Read Diospa Simin Qelqa JEREMÍAS 21 Bible Online

JEREMÍAS 21 - Diospa Simin Qelqa bible

JEREMÍAS 21

¹Rey Sedequiasmi Malquiaspa churin Pasurta, Maasiaspa churin sacerdote Sofoniastawan Jeremías valekuqta kacharqan:

²Ama hinachu kay, Señor Diosta tapuykapuwayku, Babilonia suyu rey Nabucodonosormi ñoqaykuwan maqanakuyta qallarimushan. Ichapaschá Señor Dios munanman ima musphanata ruwaspapas Nabucodonosorta qhepaman kutichiyta, nispa. Hinan Señor Diosqa Jeremiasman rimaykurqan,

³chaymi Jeremiasqa Sedequiaspa kachamusqankunaman kutichirqan:

⁴Sedequiasta niychis, Israelpa Diosnin Señormi nin: Ñoqan soldadoykichiskunata qhepaman kutichisaq Babilonia runakunawan Caldea runakunawan maqanakushaqtiykichis llaqta ukhuman kaqta kutiykunaykichiskama.

⁵Ñoqapas contraykichismi maqanakuq sayarisaq mana atipay atiyniywan sinchi k'arak phiñasqapuni.

⁶Kay llaqta runakunataqa uywakunatapas llapantapunin k'iriykusaq, hatun onqoypitaq wañunqaku.

⁷Hatun onqoypi, maqanakuypi, yarqaypipas mana wañuqkunatataqmi, Judá suyu rey Sedequiastawan, oficialninkunatawan hap'iykachisaq Nabucodonosorman wañuchiy munaq awqankunamanwan. Hinan payqa llapantapuni espadawan wañuchinqa mana khuyapayaspa, mana llakipayaspa, nispa. Ñoqa Señor Diosmi chayta nini.

⁸Señor Diosmi Jeremiasta nillarqantaq, runakunata niy: ¡Qhawariychis! Ñoqan ñawpaqeykichisman churani kawsaytawan wañuytawan qankunaq akllakunaykichispaq.

⁹Pillapas kay llaqtapi qhepaqqa wañunqapunin maqanakuypipas, yarqaypipas, hatun onqoypipas. Aswanpas paymantakama muyuykuqniykichis Babilonia soldadokunaman chimpakapuqqa kawsaynintan qespichikunqa.

¹⁰Ñoqaqa kay llaqtata qhawarini awqaypas kanman hinatan, manan ima allintapas qosaqchu, aswanmi mana allinllatapuni qosaq. Llaqtaqa Babilonia reyman hap'iykachisqan kanqa, paytaq kanaykapunqa, nispa.

¹¹Judá reypa ayllunkuna, Rey Davidpa mirayninkuna Señor Diospa nisqanta uyariychis:

¹²Chanin kaqta sapa p'unchay ruwaychis, runaq kallpan suwakuqkunamanta sarunchasqakunata kacharichiychis, paqtataq qankunapaq phiñakuyniy rawrarinman mana thaniy atiytaraq, mana allin ruwasqaykichismanta.

¹³Yaw, Jerusalén, qanpa contraykipin sayarini, qanmi wayq'ontin kamachiq kanki, qanmi pampapi hatun qaqa hinaraq kanki. Qankunataq ninkichis: ¿Pitaq atinman ñoqanchiswan maqanakuq phawaykamuytari? ¿Pitaq atinman pakakunanchiskunaman haykumuytari? nispa.

¹⁴Ñoqaqa ñak'arichisqaykichis ruwasqaykichisman hinan, mallki-mallkiykichistan ninawan hap'iykachisaq, chay ninataqmi tukuy hinantinta ruphaykunqa, nispa. Ñoqa Señor Diosmi chayta nini.