Read Diospa Simin Qelqa LEVÍTICO 21 Bible Online

LEVÍTICO 21 - Diospa Simin Qelqa bible

LEVÍTICO 21

¹Señor Diosmi Moisesta nirqan: — Aaronpa churin sacerdotekunata nimuy, Señor Diosmi nin: Aman llaqtaykichispi ayata tupaykuspa qhellichakunkichischu.

²Ichaqa qaylla familiaykichis, mamaykichis, taytaykichis, churiykichis, ususiykichis, wawqeykichis,

³wasiykichispi tiyaq soltera panaykichispas wañullaqtinmi qhellichakuwaqchis.

⁴Ichaqa manan qhellichakuwaqchischu wak familiaykichispa ayanta llamispaqa.

⁵Wañuqniyoq kashaspaykichisqa aman umaykichista rutukunkichischu, aman sunkhaykichistapas rutukunkichischu, amallataq cuerpoykichistapas kuchukunkichischu.

⁶Ñoqa Diosniykichispaqmi ch'uya kankichis, amataq sutiyta pisichankichischu, qankunaqa mikhuna ofrendakunatan ñoqaman haywawankichis, chayrayku ch'uya kaychis.

⁷Aman casarakunkichischu rabona warmiwanpas, violasqawanpas, qosanpa wikch'usqan warmiwanpas, sacerdoteqa ñoqapaq ch'uya kasqaykichisrayku.

⁸Llaqtaqa Diospaq t'aqasqatan qhawasunkichis, qankunaqa ñoqa Diosniykichispa t'antaytan haywankichis. Llaqtaqa ch'uyatan qhawasunkichis, ch'uyanchaqniykichis Señor Diosqa ch'uya kasqayrayku.

⁹Sacerdoteq ususinchus qhelli huchapi puriyta qallarinqa chayqa, taytantan p'enqayman churan. Ninawan kanasqan kanqa.

¹⁰Wawqenkuna ukhupi uma sacerdoteqa hawina aceitewan uman hawiykusqan karqan, ch'uya p'achakunata p'achakunanpaqpas churasqan karqan. Chaymi uma sacerdoteqa chukchanta ama paskakunqachu, p'achankunatapas ama llik'ikunqachu wañuqniyoq kaspa.

¹¹Aman pi runa wañusqamanpas qayllaykunqachu, aman taytanraykupas mamanraykupas qhellichakunqachu.

¹²Amallataq yupaychana cheqasmantapas lloqsinqachu, chaytapas qhellichanqachu, hawina aceiteywan t'aqasqa kasqanrayku. Ñoqaqa Señor Diosmi kani.

¹³Uma sacerdoteqa doncella warmiwanmi casarakunqa.

¹⁴Aman viudawanpas, wikch'usqawanpas, violasqawanpas, rabonawanpas casarakunqachu, aswanpas llaqtan doncella warmiwanmi casarakunqa.

¹⁵Ahinapin mirayninta llaqtanpi mana qhellichanqachu. Ñoqa Señor Diosmi paytaqa ch'uyanchani, nispa.

¹⁶Señor Diosmi Moisesta nirqan:

¹⁷— Aaronta nimuy, Señor Diosmi nin: Qhepa mirayniykipi mayqen mirayniykipas imanpas mana qhali kaqtinqa, aman ñoqa Diosninpa t'anta ofrendayta haywaq asuykamuwanqachu.

¹⁸Mayqen qharipas imanpas mana qhali kaqtinqa aman asuykunqachu: ñawsa qharipas, wist'upas, iman wit'usqapas, millay rikch'ayniyoqpas,

¹⁹p'akisqa chakiyoqpas, p'akisqa makiyoqpas,

²⁰qhopupas, eqopas, qoyrusqa ñawiyoqpas, qarachiyoqpas, seqsi onqoyniyoqpas, kapasqapas.

²¹Aaronpa mirayninmanta mayqen qharipas imanpas mana qhali kaqtinqa, aman ñoqa Señor Diosman ruphachina ofrendata haywawananpaq qayllaykamuwanqachu. Manan payqa qhalichu, manan ñoqa Diosninpa t'anta ofrendayta haywaq asuykamuwanqachu.

²²Mikhunataqa ch'uyay-ch'uyamanta kaqtapas ch'uyamanta kaqtapas mikhunmanmi,

²³ichaqa manan cortina ukhumanqa qayllaykunqachu, manallataq altarmanpas, paypa imanpas mana allin kasqanrayku. Chay hinapin ñoqa yupaychana cheqasta mana qhellichanqachu. Ñoqaqa Señor Diosmi kani, paykunata ch'uyanchaqmi kani, nispa.

²⁴Moisestaq chayta willarqan Aaronman, churinkunaman, Israel llapa runakunamanwan.