Read Diospa Simin Qelqa LEVÍTICO 24 Bible Online

LEVÍTICO 24 - Diospa Simin Qelqa bible

LEVÍTICO 24

¹Señor Diosmi Moisesta nirqan:

²— Israel runakunata kamachiy olivo ruru ch'irwasqa, ch'uya aceiteta k'anchaypaq apamunasuykikupaq, lamparachakuna k'anchashanallanpaq.

³Ñoqawan Tupana Karpapin Aaronqa lamparachakunata tutantin qhawanqa kamachikuy simi p'alta rumiyoq arcaq ñawpaqen cortinaq hawa ladonpi. Chayqa wiñaypaq kamachikuy simin miray-mirayniykichispaq kanqa.

⁴Aaronmi ñoqa Señor Diospa ñawpaqeypi kashaq ch'uya qori candelero patapi lamparachakunata qhawashallanqapuni.

⁵Ñut'u hak'umantan chunka iskayniyoq t'antata masanki, sapanka t'antan tawa kilo kanqa.

⁶Chaykunatan ñawpaqeypi ch'uya qori mesa patapi iskay tawqata churanki, sapanka tawqapi soqtata.

⁷Sapanka tawqamanmi churanki ch'uya inciensota, llapallanta ñoqa Señor Diosman apamuwasqa kasqanta yuyarinapaq, chayqa ñoqapaq mikhuna ofrendan.

⁸Sapa samana p'unchaymi Israel runakunaq sutinpi ñoqa Señor Diospa ñawpaqeypi churanqa, chayqa wiñaypaq rimanakuymi.

⁹Aaronpaq churinkunapaqwanmi chay t'antakunaqa kanqa. Chay t'antakuna ancha ch'uya kasqanrayku karpaq ch'uya kanchanpi mikhunqaku. Ñoqa Señor Diospaq mikhuna ofrendakunamantaqa chay t'antakunan Aaronman tupallanqapuni, chayqa wiñaypaq kamachikuymi, nispa.

¹⁰Israel runakunawanmi huk runa tiyarqan, mamanmi Israel warmi karqan, taytantaq Egipto runa karqan. Huk p'unchaymi payqa Israel runawan karpa-karpapi maqanakurqan.

¹¹Hinaspan millayta rimaspa Señor Diospa sutinta ñakarqan, chaymi payta Moisesman aparqanku. Chay runaq mamanqa Dan ayllumanta Dibriq ususin Selomitmi karqan.

¹²Hinaspan presota wisq'arqanku Señor Dios paykunapaq chayta sut'inchanankama.

¹³Hinaqtinmi Señor Diosqa Moisesta nirqan:

¹⁴— Chay pisichawaqniyta karpa-karpamanta horqoy, llapa payta uyariqkunataq umanman makinkuta churaykuchunku, hinaspa llapalla payta rumiwan ch'aqechunku.

¹⁵Israel runakunatataq ninki: Pipas Diosninta ñakaqqa, huchanmantan muchunqa.

¹⁶Pipas Señor Diospa sutinta pisichaqqa, wañuchisqan kanqa, llapallanmi payta ch'aqenqa. Llaqtayoqpas wak llaqtayoqpas kachun, Señor Diosta k'aminqa chayqa, wañuchisqapunin kanqa.

¹⁷Pipas mayqen runatapas wañuchiqqa wañuchisqallataqmi kanqa.

¹⁸Pipas ima animaltapas wañuchiqqa huktan sayachipunqa, animalmanta animalta.

¹⁹Pipas runamasinta k'iriqqa, imaynatachus k'irirqan chay hinallataqmi paypas k'irisqa kanqa:

²⁰p'akisqamanta p'akisqa, ñawimanta ñawi, kirumanta kiru. Imaynatachus hukkaqta k'irirqan chay hinallataqmi paypas k'irisqa kanqa.

²¹Ima animaltapas wañuchiqqa huktan sayachipunqa, runata wañuchiqmi ichaqa wañuchisqa kanqa.

²²Huk kamachikuy simillatan hap'inkichis wak llaqtayoqpaqpas llaqta-masiykichispaqpas. Ñoqaqa Diosniykichis Señor Diosmi kani, nispa.

²³Hinan Moisesqa Israel runakunaman willarqan, chaymi paykunaqa chay millay rimaqta karpa-karpamanta horqospa rumiwan ch'aqerqanku. Israel runakunaqa ruwarqanku Señor Diospa Moisesta kamachisqanman hinan.