Read Diospa Simin Qelqa JEREMÍAS 18 Bible Online

JEREMÍAS 18 - Diospa Simin Qelqa bible

JEREMÍAS 18

¹Señor Diosmi niwarqan:

²Manka ruwaqpa wasinta riy, chaypitaq huk willakuyta nimusqayki, nispa.

³Ñoqataq manka ruwaqpa wasinman rispa, torno patapi manka ruwashaqta tarimurqani.

⁴Sapa kuti manka ruwasqan mana allin lloqsiqtinmi, manka ruwaqqa wakmanta t'uruta huñurqospa mosoqmanta mankata ruwarqan, imaynatachus munasqanman hina.

⁵Hinan Señor Diosqa niwarqan:

⁶Israel runakuna, ¿manachu ñoqapas kay manka ruwaq hina qankunata ruwayta atiyman? Qankunaqa manka ruwaqpa makinpi t'uru hinan makiypi kashankichis.

⁷Hayk'aqchá munasaq hinan huk llaqtata huk suyutapas nisaq: T'irasqaykin, thunisqaykin, chaqosqaykin, nispa.

⁸Ichaqa chay suyuchus mana allin ruwasqankunata saqepunqa chayqa, yuyaykusqaytaqa manan hunt'asaqñachu.

⁹Hayk'aqchá munasaq hinan huk suyuta huk llaqtatapas nisaq: Sayarichisqaykin perqasqaykin, nispa.

¹⁰Ichaqa chay suyuchus mana allinta ruwanqa chayqa, kunkaytapas mana uyarinqachu chayqa, allin ruwanaypaq yuyaykusqaytaqa manañan hunt'asaqñachu.

¹¹Chay hinaqa, Judá runakunata Jerusalenpi tiyaqkunata niy, Señor Diosmi nin: Qankuna contran yuyaykuni mana allinniykichista ruwanaypaq. Chayrayku sapankaykichis mana allin kawsayniykichista saqepuychis, aswanpas sapankaykichis kawsayniykichista t'ikraychis allin kaqta ruwanaykichispaq, nispa.

¹²Paykunataq ichaqa nisunkiku: ¡Ama p'unchayniykita usuchikuychu! Ñoqaykuqa munasqaykuman hinallapunin purikusaqku, imaynatachus sonqoykuq munasqanman hinallapunin ruwasaqku, nispanku.

¹³Chayraykun Señor Diosqa nin: Tapurikuychis suyukunata. ¿Pillapas uyarirqanchu Israelpa ruwasqanta hina ruwaqta? nispa. Munasqay doncella sipas Israel llaqtan hatun millayta ruwaykapurqan.

¹⁴¿Líbano orqoq k'awchin ranrakunapi rit'iqa chinkanmanchu? ¿Karu orqomanta phawamuq unuqa ch'akimunmanchu?

¹⁵Llaqtaymi ichaqa qonqapuwarqan mana valeq idolokunaman inciensota q'apachispa. Purinanku ñawpa ñanta chinkachispan pantapurqanku, hinaspan mana reqsisqanku ñanninta purishanku.

¹⁶Ahinatan suyunkuta mancharikuyman tukuchinku, runakunaq qhawarparinanmanpuni tukuchinku. Qayllanta lliw puriqkunapas mancharisqan umankuta maywirikunqaku.

¹⁷Imaynan inti lloqsimuy lado rupha wayra wayramuspa q'osñitaraq sayarichin, chay hinatan awqanpa ñawpaqenta Israelta phawachisaq. Qheparparipusaqmi mana qhawarispa hatun llaki p'unchay chayamuqtinpas, nispa.

¹⁸Chaymantataq runakunaqa nirqanku: — ¡Hamuychis rimanakusun Jeremías contra! Manan faltanqachu yachachiqninchis sacerdotekuna, yuyaychaqninchis yuyaysapakuna, Diospa simin sut'inchawaqninchis profetakunapas. Wañuchinapaq huchachasunchis, amataq ima nisqantapas kasusunchischu, nispa.

¹⁹¡Señor Diosníy, uyariykuwaypuni! ¡Willakusqayta uyariykuwaypuni!

²⁰¿Chaninchu allinman mana allinwan kutichiy? Paykunaqa urmaykunaypaqmi hatun t'oqota ruwarqanku. Yuyariy, qanman qayllaykamuspaymi paykunaq allinninpaq rimapayarqayki, phiñakuspayki ama paykunata muchuchinaykipaq.

²¹Kunantaq ichaqa saqerpariy, hina churinkupas wañuchun yarqaymantapas espadawan wañuchisqapas. Hina warminkupas mana wawayoq viuda kachun, hina qharinkupas hatun onqoypi wañuchun, hina waynankupas awqa-tinkuypi wañuchun.

²²Hatun t'oqotan ruwarqanku hap'iwanankupaq, toqllatan purinayman churarqanku, chayrayku qonqaylla paykunaman kachaykamuy huk t'aqa llat'anaq suwakunata. ¡Hina qaparishachunku manchakuymanta!

²³Señor Diosníy, qanmi yachanki llapan yuyaykusqankutaqa, wañuchiwanankupaq yuyaykusqankutapas. ¡Amapuni mana allin kayninkutapas pampachaychu! ¡Amapuni huchankutapas qonqaychu! ¡Qanpa ñawpaqeykipipas urmachiypuni, phiñakuyniykipipas ñak'arichiypuni! nispa.