Read Diospa Simin Qelqa JEREMÍAS 22 Bible Online

JEREMÍAS 22 - Diospa Simin Qelqa bible

JEREMÍAS 22

¹Señor Diosmi niwarqan: Reypa wasinta rispa kay willakuyta willamuy,

²Davidpa kamachikuy tiyananpi tiyashaq Judá reyman, oficialninkunaman, reypa wasin punkunta haykuq runakunamanwan, Señor Diospa siminta uyariychis, nispa.

³Señor Diosmi nin: Allinta ruwaychis chaninchaychispas, runaq kallpan suwakuqpa atiyninmanta sarunchasqata hoqariychis, ama ima mana allintapas ruwaychischu, amallataq k'iriychischu wak llaqtayoqkunatapas, wakcha wawakunatapas, viudakunatapas. Ama wañuchiychischu mana huchayoqkunatapas.

⁴Kay kamachisqayman hinachus kawsankichis chayqa, kallanqapunin Davidpa kamachikuy tiyananpi tiyaq reykuna. Paykunan oficialninkunantin runankunantin qhapaq wasiq punkunta haykunqaku carretapi caballopi ima.

⁵Ichaqa kay kamachisqayta mana kasuwankichischu chayqa, ñoqa Señor Diosmi jurani kay qhapaq wasiq raqay-raqayman tukupunanpaq, nispa.

⁶Señor Diosmi Judá reypa ayllunta nin: Galaad orqo hinan qanqa ñoqapaq kanki, Libanoq k'awchin hinan qanqa ñoqapaq kanki, ichaqa juranin qanta purunyachinaypaq, ñawpa llaqta chiriyasqata hina ruwanaypaq.

⁷Hachantin runakunatan kachamusaq qanta chaqonasuykipaq, munay sumaq cedro sach'aykichistan wit'unqa, ninawantaq kanaykunqa, nispa.

⁸Chaymantataqmi chay llaqtanta purispa hinantin suyu runakuna tapunakunqa: ¿Imanaqtintaq Señor Diosqa kay hatun llaqtatari kay hinata ruwarqan? nispa.

⁹Kutichinqakutaq: Diosninku Señor Dioswan rimanakusqankuta mana hunt'aspan wikch'upusqaku, hinaspan wak dioskunata yupaychapusqaku servipusqaku ima, chaymantan khayna kapurqanku, nispanku.

¹⁰Ama waqaychischu rey Josiasmantaqa, ama llakikuychischu wañusqanmantaqa. Aswanpas churin Salummanta khuyayta waqaychis, payqa mana kutimuqllañan ripushan, payqa manapuniñan paqarisqan hallp'amanqa kutimunqañachu.

¹¹Judá rey Josiaspa churin Salummi taytanpa rantinpi rey karqan. Paymantaqa Señor Diosmi nin: Kay suyumanta lloqsipuspan manaña kutimunqañachu,

¹²aswanmi kamachipaq apasqa llaqtapi wañunpunqa, manañataq kay suyutaqa rikunqañachu, nispa.

¹³¡Ikiraqmi runaq kallpanta suwakuspa wasinta ruwakuqqa! Paymi altos wasikunata ruwakun runata mana allinta ruwaspa, paymi yanqallan llank'achikun llaqtamasinwan, manataq llank'asqanmanta qopunchu.

¹⁴Paymi nin: Hatun wasita ruwakusaq, patanpi hatuchaq wasikunayoqta, nispa. Ventanakunatapas kicharqarin, perqantapas cedro tablawan qatarqon, pukawantaq llunch'irqon.

¹⁵¿Qan yuyankichu rey kayqa cedro tabla chawpipi tiyay kasqanta? Taytaykiqa allintan mikhurqan, ukyarqan, allintataqmi ruwarqanpas, chanincharqanpas, chayraykun tukuy imakunapas allinkama karqan.

¹⁶Wakchakunamantawan pisichasqakunamantawanmi payqa sayarikuq, chaymi allinkama ima ruwasqanpas karqan. Chaykuna ruwaqmi ñoqa reqsiqqa.

¹⁷Qanmi ichaqa, qan kikillaykipaq imatapas yuyapakunki mana chaninwan imapas tarinaykita. Mana huchayoqkunatan wañuchinki, llaqtaykitan sarunchanki, kallpantapas suwakunki. Ñoqa Señor Diosmi chayta nini.

¹⁸Chayraykun Judá rey Josiaspa churin Joacimmanta Señor Diosqa nin: Manan pillapas wañusqanmanta waqaq kanqachu, manapunin pillapas waqaspa niq kanqachu: ¡Ikiraqmi wawqelláy! ¡Imaraqmi panalláy! ¡Ikiraqmi wiraqocháy! ¡Imaraqmi reyníy! nispa.

¹⁹Wañusqa asnota hinan hawaman aysarparinqaku, Jerusalenpa qhepanmanmi wikch'umunqaku, nispa.

²⁰Líbano orqoman seqay, chaymanta waqyakamuy, Basán hallp'api qaparkachamuy, Abarim orqo-orqomanta waqyakamuy, yanapaqniykikunaqa llapanmi atipasqaña.

²¹Ñoqaqa rimapayarqayki allinraq kashaqtiykin, qantaqmi ichaqa: ¡Manan uyariykimanchu! niwarqanki. Wayna kasqaykimantapachan ahinallatapuni ruwaq kanki, rimasqaytaqa manapunin uyariqchu kanki.

²²Wayran apapunqa llapan umalliykikunata, yanapaqniykikunataqmi preso apasqa ripunqaku. Chay hinaqa, p'enqasqa llakikuypin qhepakapunki millay ruwasqaykikunamanta.

²³Kunanmi qanqa kusisqa q'esaykipi tiyashanki, Libanomanta apamusqa cedrowan qatasqa wasipi tiyashanki, ichaqa imaynataraqmi qaparinki nanay chayamusuqtiyki, wachakuy nanay hinaraqmi kanqa, nispa.

²⁴Señor Diosmi nin: Ñoqa kikiypa sutiypin jurani, hinaña Judá rey Joacimpa churin Conías kanman paña maki dedoypi selloyoq anilloy chaypas, horqokuspaymi

²⁵qoykiman, qanpa manchakusqayki awqaykiman, pikunachus wañunayki munaq runakunamanpas, Babilonia rey Nabucodonosormanpas, Caldea runakunamanpas.

²⁶Qantan mamaykitawan wikch'usqaykichis mana paqarisqayki wak suyuman, chaypitaqmi wañupunkichis.

²⁷Kutimuy munasqaykichis llaqtamanqa manapuniñan kutimpunkichisñachu, nispa.

²⁸¿Wikch'usqa mankachu Coniasqa? ¿Mana piqpa munasqan k'arpachu payqa? ¿Imanaqtintaq payqa wawakunantin mana reqsisqa suyuman wikch'usqa?

²⁹¡Kay pachantin llaqtakuna, uyariychis Señor Diospa siminta!

³⁰Kay runaq wawanqa manan hukllapas Davidpa kamachikuy tiyananpi tiyaykunqachu, Judapi wakmanta rey kananpaq, chayrayku, kay runata qelqaychis mana wawayoqta hina, kawsayninpi qaqapaq runata hina. Ñoqa Señor Diosmi chayta nini.