Read Diospa Simin Qelqa LEVÍTICO 25 Bible Online

LEVÍTICO 25 - Diospa Simin Qelqa bible

LEVÍTICO 25

¹Señor Diosmi Moisesta Sinaí orqopi nirqan:

²— Israel runakunata nimuy, Señor Diosmi nin: Qankunaman qonay hallp'aman haykuqtiykichisqa, chakraqa ñoqa Señor Diosta yupaychawananpaqmi samanqa.

³Soqta watan chakraykita tarpunki, soqta watataqmi uvas chakraykitapas kuchupanki, hinaspa rurusqantapas hoqarinki.

⁴Qanchiskaq watapitaqmi chakraqa ñoqa Señor Diosta yupaychawananpaq samanqa. Aman chakraykita tarpunkichu, amallataq uvas chakraykitapas kuchupankichu.

⁵Chakraykipi k'ipataqa aman cosechankichu, uvas chakraykipi k'ipa uvastapas aman pallankichu. Samana watan chakrakunapaqqa kanqa.

⁶Chakraq samana watapi rurusqantaqa mikhunkin, mikhullanqataqmi qhari kamachiykipas, warmi kamachiykipas, uywasqaykipas, qanwan kuska tiyaq wak llaqtayoqpas,

⁷uywaykipas, hallp'aykipi kaq salqa animalpas. Chakraq lliw rurusqanqa mikhunapaqmi kanqa.

⁸Qanchis kuti qanchis watatan yupanki, chhaynapin qanchis wata qanchisqa tawa chunka isqonniyoq wata kanqa.

⁹Hinan qanchiskaq killaq chunkakaq p'unchayninpi Hucha Pampachay P'unchaypi hinantin suyuykichispi waqrata tocankichis.

¹⁰Phisqa chunkakaq watatan ñoqa Señor Diospaq t'aqankichis, hinaspan suyuntinpi llapa tiyaqkunapaq kacharisqa-kayta willankichis. Chay wataqa kacharipuna watan kanqa, sapankaykichismi chakraykichista hap'ikapunkichis, sapanka kamachitaq familianman kutipunqa.

¹¹Phisqa chunkakaq wataqa kacharipuna watan kanqa. Aman tarpunkichischu, amallataq k'ipakunatapas pallankichischu, amallataq mana kuchupasqa uvas chakraykichistapas pallankichischu.

¹²Qankunapaqqa chay wataqa ch'uyan kanqa. Chakraq kikillan rurusqantan mikhunkichis.

¹³Chay kacharipuna watapiqa sapankaykichismi chakraykichista hap'ikapunkichis.

¹⁴Runa-masiykichismanchus imatapas vendenkichis, otaq paymanta imatapas rantinkichis chayqa, ama pipas wawqenta q'otuchunchu.

¹⁵Runa-masiykimantachus rantinki chayqa, hamuq kacharipuna watapaq hayk'a wataraqchus kananta yupanki, chaymi payqa vendesunki hayk'a watatachus cosechawaq chayman hina.

¹⁶Askha watapaq kanqa chayqa, askha qolqewanmi rantinki, pisi watallapaq kanqa chayqa, pisi qolqellawanmi rantinki, hayk'a cosechachus kanantan rantishanki.

¹⁷Aman mayqenniykichispas runa-masiykichista q'otunkichischu, aswanpas ñoqa Diosniykichistan manchakuwankichis. Ñoqaqa Diosniykichis Señor Diosmi kani.

¹⁸Hunt'aychis unanchayniy simikunatapas kamachikuyniykunatapas, hinan mana llakipakuspa chay suyupi tiyankichis.

¹⁹Hallp'ataq ruruchinqa, hinan saksanaykichiskama mikhunkichis, chaypitaqmi mana llakipakuspa tiyankichis.

²⁰Ninkichistaqchus: ¿Imatan qanchiskaq watapi mikhusun? Manataq tarpusunchu, manallataq cosechasunpaschu, nispaykichis chayqa,

²¹ñoqan soqtakaq watapi saminchasqaykichis, chaymi hallp'aqa kinsa watapaq rurupusunkichis.

²²Pusaqkaq watapi tarpushaspaykichispas, ñawpaqkaq cosechasqa mikhuytaraqmi mikhushankichis, isqonkaq wata cosecha rurunankaman ñawpaqkaqta mikhunkichis.

²³Manan hallp'aqa wiñaypaqchu vendekunqa, hallp'aqa ñoqaqmi, qankunaqa wak llaqtayoqmi tiyapakuqmi hallp'aypi kashankichis.

²⁴Chayrayku, tukuy hap'isqaykichis hallp'ata hallp'ayoqpa horqokapunanta ama hark'akunkichischu.

²⁵Wawqeykichus wakchayapun, hinaspa hallp'anta vendepun chayqa, sispa ayllunmi hamuspa wawqenpa vendesqanta rantipanqa.

²⁶Manataq sispa ayllun kanqachu, ichaqa hallp'ayoqchus rantipananpaq hunt'asqata huñunqa chayqa,

²⁷hayk'a watañachus vendesqan pasasqantan yupanqa. Hinaspan rantiqninpaq hayk'a wataraqchus kacharipuna watakama qhepasqanmanta kutichipuspa hallp'anta hap'ikapunqa.

²⁸Manataq rantipananpaq taripaqtinqa, vendesqanta rantikuqmi kacharipuna watakama hap'inqa. Kacharipuna watapitaqmi kacharisqa kapunqa, hinan vendeqqa hallp'anta hap'ikapunqa.

