Read Diospa Simin Qelqa LEVÍTICO 27 Bible Online

LEVÍTICO 27 - Diospa Simin Qelqa bible

LEVÍTICO 27

¹Señor Diosmi Moisesta nirqan:

²— Israel runakunata nimuy, Señor Diosmi nin: Pipas ñoqata serviwananpaq prometekun, huk runaq valorninta chayqa lloqsinanpaqqa pagananpunin.

³Yupaychana karpapi tupunaman hinan hayk'atachus runaq valesqanqa chaninchakunqa: Iskay chunka watayoqmanta soqta chunka watayoqkama: qharitan phisqa chunka qolqeman chaninchakunqa,

⁴warmitataq kinsa chunka qolqeman.

⁵Phisqa watayoqmanta iskay chunka watayoqkama: qharitan iskay chunka qolqeman chaninchakunqa, warmitataq chunka qolqeman.

⁶Killayoqmanta phisqa watayoqkama: qharitan phisqa qolqeman chaninchakunqa, warmitataq kinsa qolqeman.

⁷Soqta chunka watayoqmanta wichaymantaq: qharitan chunka phisqayoq qolqeman chaninchakunqa, warmitataq chunka qolqeman.

⁸Sinchi wakchachus chaninchasqata pagananpaq kanqa chayqa, sacerdotemanmi pusasqa kanqa, chaymi sacerdoteqa prometekuqpa atisqanman hina hayk'achus kananta chaninchanqa.

⁹Ñoqa Señor Diosman prometesqakunachus haywana animal kanqa chayqa, chaykunamanta imapas ñoqaman qosqaqa ch'uyapunin kanqa.

¹⁰Manan cambiasqachu kanqa, allinña mana allinña kanqa chaypas. Huk animalchus hukkaqwan cambiasqa kanqa chayqa, chay animalpas, cambianapaq qosqa animalpas, ñoqa Señor Diospaq t'aqasqan kanqa.

¹¹Ñoqa Señor Diosman prometesqakunachus mana haywana qhelli animal kanqa chayqa, chay animalmi sacerdoteq ñawpaqenpi sayaykachisqa kanqa.

¹²Sacerdotetaq hayk'atachus pagananta qhawarinqa imaynachus animalpa kasqanman hina. Sacerdoteq hayk'amanchus chaninchasqanman hinan kapunqa.

¹³Prometekuq runa chay animalta horqokapuyta munaspanqa, chaninchasqamanmi phisqa partemanta hukninta yapaykuspa paganqa.

¹⁴Pipas wasinta ñoqa Señor Diospaq t'aqanqa chayqa, sacerdoten hayk'achus valesqanta chaninchanqa imaynachus wasiq kasqanman hina. Sacerdoteq hayk'amanchus chaninchasqanman hinan kapunqa.

¹⁵Wasinta t'aqaqtaq horqokapuyta munanqa chayqa, hayk'amanchus chaninchasqanmanmi phisqa partemanta hukninta yapaykuspa paganqa, hinan wasiqa paypa kapunqa.

¹⁶Pipas wakin chakranta ñoqa Señor Diospaq t'aqanqa chayqa, hayk'a cebada muhuwanchus tarpusqanman hinan sacerdoteqa chaninchanqa, phisqa qolqeta sapa arroba muhupaq.

¹⁷Chakrantachus kacharipuna watamantapacha t'aqanqa chayqa, hayk'amanchus chaninchasqaman hinan churasqa kapunqa.

¹⁸Kacharipuna wata qhepatachus chakranta t'aqanqa chayqa, sacerdoten hayk'a qolqechus valesqanta tanteanqa kacharipuna watakama hayk'a wataraqchus kasqanman hina, chaymi hayk'a watamanchus chaninchasqamanta pisiyachisqa kanqa.

¹⁹Chakranta t'aqaqtaqchus horqokapuyta munanqa chayqa, hayk'achus valesqamanmi phisqa partemanta hukninta yapaykuspa paganqa, hinan chakraqa paypa kapunqa.

²⁰Paytaqchus chakrata mana horqokapushaspa hukman chayta vendenqa chayqa, manan horqokapunqañachu,

²¹aswanpas kacharipuna watapin kacharisqa chakraqa ñoqa Señor Diospaq t'aqasqapuni kapunqa, hinan chay chakraqa sacerdoteq kapunqa.

²²Pipas rantikusqan chakrata ñoqa Señor Diospaq t'aqanqa, manataq herencian chakrachu karqan chayqa,

²³sacerdoten paywan tanteanqa kacharipuna watakama hayk'amanchus chaninchasqata, chay kikin p'unchaypin hayk'amanchus chaninchasqata paganqa ñoqapaq t'aqasqa qolqe kananpaq.

²⁴Kacharipuna watapin rantikuq runaqa chay chakrata kikin chakrayoqman kutichipunqa.

²⁵Hayk'amanchus imapas chaninchasqaqa yupaychana wasipi tupunaman hinan tanteakunqa.

²⁶Manan pipas ñawpaq wachay animalkunataqa ñoqa Señor Diospaq t'aqanmanchu, wakapas, ovejapas cabrapas kachun, chaykunaqa ñoqaqñan.

²⁷Ñawpaq wachay qhelli uywakunachus kanqa chayqa, hayk'amanchus chaninchasqaman hinan horqokapunqa, hinaspan chay chaninchasqaman phisqa partemanta hukninta yapaykuspa paganqa. Manataq horqokapunqachu chayqa, hayk'amanchus chaninchasqaman hinan vendekunqa.

²⁸Ichaqa ñoqa Señor Diospaqpunin kanqa piqpapas t'aqapusqanqa, manan vendesqapas horqokapusqapas kanmanchu. Runanpas, uywanpas, chakranpas, imanpas ñoqa Señor Diospaqpuni t'aqasqaqa ch'uyan.

²⁹Pipas ñoqapaqpuni t'aqasqaqa manan rescatasqachu kanqa, aswanpas wañuchisqapunin kanqa.

³⁰Tukuy chakra diezmoqa, chakra muhupas sach'a rurupas ñoqaqmi, ñoqapaq t'aqasqañan.

³¹Pipas wakin diezmonta horqokapuyta munaqqa, phisqa partemantan hukninta hayk'achus kasqanman yapaykuspa paganqa.

³²Wakatapas ovejatapas cabratapas tawnawan yupashaspaqa, sapa chunkaman chayaspan ñoqa Señor Diospaq t'aqanqa. Chaykunaqa ñoqaqmi.

³³T'aqashaspaqa aman qhawanqachu allinchus mana allinchus kasqantaqa, amallataqmi cambianqapaschu. Cambianqachus chayqa, chay animalpiwanmi t'aqasqa kapunqa, manan cambiasqachu kanqa, nispa.

³⁴Chay kamachikuykunatan Sinaí orqopi Señor Diosqa Israel runakunapaq Moisesman qorqan.