Read Diospa Simin Qelqa LEVÍTICO 5 Bible Online

LEVÍTICO 5 - Diospa Simin Qelqa bible

LEVÍTICO 5

¹Pipas testigananpaq waqyasqa kaspa, rikushaspa otaq yachashaspa mana chayta willakunqachu chayqa, paymi huchachasqa kanqa.

²Pipas mana yachaspa ima qhelli kaqtapas tupaykuqqa, salqa uywa wañusqapas kachun, animal wañusqapas kachun, mach'aqway wañusqapas kachun, payqa qhellin kanqa, huchayoqmi rikhurinqa.

³Pipas mana yachaspa runaq ima qhellintapas tupaykunqa, chaymantañataq yachanqa chayqa, huchayoqmi rikhurinqa.

⁴Pipas mana yachaspa allinpaqpas mana allinpaqpas hawan-ukhunta imapipas juranqa, chaymantañataq chayta yachanqa chayqa, huchayoqmi rikhurinqa.

⁵Pipas chaykunapi huchallikuqqa huchallikusqantan willakunqa.

⁶Huchallikusqanmantataq ofrendata Señor Diosman apamunqa malta ovejatapas china cabratapas hucha pampachay ofrenda kananpaq. Sacerdotetaq chayta haywanqa huchallikusqanmanta pampachanapaq.

⁷Manataq malta ovejamanpas cabramanpas aypanqachu chayqa, huchallikusqanmantan ofrendata Señor Diosman apamunqa iskay kullkuta, mana chayqa iskay urpi malqotapas. Hukninmi hucha pampachaypaq kanqa, huknintaq ruphachina ofrendapaq.

⁸Sacerdotemanmi chaykunata apamunqa, paymi hucha pampachaypaq kaqtaraq haywanqa. Kunkantan q'ewinqa, ichaqa manan umanta p'itirparinqachu,

⁹yawarnintataq altar qhataman ch'aqchuykunqa. Yawar puchutataq altar qhataman sut'uchinqa. Chayqa hucha pampachaypaq ofrendan.

¹⁰Hukkaqtataqmi kamachisqaman hinapuni ruphachinqa. Chay hinatan sacerdoteqa chay huchallikuqpa huchan pampachaypaq haywanqa, hinan pampachasqa kapunqa.

¹¹Manataq iskay kullkumanpas iskay urpi malqomanpas aypanqachu chayqa, huchallikuqmi huchan pampachasqa kananpaq iskay kilo hina ñut'u hak'u ofrendata apamunqa. Manan chaymanqa aceitetapas inciensotapas yapaykunqachu, hucha pampachaypaq ofrenda kasqanrayku.

¹²Chaytan sacerdoteman apamunqa, sacerdotetaq yuyarina ofrendamanta huk hapt'ayta hoqarinqa llapallanta Señor Diosman apamusqa kasqanta yuyarinapaq, hinaspan chayta altarpi ruphachinqa Señor Diospaq mikhuna ofrendakuna patapi. Chayqa hucha pampachaypaq ofrendan.

¹³Chhaynatan sacerdoteqa chay hina hucha pampachaypaq sacrificiota haywanqa, hinan pampachasqa kapunqa. Puchuq ofrendataqmi sacerdotepaq kanqa, ruru ofrenda hina, nispa.

¹⁴Señor Diosmi Moisesta nirqan:

¹⁵— Pipas mana yachaspa huchallikunqa ñoqapaq apamunakunata mana apamuspa chayqa, ñoqamanmi kutichipuna ofrendata apamuwanqa mana imanasqa anejota. Hayk'achus valesqanqa yupaychana karpa qolqepi chaninchasqan kanqa.

¹⁶Ñoqapaq apamunakunata hap'ikapusqantan kutichipunqa, chaymantaqmi phisqa partemanta hukninta yapaykunqa, hinaspan chayta sacerdoteman qonqa. Sacerdotetaq chay runaq huchan pampachaypaq kutichipuna ofrenda animalta haywawanqa, hinan pampachasqa kapunqa.

¹⁷Hinallataq pipas mana yachaspa huchallikunqa, mayqen kamachikusqaytapas p'akinqa chayqa, huchayoqmi rikhurinqa, pagapunqataqmi.

¹⁸Chaymi kutichipuna ofrendata sacerdoteman apamunqa mana imanasqa anejota. Hayk'achus valesqanqa yupaychana karpa qolqepi chaninchasqan kanqa. Sacerdotetaqmi hucha pampachaypaq haywawanqa mana yachaspa pantasqamanta, hinan pampachasqa kapunqa.

¹⁹Chayqa kutichipuna ofrendan, ñoqa contra huchallikusqamanta kutichipuna, nispa.