Read Diospa Simin Qelqa LEVÍTICO 1 Bible Online

LEVÍTICO 1 - Diospa Simin Qelqa bible

LEVÍTICO 1

¹Señor Diosmi Moisesta waqyaspa Dioswan Tupana Karpamantapacha payta rimapayarqan:

²— Israel runakunata nimuy: Pipas qankuna ukhumanta Señor Diosman ofrendata haywanqa chayqa, qonqan wakatapas ovejatapas.

³Ofrendachus ruphachinapaq waka kanqa chayqa, mana imanasqa orqon kanqa. Dioswan Tupana Karpaman haykunapin haywanqa Señor Dios payta chaskinanpaq.

⁴Ruphachinapaq sacrificioq patanmanmi makinta churaykunqa, hinan paypaq chaskisqa kanqa huchankunata pampachananpaq.

⁵Chaypin torillotaqa nak'anqa, Aaronpa churin sacerdotekunataq yawarta haywanqaku, hinaspan Dioswan Tupana Karpaman haykunapi kashan chay altar muyuriq qhataman yawarta hich'aykunqaku.

⁶Chaymantataq ruphachinapaq nak'asqata ch'utinqa, hinaspan chayta moqonarqarinqa.

⁷Aaronpa churin sacerdotekunataq altar patapi ninata hap'ichinqaku, hinaspan nina pataman llant'ata churaykunqaku.

⁸Hinamantataq paykunaqa moqonasqa aychakunata, umanta, ch'unchul wiranta, altarpi nina pataman wachuchaykunqaku.

⁹Ch'unchulkunatapas chakan aychakunatapas haywaqmi mayllinqa, hinan sacerdoteqa altar patapi llapallanta ruphachinqa. Chayqa mikhuna ofrendan, sumaq q'apayninqa Señor Diospa sonqonmanmi chayan.

¹⁰Ofrendachus ruphachinapaq ovejapas cabrapas kanqa chayqa, mana imanasqa orqotan haywanqa.

¹¹Chaytan Señor Diospa ñawpaqenpi altarpa wichay ladonpi nak'anqa. Aaronpa churin sacerdotekunataq altar muyuriq qhataman yawarninta hich'aykunqa.

¹²Chay nak'asqatan haywaqqa moqonarqarinqa, sacerdotetaq moqonasqa aychakunata, umantawan, ch'unchul wiratawan altarpi nina pataman wachuchaykunqa.

¹³Ch'unchulkunatapas chakan aychakunatapas haywaqpa mayllisqantañan sacerdoteqa llapallanta haywaspa altar patapi ruphachinqa. Chayqa mikhuna ofrendan, sumaq q'apayninqa Señor Diospa sonqonmanmi chayan.

¹⁴Señor Diospaq ofrendachus ruphachinapaq phalaq animal kanqa chayqa, kullkutapas otaq urpi malqotapas haywanqa.

¹⁵Chaytan sacerdoteqa altarman apamunqa, umanta p'itirparispan altarpi ruphachinqa, yawarnintataq altar qhataman sut'uchinqa.

¹⁶Hinaspanmi enqhentapas[1] chaypi kaqtawan horqonqa, chaytataq altarpa inti lloqsimuy ladonman wikch'uykunqa, usphaq kasqanman.

¹⁷Chaymantataqmi iskaynin raphra tupayta kichanqa, ichaqa manan iskayman ch'eqtanqachu. Sacerdotetaq chayta altar patapi ruphachinqa. Chayqa mikhuna ofrendan, sumaq q'apayninqa Señor Diospa sonqonmanmi chayan.