²⁹Pipas tiyana wasita muyuriq perqayoq llaqtapi vendenqa chayqa, huk watakaman wasinta horqokapuyta atinqa. Watantinmi horqokapunanpaq tiempo kanqa.

³⁰Manataq watantin ukhupi horqosqachu kanqa chayqa, chay wasitaqa rantikuqmi wiñaypaq hap'ikapunqa, mirayninkunapaqwan. Manan kacharipuna watapiqa kacharisqachu kanqa.

³¹Mana muyuriq perqayoq llaqta wasikunan ichaqa campo chakrakuna hina rikusqa kanqa. Atikunmi horqokapunapaq, kacharipuna watapitaqmi kacharisqa kapunqa.

³²Leví runakunaqa ima tiempopipas atinkun llaqtankupi wasinkuta horqokapuyta.

³³Pipas Leví runakunaq llaqtanpi wasita rantiqqa kacharipuna watapin rantisqan wasita kacharipunqa, Leví runakunaq llaqtankupi wasikunaqa Israel runakuna ukhupi paykunaq kasqanrayku.

³⁴Ichaqa llaqtanku muyuriq uywa michina hallp'akunaqa manan hayk'aqpas vendesqachu kanqa, wiñaypaq paykunaq kasqanrayku.

³⁵Llaqta-masiykichus wakchayapunman, kawsananpaqtaq mana imanpas kanmanchu chayqa, qanmi yanapaykunki, wak llaqtayoqta hina tiyapakuqta hina, qayllaykipipas tiyachillankitaqmi.

³⁶Mañaspaykiqa aman paymanta miraynintapas wachaynintapas chaskinkichu, aswanpas ñoqa Diosniykitan manchakuwanki, llaqta-masiykitapas qayllaykipin tiyachillankitaq.

³⁷Aman qolqeykita interesniyoqta manunkichu, amallataq mikhunaykitapas hayk'apichus vendenamanta aswanmanqa vendenkichu.

³⁸Ñoqaqa Diosniykichis Señor Diosmi kani. Diosniykichis kanaypaqmi Canaán suyuta qankunaman qonaypaqwan Egipto suyumanta horqomurqaykichis.

³⁹Qanwan kashaspachus, llaqtamasiyki wakchayapunqa, hinaspa qanman vendekapusunki chayqa, aman paytaqa rantisqata hina llank'achinkichu.

⁴⁰Llank'apakuqta hinan, wak llaqtayoqta hinan paytaqa hap'inki, kacharipuna watakamataq servisunki.

⁴¹Hinaspan wasiykimanta kacharisqa lloqsipunqa, wawankunantin kutipunqa, hinan tayta-mamanpa hallp'anmanpas kutiykapunqa.

⁴²Paykunaqa Egipto suyumanta horqokamusqay kamachiykunan, manan rantisqakuna hinachu vendesqa kanqaku.

⁴³Aman paytaqa muchuchinkichu, aswanpas ñoqa Diosniykitan manchakuwanki.

⁴⁴Muyuriqniykichispi tiyaq suyukunamantan qhari kamachikunatapas warmi kamachikunatapas rantikuyta atinkichis.

⁴⁵Atillankichistaqmi rantiyta qankuna ukhupi tiyaq wak llaqtayoqkunata suyuykichispi naceq wawankutapas. Paykunan kaqniykichis kayta atin.

⁴⁶Paykunatan wawaykichiskunapaqpas herenciata saqeyta atinkichis. Paykunan kamachiykichis kanqa wañunankukama. Ichaqa Israel runa llaqta-masiykichiskunataqa aman muchuchinkichischu.

⁴⁷Qayllaykipi tiyaq wak llaqtayoqchus qhapaqyapunqa, paypa qayllanpi kaq wawqeykitaq wakchayapunqa, hinaspa chay wak llaqtayoqmanpas, mayqen ayllunmanpas pay kikinta vendekapunqa chayqa,

⁴⁸vendesqa kasqanmantañapas rescatasqa-kayta atinmi. Huknin wawqenmi payta rescatanman.

⁴⁹Paytaqa rescatanmanmi tionpas, primonpas, ayllun ukhupi mayqen sispa familianpas. Allintataqchus gananqa chayqa, pay kikinmi rescatakunman.

⁵⁰Rantiqninwanmi yupanqa payman vendesqa kasqan watamantapacha kacharipuna watakama. Hayk'atachus pagananqa chaninchakunqa hayk'a watañachus llank'asqanman hina, llank'apakuqpa llank'asqanman hina.

⁵¹Askha wataraq kaqtinpas, chaykunaman hinan rescatasqa kananpaq vendekusqan qolqeta kutichipunqa.

⁵²Kacharipuna watakamataqchus pisi watalla qhepanqa chayqa, paywanmi hayk'ataraqchus paganantaqa chaninchanqa, hinaspan hayk'a watataraqchus qhepakunan kanman chayman hina kutichipunqa.

⁵³Sapa wata llank'apakuqta hinan paytaqa rikunki, aman paytaqa muchuchinkichu.

⁵⁴Manataq chay watakunapi rescatasqachu kanqa chayqa, payqa churinkunawan kuskan kacharipuna watapi kacharisqa kapunqa.

⁵⁵Israel runakunaqa serviwaqniykunan, Egipto suyumanta horqomusqay kamachiykunan. Ñoqaqa Diosniykichis Señor Diosmi kani.