Read Diospa Simin Qelqa LEVÍTICO 2 Bible Online

LEVÍTICO 2 - Diospa Simin Qelqa bible

LEVÍTICO 2

¹Pipas Señor Diosman ruru ofrendata haywanqa chayqa, ñut'u hak'un ofrendanqa kanqa. Chaytan aceitewan ch'aqchuykunqa, chaymantaq inciensota churaykunqa.

²Hinaspan chayta Aaronpa churin sacerdotekunaman apamunqa. Chaymantan sacerdoteqa hoqarinqa hapt'ay ñut'u hak'uta, aceitetawan, llapan inciensontinta, hinaspan chayta altar patapi ruphachinqa llapallanta Señor Diosman apamusqa kasqanta yuyarinapaq. Chayqa mikhuna ofrendan, sumaq q'apayninmi Señor Diospa sonqonman chayan.

³Ofrendamanta puchuqqa Aaronpaq churinkunapaqwanmi kanqa. Chay puchuqqa ancha ch'uyan, Señor Diospaq mikhuna ofrendakunamanta kasqanrayku.

⁴Hornopi chayasqa t'antatachus haywanki chayqa, aceiteyoq chapusqa mana qonchuyoq ñut'u hak'umanta t'antakunan kanqa, hinallataq aceitewan llusisqa mana qonchuyoq llaphllallaña t'antakunapas.

⁵Sartenpi chayasqa t'antatachus haywanki chayqa, aceiteyoq chapusqa ñut'u hak'umanta mana qonchuyoq t'antan kanqa.

⁶Chaytan ñut'urqarinki, hinaspan chayman aceiteta hich'aykunki, chay hinatan ruwanki.

⁷Mankapi theqtisqa t'antatachus haywanki chayqa, aceiteyoq chapusqa ñut'u hak'umantan ruwasqa kanqa.

⁸Chaykunamanta ruwasqa ofrendatan Señor Diosman apamunki, hinaspan chayta sacerdoteman qonki, paymi chayta altarman apanqa.

⁹Sacerdotetaqmi wakillanta hoqarinqa llapallanta Señor Diosman apamusqa kasqanta yuyarinapaq, hinaspan chayta altarpi ruphachinqa. Chayqa mikhuna ofrendan, sumaq q'apayninmi Señor Diospa sonqonman chayan.

¹⁰Ofrendamanta puchuqtaqmi Aaronpaqwan churinkunapaqwan kanqa. Chay puchuqqa ancha ch'uyan Señor Diospaq mikhuna ofrendakunamanta kasqanrayku.

¹¹Manan mayqen ofrendapas Señor Diosman haywasqaykichisqa qonchuyoqchu kanqa. Manan imatapas qonchuyoqtaqa miel misk'iyoqtapas Señor Diospaqqa mikhuna ofrendata ruphachinkichischu.

¹²Ñawpaq ruru ofrendata hinan chaykunata Señor Diosman haywawaqchis, ichaqa manan altar patapi ruphachiwaqchischu sumaq q'apay kananpaq.

¹³Llapa haywasqayki ofrendatan kachiwan kachichanki, manan hayk'aqpas ofrendaykiqa mana kachiyoqqa kanqachu, Diosniykiwan rimanakusqata sut'inchaq kachitaqa churallankipunin. Llapa ofrendaykitan kachiyoqta haywanki.

¹⁴Señor Diosmanchus ñawpaq ruru ofrendata apamunki chayqa, ninapi hank'asqatan haywanki, mut'illaraq rurukunatapas poqosqaña ch'aqesqa rurukunatapas haywankin.

¹⁵Chay patamanmi aceiteta hich'aykunki, inciensotapas churaykunki. Chay hinatan ruwanki.

¹⁶Llapallanta Señor Diosman apamusqa kasqanta yuyarinapaqmi sacerdoteqa ch'aqesqa rurumantapas aceitemantapas wakillanta hoqarinqa, chaytan llapan inciensontinta ruphachinqa, Señor Diospaq mikhuna ofrenda kananpaq.