Read Diospa Simin Qelqa JEREMÍAS 2 Bible Online

JEREMÍAS 2 - Diospa Simin Qelqa bible

JEREMÍAS 2

¹Señor Diosmi niwarqan:

²Riy, Jerusalén llaqtapi tiyaq runakunaman kayta willamuy: Yuyarinin sipas kashaspayki ñoqa sonqo kasqaykita, yuyarinin casarakusqanchis p'unchay munakuwasqaykita. Ch'in pampantan qatikamuwarqanki, mana ima mikhuypa wiñanan hallp'antan qatikamuwarqanki.

³Israelqa, ñoqapaq t'aqasqapunin karqan, llank'asqaypa ñawinninmi karqan. Piña llamiykusuqtiykipas ñoqan muchuchirqani. Ñoqa Señor Diosmi chayta nini.

⁴Jacobpa wawankuna, Señor Diospa siminta uyariychis, llapan Israel ayllukuna, Señor Diospa kunkanta uyariychis.

⁵Paymi nisunkichis: ¿Ima mana allintan ñawpa taytaykichiskuna ñoqapi tarirqanku? ¿Imanaqtinmi ñawpa taytaykichiskuna saqepuwarqanku? Paykunaqa mana valeq dioskunatan yupaycharqanku, paykuna kikinkun mana valeq kapurqanku.

⁶Paykunaqa manan nirqankuchu: ¿Maypitaq Señor Diosninchisri? ¿Maypitaq Egiptomanta horqomuwaqninchisri? ¿Maypitaq ch'in pampanta pusamuwaqninchisri? Paymi aqo-aqo pampanta wayq'okunanta pusamuwaqninchisqa, paymi mana k'atay unuyoq manchakuy hallp'anta pusamuwaqninchisqa, paymi mana runaq tiyanan hallp'anta mana piqpa purinanta pusamuwaqninchisqa. ¿Maypitaq payri? nispallapas manan nirqankuchu.

⁷Ñoqan pusamurqaykichis imaymana mikhuypa wiñanan hallp'aman, allin rurukunata mikhunaykichispaq. Qankunataq ichaqa chayamuspa hallp'ayta qhellicharqankichis, hallp'ayta millay-kayniykichiswan waqllichirqankichis.

⁸Sacerdotekunapas manan nirqankuchu: ¿Maypitaq Señor Diosninchisri? nispaqa. Kamachikuy simi yachachiqkunapas manan reqsiwarqankuchu, umallikunapas contraypin sayarirqanku, profetakunapas Baal diosninkuq sutinpin rimarqanku, yanqa idolokunatan yupaycharqanku.

⁹Chayraykun ñoqa Señor Diosqa nini: Ñoqan qankunata huchachasqaykichis, mirayniykichispa mirayninkaman huchachashallasqaykichispuni.

¹⁰Riychis inti haykuy lado islakunata tapukuq, inti lloqsimuy ladopi Cedar runakunaman kachaychis kawsayninku tapupakuqta, icha tarimunkichischus qankunaq ruwasqaykichis hina ruwayta.

¹¹Paykunaq diosninkuqa yanqa diosllaña kashan chaypas, ¿hayk'aqtaq diosninkuta saqespa wak diosta maskhanku? Llaqtaymi ichaqa ñoqata wikch'upuwarqanku, Qhapaq-atiyniyoq Diosninku kashaqtiy, mana imapaq valeq idolokunatataq yupaycharqanku.

¹²Hanaq pacha, chaykunamantaqa mancharikuychis, llaksasqa khatatataychis. Ñoqa Señor Diosmi chayta nini.

¹³Llaqtayqa iskay rikch'aqtan huchallikurqan, kawsay unu pukyunku kashaqtiymi wikch'upuwarqanku, paykuna kikinkun wak pukyuta hasp'ikurqanku, mana unuq takyanan t'oqota. Ñoqa Señor Diosmi chayta nini.

¹⁴Señor Diosmi nin: Israelqa manan kamachichu, Israelqa manan kamachi-kaypichu paqarirqan, chayri, ¿imanaqtintaq Israelta awqankunari llat'anarqan?

¹⁵Leonkuna hinaraqmi paykunaman phawaykurqanku, manchakuytaraq qaparkachaspa. Suyuntapas raqay-raqaytan wikch'urqanku, ninawan kanaykuspan llaqtankutapas thunirqanku, manataq pillapas chaypiqa tiyarqanñachu.

¹⁶Menfis runakunan Tafnis runakunapiwan umaykita p'aqlarqasunkiku.

¹⁷Ñoqata wikch'upuwasqaykimantan chaykunaqa kasunki ñoqa Diosniyki Señor Dios kashaqtiy, ñanpipas pusamuqniyki kashaqtiy.

¹⁸Kunanri, ¿imanaqtintaq Egiptoman riyta munanki? ¿Nilo mayu unu ukyaqchu? ¿Imanaqtintaq Asiriatapas riyta munanki? ¿Eufrates mayu unu ukyaqchu?

