Read Diospa Simin Qelqa JEREMÍAS 43 Bible Online

JEREMÍAS 43 - Diospa Simin Qelqa bible

JEREMÍAS 43

¹Jeremiasqa Diosninku Señor Diospa willachisqanta lliwta paykunaman willayta tukuqtinmi,

²Osaiaspa churin Azariasqa Careaq churin Johananpiwan wakin k'ankaykachaq runakunapiwan Jeremiasta nirqanku: — ¡Llullakuspan chaytaqa niwankiku! Diosniyku Señor Diosqa manan chaykunata nimuy nisunkimanchu, aman Egiptoman rinkichischu, nispaqa.

³Neriaspa churin Barucmi chaytaqa tanqasunki Caldea runakunaq makinman hap'ichisqa kanaykupaq, chay hinapi wañuchisqapas suyunkuman apachisqapas kanaykupaq, nispa.

⁴Ahinapin Careaq churin Johananpas soldadokunaq umallinkunapas llapa runakunapas Señor Diospa kamachikusqanta mana kasukurqankuchu, Judapi mana tiyayta munaspanku.

⁵Aswanraqmi Johananwan soldadokunaq umallinkunapiwan Egiptoman pusarqanku Judá suyupi llapan qhepaq runakunata, hinantinman ch'eqechisqamanta tiyakapunankupaq kutimuqkunata,

⁶guardiakunaq umallin Nabuzaradanpa, Ahicanpa churin Gedaliaspa kamachinanpaq saqesqan qharikunata, warmikunata, erqekunata, reypa ususinkunatawan aparqanku, hinallataq Jeremiastapas, Baructapas aparqanku.

⁷Hinaspan Señor Diospa kamachikusqanta mana kasukuspanku, llapallanku chay runakuna Egiptoman ripurqanku, Tafnes llaqtamantaq chayarqanku.

⁸Chay Tafnespitaq Señor Diosqa Jeremiasta nirqan:

⁹— Judá runakuna qhawashaqtinmi hatuchaq rumikunata hoqarispa rey Faraonpa wasinman haykunaq ñawpaqenpi ladrillowan ruwasqa p'alta patata hasp'ispa p'ampanki.

¹⁰Hinaspan paykunata ninki, Israelpa Diosnin Tukuy-atiyniyoq Señormi nin: Babilonia rey kamachiy Nabucodonosortan pusamusaq, hinan kay p'ampasqay rumi patapi kamachikunan tiyananta karpantawan churasaq.

¹¹Pay hamuspanmi Egipto suyuman phawaykuspa chaqorqarinqa. Wañunanpaq churasqa kaqkunaqa wañullanqapunin, wak llaqtaman apanapaq kaqkunapas apasqallapunin kanqa, maqanakuypi wañunanpaq kaqkunapas maqanakuyllapipunin wañunqa.

¹²Ninawanmi kanaykunqa Egipto suyuq diosninkuna yupaychana wasikunata, paymi chay dioskunata presotapas apanqa ruphachinqapas, Egipto suyutan usantaraq pallanqa imaynan oveja michiqpas p'achanmanta oveja usata pallakun hinata, hinaspataqmi ripunqa mana piqpa imanisqan.

¹³Egiptopi kaq inti yupaychana wasipi saywakunatan thuninqa, hinallataq Egipto suyuq diosninku yupaychana wasikunatapas ninawan kanaykunqa, nispa.