Read Diospa Simin Qelqa JEREMÍAS 40 Bible Online

JEREMÍAS 40 - Diospa Simin Qelqa bible

JEREMÍAS 40

¹Guardiakunaq umallin Nabuzaradanpa Jeremiasta Ramá llaqtapi kacharisqan qhepatataq, Señor Diosqa Jeremiasta rimaykurqan. Nabuzaradanmi Jeremiasta tarirqan fierro cadenawan watasqata, Babiloniaman kamachi-kaypaq Jerusalenmanta Judamantawan runakuna ukhupi kashaqta.

²Nabuzaradantaq Jeremiasta wakneqman pusarispa nirqan: — Señor Diosniykiqa hatun llakiq kay llaqtata pasanantan unancharqan,

³kunanmi kikin Señor Diosqa hunt'an chay unanchasqanta. Qankunaqa Señor Dios contran huchallikurqankichis, manataq kasurqankichischu, chaymantan kaykuna kasunkichis.

⁴Kunanmi chay fierro watanawan watasqasuykita makiykimanta paskashani. Ñoqawanchus Babiloniaman ripuyta munanki chayqa, haku, haqaypiqa ñoqan uywamusqayki. Mana riyta munanki chaypas, qhepakullankin. Kayqa llapan suyuntinmi purikunaykipaq kashan. Akllarikuy mayqentachá munanki chayta, nispa.

⁵Manaraq kutirishaqtinmi nillarqantaq: Safanpa churin Ahicampa churin Gedaliaspata kutipullay. Paytan reyqa Judá llaqtakuna kamachiqta churarqan, paywan tiyakamuy llaqtayki runa ukhupi. May munasqaykita riyta munanki chaypas rillankin, nispa. Chaymantataq Jeremiasmanqa regalokunata mikhunatawan qoykurqan, hinaspan kacharparipurqan.

⁶Hinan Jeremiasqa Mizpa llaqtaman rirqan Gedaliaswan tiyakuq, chaypin tiyarqan suyuntinmanta qhepaq runakunawan.

⁷Judá campokunapi qhepaq soldadokunataq umallinkunantin uyarirqanku Babilonia reypa Judá suyuman Ahicampa churin Gedaliasta kamachikuqpaq churasqanta, hinallataq uyarirqanku Babiloniaman mana apasqa wakcha qharikunapas, warmikunapas, erqekunapas Gedaliaspa munayninpi kasqankuta.

⁸Hinan umallikunaqa runakunantin Gedaliaswan tupaq Mizpa llaqtata rirqanku. Chaykunataq karqanku: Netaniaspa churin Ismael, Careaq churinkuna Johanán, Jonatanpiwan, Tanhumetpa churin Seraías, Netofa llaqtayoq Efaipa churinkuna, Maaca llaqtayoq runaq churin Jezaniaspiwan.

⁹Gedaliastaq juraspa paykunata nirqan: — Ama Caldea runakuna serviytaqa manchakuychischu. Kay suyullapipuni tiyakuychis. Babilonia reyta servinkichis chayqa, tukuy imapas allillanmi kasunkichis.

¹⁰Ñoqataqmi Mizpa llaqtapi qhepakuni qankunaq rantiykichispi Caldea runakunawan rimanaypaq, paykuna kayman hamuqtinku. Qankunaqa phawaychis, vinota, frutakunata, aceitetawan huñukamuychis, hinaspa waqaychakuychis, tiyakullaychis chay hap'ikusqaykichis llaqtakunapi, nispa.

¹¹Hinallataq Moab suyupi, Amón suyupi, Edom suyupi, wakin suyukunapiwan qhepaq judío runakuna uyarirqanku Babilonia reypa Judapi wakin runakuna saqesqanta, kaqllataq yacharqanku paykunaq kamachiqninkupaq Gedaliasta churasqanta.

¹²Chaymi hinantin suyuman ch'eqesqamanta Judaman kutimpurqanku, hinaspataq Mizpa llaqtapi tiyaq Gedaliasman huñukurqanku. Chaymantataq paykunaqa vinota frutakunatawan askhallataña huñuykukurqanku.

¹³Chaymantataq Careaq churin Johananqa llapan campokunapi qhepaq soldadokunaq umallinkunapiwan Gedaliasman Mizpa llaqtata rirqanku,

¹⁴hinaspan nirqanku: — ¿Manachu yachanki Amón rey Baalisqa Netaniaspa churin Ismaelta qan wañuchiqta kachamusqanta? nispa, niqtinkutaq Gedaliasqa mana cheqaqpaqchu hap'irqan.

¹⁵Chaymi Johananqa pakallapi Gedaliasta nirqan: — Pakallapi mana piqpa yachasqallan Ismaelta wañurqachimusaq. ¿Hinallachu qhawaykuman qanta wañuchinasuykita? Manan, chayqa kanman huñuykakamuq judío runakunata ch'eqechiymi, qhepaq judío runakunatapas ch'usaqyachiymi, nispa.

¹⁶Gedaliastaq kutichirqan: — ¡Ama imanaypaschu! Ismaelmantaqa yanqan llullakuspa ninki, nispa.