykusqankuqa manan hayk'aqpas hunt'akunqachu.

⁸Siria suyuq hatun llaqtanqa Damascon, Damasco llaqtaqa Rezinpin hap'ipakun. Efraín suyuqa soqta chunka phisqayoq wata ukhupin manaña suyuchu kapunqa.

⁹Israel suyuq hatun llaqtanqa Samarian, Samaria llaqtaqa Pecapin hap'ipakun. Qankunapas iñiyniykichispi manachus qaqa sayankichis chayqa, manan unaytachu qhepankichis, nispa.

¹⁰Señor Diosqa Ahaztan Isaiaswan wakmanta rimaykuchirqan:

¹¹Diosniyki Señor Diosmanta mañakuy huk milagrota ruwananpaq Wañuy-pachapipas hanaq pachapipas, chaymi huk señal qanpaq kanqa, nispa.

¹²Ahaztaq kutichirqan: — Manan. Manapunin ñoqaqa huk señalta mañakuspayqa Señor Diosta wateqaymanchu, nispa.

¹³Chaymi Isaiasqa nirqan: — Davidpa mirayninkuna, uyariwaychis. Runakunatan phiñachinkichis, ¿chay hinallatataqchu Diostapas phiñachiyta munankichis?

¹⁴Chay hinaqa, kikin Señor Diosmi huk señalta rikuchisunkichis: Huk sipasmi onqoq kashan, paymi qhari wawata wachakunqa, Emanueltataq[2] sutichanqa.

¹⁵Chay wawaqa allinkaqta mana allinkaqta reparasqan tiempopin queso lluklluta miel misk'itawan mikhunqa.

¹⁶Manaraq chay tiempoman chayashaqtinmi chay manchachiqniykichis iskaynin reykunaq suyunkunaqa purunyachisqa kapunqa.

¹⁷Señor Diosmi hatun llakita chayachimunqa qanmanpas, llaqtaykimanpas, aylluykimanpas, Judá suyuwan Israel suyuwan t'aqanakusqanku llakita hina. Señor Diosqa Asiria reytan muchuchinasuykichispaq apamunqa.

¹⁸Chay tiempopin Señor Diosqa Egipto mayukunapi tiyaqkunata silbarispa ch'uspita hinaraq hamuchinqa, Asiriapi tiyaqkunatapas wanqoyruta hinaraq hamuchinqa.

¹⁹Chaykunan hamuspa tiyanqaku wayq'o ukhukunapi, qaqa k'aktukunapi, llapan unu p'uytu patakunapi, llapan khiska-khiska ch'aphrakunapi ima.

²⁰Señor Diosqa Asiria reytan hap'inqa Eufrates mayuq karu chimpanmanta fletasqa navajata hina, chaywanmi k'isunqa Judá runakunaq umanta, sunkhanta, tukuy cuerponpa suphunkunatawan.

²¹Chay tiempopin huk wakata iskay ovejatawan kawsachiq runaqa,

²²askha lecheta ch'awanqa, chaymi queso lluklluta mikhunqa. Hinallataq kay suyu muchuchiymanta qespikuqkunapas mikhunqaku queso lluklluta miel misk'itawan.

²³Waranqa yurayoq kaq waranqa qolqe valeq uvas chakrakunapas ch'aphra-ch'aphramanmi khiska-khiskamanmi tukuchisqa kanqa.

²⁴Llapa suyuntinmi khiska-khiska ch'aphra-ch'aphra kapunqa, chayrayku p'eqtayoq wach'inayoq haykunqaku salqa animalkunata hap'inankupaq.

²⁵Ch'ira lampawan ñawpa llank'asqa orqokunaqa sinchi askha khiskakunawan ch'aphrakunawanmi hunt'a kanqa, chaymi mana pipas chaykunaman wichanqachu, aswanpas ovejakunallan torokunallan mikhuq rinqaku, nispa.