Read Diospa Simin Qelqa LEVÍTICO 3 Bible Online

LEVÍTICO 3 - Diospa Simin Qelqa bible

LEVÍTICO 3

¹Pipas waka t'aqamanta sumaq kawsay ofrendata haywanqa chayqa, orqoña chinaña kaqtinpas, mana imanasqatan Señor Diospa ñawpaqenpi haywanqa.

²Ofrendanpa umanmanmi makinta churaykunqa, hinaspan chayta Dioswan Tupana Karpa punkupi nak'anqa. Aaronpa churin sacerdotekunataq yawarninta altar muyuriq qhataman hich'aykunqaku.

³Hinaspan payqa sumaq kawsay ofrendamanta Señor Diospaq mikhuna ofrendata hina haywanqa llapan wiksa llika wirata,

⁴iskaynin rurunta, chaykuna qayllapi kaq ñañu wasa wirata, sullk'a k'ipchantawan.

⁵Aaronpa churinkunataq chayta altar nina patapi kaq ruphachina ofrendatawan ruphachinqaku. Chayqa mikhuna ofrendan, sumaq q'apayninqa Señor Diospa sonqonmanmi chayan.

⁶Pipas oveja t'aqamanta sumaq kawsay ofrendata Señor Diosman haywanqa chayqa, orqoña chinaña kaqtinpas, mana imanasqatan haywanqa.

⁷Borregotachus haywanqa chayqa, Señor Diospa ñawpaqenpin chayta haywanqa.

⁸Ofrendanpa umanmanmi makinta churaykunqa, hinaspan chayta Dioswan Tupana Karpa punkupi nak'anqa. Aaronpa churinkunataq yawarninta altar muyuriq qhataman hich'aykunqaku.

⁹Chay sumaq kawsay ofrendamantan Señor Diospaq mikhuna ofrendata haywanqa wirata, k'uchunmanta qhorusqa chupata, llapan wiksa llika wirata,

¹⁰iskaynin ruruntapas, chaykuna qayllapi ñañu wasa wirata, sullk'a k'ipchantawan.

¹¹Hinaspan sacerdoteqa chayta altar patapi ruphachinqa. Chayqa Señor Diospaq mikhuna ofrendan.

¹²Ofrendanchus cabra kanqa chayqa, Señor Diospa ñawpaqenpin chayta haywanqa.

¹³Chaypa umanmanmi makinta churaykunqa, hinaspan chayta Dioswan Tupana Karpa punkupi nak'anqa. Aaronpa churinkunataq yawarninta altar muyuriq qhataman hich'aykunqaku.

¹⁴Hinaspataq chaymanta Señor Diospaq mikhuna ofrendata haywanqa llapan wiksa llika wirata,

¹⁵iskaynin rurunta, chaykuna qayllapi kaq ñañu wasa wirata, sullk'a k'ipchantawan.

¹⁶Hinaspan sacerdoteqa chayta altar patapi ruphachinqa. Chayqa mikhuna ofrendan, sumaq q'apayninqa Señor Diospa sonqonmanmi chayan. Llapa wiran Señor Diospaq.

¹⁷Maypiña tiyaqtiykichispas kayqa wiñaypaq kamachikuy simin miray-mirayniykichispaq kanqa. Aman wiratapas yawartapas mikhunkichischu, nispa.