Read Diospa Simin Qelqa JEREMÍAS 13 Bible Online

JEREMÍAS 13 - Diospa Simin Qelqa bible

JEREMÍAS 13

¹Señor Diosmi niwarqan: Rispayki, linomanta p'alta chumpita rantikamuy, hinaspa chumpiykukunki, ichaqa amaraq unuman tupachinkichu, nispa.

²Ñoqataq Señor Diospa niwasqanman hina rantikamuspay chumpikurqani.

³Señor Diosqa nillawarqantaqmi:

⁴Chay rantispa chumpikusqayki chumpita aparikuspa Perat llaqtata riy, chaypitaq qaqa k'aktuman pakaykamuy, nispa.

⁵Ñoqataq Señor Diospa kamachiwasqanman hina Perat llaqtapi pakamurqani.

⁶Unay p'unchaymantañataq Señor Diosqa wakmanta niwarqan: Perat llaqtata riy, hinaspa chay pakasqayki chumpita apamuy, nispa.

⁷Ñoqataq Perat llaqtata rirqani, hallp'amanta horqoqtiytaq chumpiqa ismusqaña kapusqa, mana imapaq valeq.

⁸Hinan Señor Diosqa nillawarqantaq:

⁹Chay kasqallantapunin ismuchisaq Judapa uma hoqariq-kayninta Jerusalenpa sinchi uma hoqariq-kaynintawan.

¹⁰Kay millay llaqtaqa manapunin kamachiyta kasukuyta munapunkuchu, aswanmi millay sonqonkuq kamachisqanta ruwapushanku, wak dioskunatataq servispa yupaychashanku, chay ismusqa p'alta chumpi hinan mana imapaq valeq kanku.

¹¹Imaynan chumpiqa ñañu wasata mat'iykun, chay hinatan ruwarqani Israel llaqtata Judá llaqtatawan ñoqaman k'askasqa kawsanankupaq. Ñoqaqa munarqanin paykuna llaqtay kananta, hatunchaqniy kananta, yupaychaqniy kananta, qhapaqchaqniy kanankutawan, paykunataq ichaqa mana uyariwarqankuchu, nispa. Ñoqa Señor Diosmi chayta nini.

¹²Nillankitaq paykunata, Israelpa Diosnin Señormi nin: Llapa mak'asmanmi vinota hunt'achinqaku, nispa. Israel runakunataqmi nisunki: ¿Kunallanraqchu uyarikushan mak'asman vino hunt'achinari? nispa,

¹³niqtinkun, qan kutichinki, Señor Diosmi nin: Llapan kay suyupi kaq runakunatan macharqarichisaq, Davidpa kamachikuy tiyananpi tiyaq reytapas, sacerdotekunatapas, profetakunatapas, Jerusalenpi llapan tiyaqkunatapas.

¹⁴Chaymantataqmi mak'asta hina paykunapurata takanachispa p'akisaq, taytanta churintawan. Manapunin pitapas khuyapayasaqchu, llapallantapunin chhallusaq, nispa. Ñoqa Señor Diosmi chayta nini.

¹⁵Israel runakuna, ¡Señor Diosmi rimanña! ¡Amapuni umata hoqariychischu! ¡Allintapuni uyariychis!

¹⁶Hatunchaychis Diosniykichis Señor Diosta manaraq tutayachimushaqtin, qankunaqa misk'akuwaqchismi tutayaq orqokunapi. Yupaychaychis Diosniykichis Señor Diosta suyakusqaykichis sumaq k'anchayta manaraq laqhayaqman tukuchispa llanthuykachimushaqtin.

¹⁷Manataqchus qankuna kasukunkichis chayqa, pakallapin waqasaq uma hoqariq kasqaykichismanta. Ñawiymantan weqe unu surunqa, sonqoy lloqsinankaman waqaykusaq Señor Diospa llaqtan apasqa kasqanmanta.

¹⁸Reyta, maman reinatawan niy: Kamachikuy tiyanamanta uraykuychis, pampapi tiyaykuychis, ñan umaykichismanta pilluykichis urmaykunña, sumaq k'achanchaq coronaykichispas urmaykunña.

¹⁹Neguev ch'inneqpi llaqtakunapas awqanpa muyuykusqanñan kashan, manañan pipas haykunmanñachu. Llapanñan Judapas pichaspa apasqaraq kapushan, wak suyuman pasaq apasqan kapushan, nispa.

²⁰¡Yaw, Jerusalén, ñawiykita kichariy! ¡Qhawariy wichaymanta awqaq hamusqanta! ¿Maytaq michinaykipaq qosqay ovejakunari? ¿Maytaq chay allichachaq t'aqa ovejaykunari?

²¹¿Ima ninkitaq qanpa “reqsisqaymi” nisqayki runakuna qanta atipaspa kamachiqniyki kapuqtinkuri? ¿Manachu wachakuq warmita hina chaymanta nanay hap'isunki?

²²Ichapaschá ninki: ¿Imanaqtinmi kaykuna kawan? nispayki. Chaykunaqa hatun huchaykikunamantan kasunki, Chayraykun polleraykita q'allparqasunkiku, hukkunaq violasqantaq karqanki.

²³¿Yana runaq yana-kaynin yuraqyanmanchu? ¿Leopardoq alqa-kaynin chinkanmanchu? Qankunapas millay ruwayta yachaykuspari, ¿allinkaq ruwayta atiwaqchisñachu?

²⁴Chayraykun qankunata ch'eqechisqaykichis ch'inneq wayra ichhu q'opata apashaq hinataraq.

²⁵Chay hina ruwasqan qanpas kanki, chay hina kanaykin chayamushasunki, ñoqata qonqapuwasqaykimanta yanqa dioskunaman sonqollikusqaykimanta. Ñoqa Señor Diosmi chayta nini.

²⁶Ñoqapas polleraykitan q'allparparisqayki uyayki pakaqtaraq q'ala-kayniykita rikunankupaq.

²⁷Ñoqan rikuyki millakusqay huchakuna ruwashaqta, orqokunapin pampakunapin rikuyki wasanchashawaqta, uywa hina mana p'enqakuspa hucha ruwashaqta, qhelli huchapi purishaqta. ¡Imaraqmi qanmanta Jerusalén! ¿Hayk'aqkamataq mana ch'uyanchakunkichu? nispa.