Read Diospa Simin Qelqa LEVÍTICO 12 Bible Online

LEVÍTICO 12 - Diospa Simin Qelqa bible

LEVÍTICO 12

¹Señor Diosmi Moisesta nirqan:

²— Israel runakunata nimuy: Warmi wiksallikuspa qhari wawata wachakuqqa qanchis p'unchaymi qhelli kanqa, killan purinan p'unchaykunapi hinan qhelli kanqa.

³Pusaqkaq p'unchaypitaqmi wawaq qhari-kaynin qarachaqa kuchuqasqa kanqa.

⁴Mamantaq kinsa chunka kinsayoq p'unchaytawanraq yawarninmanta ch'uyanchakunqa, manan Diospaq ima t'aqasqatapas tupaykunqachu, manan yupaychana karpatapas rinqachu ch'uyanchakuynin p'unchaykuna hunt'akunankama.

⁵Warmi wawatachus wachakunqa chayqa, killan purinan p'unchaykunapi hinan iskay semana qhelli kanqa, soqta chunka soqtayoq p'unchaytawanraqmi yawarninmanta ch'uyanchakunqa.

⁶Ch'uyanchakuynin p'unchaykuna hunt'akuqtintaq, qhari wawaña warmi wawaña kaqtinpas, Dioswan Tupana Karpa punkupi kaq sacerdoteman apamunqa ruphachina sacrificiopaq watayoq borregota, hucha pampachaypaqtaq malqo urpita mana chayqa kullkutapas.

⁷Sacerdotetaq chaykunata Señor Diosman haywanqa warmiq qhelli-kayninta ch'uyanchanapaq, hinan warmiqa yawar apayninmanta ch'uya kapunqa. Chaymi qhari wawata warmi wawata wachakuq warmipaq kamachikuy simiqa.

⁸Huk borregota haywananpaq mana aypaspanqa iskay kullkuta otaq iskay malqo urpita hap'ispa apanqa, hukninta ruphachina sacrificiopaq huknintataq hucha pampachay sacrificiopaq. Hinan sacerdoteqa chay warmiq qhelli-kayninta ch'uyanchanapaq haywanqa, chaymi ch'uya kapunqa, nispa.