Read Diospa Simin Qelqa LEVÍTICO 22 Bible Online

LEVÍTICO 22 - Diospa Simin Qelqa bible

LEVÍTICO 22

¹Señor Diosmi Moisesta nirqan:

²— Aarontawan churinkunatawan nimuy Israel runakunaq haywawasqan ch'uya ofrendankunata respetanankupaq, ch'uya sutiyta ama pisichanankupaq. Ñoqaqa Señor Diosmi kani.

³Paykunata nimuy, Señor Diosmi nin: Mirayniykichismanta mayqen qharipas qhelli kashaspa, Israel runakunaq ñoqapaq t'aqasqan ch'uya ofrendakunaman qayllaykunqa chayqa, qayllaymanta wikch'usqan kanqa. Ñoqaqa Señor Diosmi kani.

⁴Aaronpa miraynin mayqen qharipas lepra onqoyniyoq kanqa, q'eya hisp'aqpas kanqa chayqa, aman ch'uya ofrendakunata mikhunqachu pay ch'uya kanankama. Mayqen sacerdotepas ima wañusqatapas tupaykunqa, muhunpas phawanqa,

⁵ima mach'aqwaytapas tupaykuspa qhellichakunqa, ima qhellichaqwan qhellichasqa runatapas tupaykunqa chayqa, qhellin kanqa.

⁶Chay sacerdoteqa ch'isinkaman qhelli kanqa, manataqmi ch'uya ofrendakunataqa mikhunqachu cuerponta unuwan manaraq bañakushaspaqa.

⁷Inti haykuqtinñan ch'uya kapunqa, hinaspan chay ch'uya ofrendakunata mikhunqa, mikhunanku kasqanrayku.

⁸Manan wañusqatapas phiña animalpa llik'irqarisqantapas mikhunqachu, aman chaywan qhellichakunqachu. Ñoqaqa Señor Diosmi kani.

⁹Sacerdotekunaqa kamachikusqaytapuni hunt'achunku, ama chay hawa huchallikunankupaq, paqtan chay hinata wañunkuman chay kamachikusqayta pisichaspanku. Ñoqaqa Señor Diosmi kani, paykunata ch'uyanchaqmi kani.

¹⁰Mana sacerdote kaqqa aman ch'uya ofrendataqa mikhunqachu. Sacerdoteq qorpachasqanpas llank'apakuqninpas aman ch'uya ofrendataqa mikhunqachu.

¹¹Ichaqa sacerdotechus qolqenwan huk kamachita rantinqa chayqa, kamachiqa chaytaqa mikhunmanmi, wasinpi naceq kamachipas chay mikhunataqa mikhunmanmi.

¹²Sacerdoteq ususin mana sacerdotewanchu casarakuspaqa, aman ch'uya ofrendakunata mikhunqachu.

¹³Sacerdoteq ususintaqchus viudapas wikch'usqapas kapunqa, manataq wawayoqchu kanqa, taytanpa wasinmantaq kutimpunqapas chayqa, sipas tiemponpi hinan taytanpa mikhunanta mikhunqa, ichaqa aman mayqen mana sacerdote kaqpas chaytaqa mikhunqachu.

¹⁴Pipas mana reparaspa ch'uya ofrendata mikhuqqa, chaymanmi phisqa partemanta hukninta yapaykunqa, hinaspan chayta ch'uya ofrendatawan sacerdoteman kutichipunqa.

¹⁵Aman sacerdotekunaqa pisichanqakuchu Israel runakunaq ch'uya ofrendankunataqa, chaykunaqa ñoqa Señor Diospaq t'aqasqakunan.

¹⁶Paykunaqa ch'uya ofrendakunataqa aman piwanpas mikhuchinqakuchu, chay mikhuqkunaqa huchallikunkumanmi, hinaspan ofrendata kutichipunkuman. Ñoqaqa Señor Diosmi kani, paykunata ch'uyanchaqmi kani, nispa.

¹⁷Señor Diosmi Moisesta nirqan:

¹⁸— Aaronman, churinkunaman, Israel llapa runakunamanwan nimuy, Señor Diosmi nin: Israel mayqen runapas, Israelpi tiyaq wak llaqtayoqpas prometekusqanta hunt'ananpaq tukuy sonqonmanta ofrendata qowaspa ñoqa Señor Diosman ruphachina ofrendata haywawanqa chayqa, mana imanasqa animalmi kanqa.

¹⁹Ñoqaq chaskisqay kananpaqqa mana imanasqa orqon kanqa, toropas, borregopas, cabrapas kachun.

²⁰Aman ima animaltapas mana allintaqa haywawankichischu, chaykunataqa manan qankunamanta chaskisqaykichischu.

²¹Hinallataq pipas ñoqa Señor Diosman sumaq kawsay ofrendata haywawanqa prometekusqanta hunt'ananpaq, otaq tukuy sonqomanta qosqa ofrenda kananpaq, toropas ovejapas cabrapas kachun, chaskisqa kananpaqqa mana imanasqa qhalin kanqa.

²²Ñawsatapas, chakin p'akisqatapas, iman qhorusqatapas, lleqthiyoqtapas, qarachiyoqtapas, tiktiyoqtapas aman ñoqaman haywawankichischu. Amallataqmi chaykunataqa ñoqaq altarniy patapi ruphachina sacrificiopaq churankichischu.

²³Toroqpas anejoqpas kanman hukkaq chakin yaparisqa, hukkaq chakintaq huch'uylla chayqa, tukuy sonqomanta ofrendata hinan haywawaqchis, ichaqa manan prometekusqamanta haywasqaqa chaskisqachu kanqa.

²⁴Aman ñoqa Señor Diosman haywawankichischu ima animaltapas runtun k'irisqatapas, t'astasqatapas, llik'isqatapas, kapasqatapas. Aman hallp'aykichispipas animalkunata chay hinata ruwankichischu.

²⁵Amallataqmi wak llaqtayoqkunamantapas chay hina animalkunataqa chaskinkichischu Diosniykichispa mikhunanta hina haywanaykichispaq. Chaykunaqa mana allinmi, manan sumaqchu, chaymi qankunamanta mana chaskisunkichischu, nispa.

²⁶Señor Diosmi Moisesta nirqan:

²⁷— Torillopas borregopas cabrapas nacespaqa qanchis p'unchaytan mamanta ñuñunqa, pusaqkaq p'unchaymanta qhepamanmi ichaqa, ñoqa Señor Diospaq nak'asqa mikhuna ofrendapaq chaskisqa kanqa.

²⁸Wakatapas ovejatapas cabratapas aman kaq p'unchayllapichu mamantin uñantinta nak'ankichis.

²⁹Ñoqa Señor Diosman agradecey ofrendata haywawaspaykichisqa, chaskinaypaq hinapunin haywawankichis.

³⁰Chay kikin p'unchaypin mikhunkichis, aman qhepantin p'unchaypaqqa imatapas saqenkichischu. Ñoqaqa Señor Diosmi kani.

³¹Kamachikuyniykunata waqaychaspaykichismi hunt'ankichis. Ñoqaqa Señor Diosmi kani.

³²Aman ch'uya sutiyta pisichankichischu. Israel runakunaqa ch'uya kasqaytan reqsiwananku. Ñoqa Señor Diosmi ch'uyanchaqniykichis kani.

³³Diosniykichis kanaypaqmi Egipto suyumanta horqomurqaykichis. Ñoqaqa Señor Diosmi kani, nispa.