¹⁹Qan kikiykiq mana allin ruwasqaykin muchuchisunki, qanpa wikch'upuwasqaykin huchachasunki. Ñoqa Diosniyki Señor Diosta saqerpariwasqaykichisqa, mana manchakuwasqaykichispas sinchi mana chanin hayaraqmi, chayta reparay. Ñoqa Tukuy-atiyniyoq Señor Diosmi chayta nini.

²⁰Señor Diosmi nin: Unaymantapuniñan ñoqa contraqa sayarirqanki, ñoqa kasuytapas manan munarqankichu: Manan kamachiykita ruwaymanchu, niwarqankin. Hinantin hatun orqo patakunapin, llapa q'omer sach'aq llanthunkunapin, qhelli huchapi puriq warmi hina huchallikurqanki.

²¹Ñoqaqa allin muhuchasqa uvasta hinan plantarqayki, llapanmanta aswan allinnin uvas muhuta hina, qantaq waqllispa k'ita uvas sach'aman tukupunki.

²²Lejiawanña maqchikunki chaypas, askha jabonwanña maqchikunki chaypas, ñoqaqa rikushallasaqpunin huchaykiq qhellichasqantaqa. Ñoqa Señor Diosmi chayta nini.

²³¿Imaynataq ninki: Manan qhellichakurqanichu, manan Baal dioskunatapas yupaycharqanichu, nispari? ¡Yuyarikuyyá wayq'opi huchallikusqaykita! ¡Reparakuyyá llapan ruwasqaykita! Qanmi kanki china camello hina phawaykachaq, chharqonayakuspa mana qasiq hina.

²⁴Salqa china asnoqa ch'in pampamanmi phawarikapun, orqo asnota muskhipakuspa. Chharqonayachikushaqtinqa manan pipas hark'ayta atinmanchu, orqo asnopaqqa manan sasañachu, paymantakaman chharqochikuq chimpan.

²⁵Yaw, Israel, ama chakiykita thantakuychu q'ala chaki phawaykachaspa, ama munaychu tonqoriykiq ch'akirqonanta. Qantaq ninki: ¡Manan imananpaschu! Wak dioskunatapunin munakuni, paykunawanmi ripusaq, nispa.

²⁶Imaynan suwaqa tariparqoqtinku p'enqakun, chay hina p'enqasqan Israelqa rikukunqa, runakunapas, reykunapas, umallikunapas, sacerdotekunapas, profetakunapas.

²⁷Paykunan huk k'aspita ninku: Taytaykun kanki, nispa. Qaqatapas: Mamaykun kanki, nispa. Ñoqatataq ichaqa wasancharpariwanku, manataq kutirimuwarqankuchu, hatun llakipi rikukuspankun ichaqa niwanku: ¡Hamuy! ¡Qespichiwayku! nispa.

²⁸Yaw, Judá, ¿maytaq ruwakusqaykichis dioskunari? Qankunaqqa llaqtaykichisman hinan askha diosniykichis, paykuna hamuchunku, sut'is horqoyta atisunkichis, hatun llakikuy aypamusuqtiykichis.

²⁹¿Imapaqmi contraypi rimakuwankichis, llapaykichisña mana kasushawaspaykichisqa? Ñoqa Señor Diosmi chayta nini.

³⁰Yanqanpaqmi wawaykichistapas hasut'isqani, manan wanankupunichu. Qankuna kikiykichistaq phiña león hina profetaykichiskunatapas wañuchirqankichis.

³¹Qankuna, kunan miraykuna, ñoqaq nisqayta allinta uyariwaychis, ñoqari, ¿ch'usaq pampachu qan Israelpaq karqani? Ñoqari, ¿llanthuq pakasqan hallp'achu qanpaq karqani? ¡Manan, llaqtalláy! Chayri, ¿imanaqtintaq ninkichis: Kacharisqan kayku. Manan hayk'aqpas qanman kutirimusaqkuñachu, nispa?

³²¿Huk sipas qonqanmanchu imaymanawan k'achanchakunanta? ¿Huk warmi qonqanmanchu casarakuspa sumaq p'achakusqanta? Llaqtaymi ichaqa unayña ñoqata qonqapuwan.

³³Qhari sonqo kaspaykin qanqa yachanki wak munaqniykikuna maskhakuyta, qanmantan qhelli huchapi puriq warmikunapas aswantaraq yachaqakunku.

³⁴Qanpaqa p'achaykikunapas ch'eqchillañan kashan mana huchayoq wakchakunaq yawarninwan, chay yawarqa manan wasiykiman suwakuq haykumuqpa yawarninchu.

³⁵Chaytukuywanpas ninkiraqtaq: Mana huchayoqmi kani, manan Diosqa ñoqapaqqa phiñakunmanchu, nispa. Qhawariy: Manan huchayoqchu kani, nisqaykimantan kunan qanta huchachasqayki.

³⁶Qankunapaqqa manan chaninchu kayman chayman yanapayta maskhaspa phawaykachay, Egiptopas p'enqaymanmi churasunki, imaynan Asiriapas p'enqayman churarqasunkiña hinata.

³⁷Egiptomantaqa kutirqamunki sinchi p'enqasqallañan, ñoqa Señor Diosmi pisichaniña hap'ipakusqayki runata, manataqmi ima allintapas tarinkichu reqsinakusqaykimanta, nispa.