Read Diospa Simin Qelqa JEREMÍAS 46 Bible Online

JEREMÍAS 46 - Diospa Simin Qelqa bible

JEREMÍAS 46

¹Hatun suyukunamanta Jeremiasman Señor Diospa nisqan:

²Egiptomantan kay hinata nirqan: Judá rey Josiaspa churin Joacim tawakaq watapiña kamachikushaqtinmi, Eufrates mayu pata Carquemispi Babilonia rey Nabucodonosorqa Egipto rey Necaoq soldadonkunata atiparqan. Kay hinatan Señor Diosqa chay soldadokunata nirqan:

³¡Escudokunata wakichikuychis! ¡Maqanakuyman usqhaychis!

⁴¡Caballokunata caronaychis! ¡Phawaqkuna sillakuychis! ¡Cascoyoqkama wachuchakuychis! ¡Lanzaykichista ñawch'iyachiychis! ¡Qara unkuykichiswan churakuychis! nispa.

⁵Ñoqa Señor Diosmi ichaqa nini: Imatachá rikushani. Manchay llaksasqan kashanku, chaymi kutirikampunku, allin qharikunan sarunchachikapunku. Mana qhepata qhawarikuspan usqhaylla ayqerikampunku. ¡Hinantinpin kashan sinchi manchakuy! Ñoqa Señor Diosmi chayta nini.

⁶Allin phawaqkunan mana atipunkuchu, allin qhari kaqkunan mana ayqeyta atipunkuchu. Wichay lado Eufrates mayu patapi misk'akuspan kumpakunku, nispa.

⁷¿Pitaq chay Nilo mayu hinaraq, sinchi phoqchiq unuyoq mayu hina hamushan?

⁸Egipton chayqa, Nilo mayu hina askha unuyoq, sinchi phoqchiq unuyoq mayu hinaraq hamushan. Egiptoqa ninmi: Wiñaspan kay pachantinman llimp'aykusaq, llaqtakunatan runantinta thunisaq, nispa.

⁹¡Caballopi soldadokuna usqhaychis! ¡Carretapi kaqkuna ñawpaychis! ¡Soldadokuna puririllaychisña, Etiopiamanta Libiamantawan soldadokunaqa escudokunawan churarqarisqan, Lidiamanta soldadokunaqa allin wach'iy yachaqkunan!

¹⁰Chay p'unchaymi ichaqa Tukuy-atiyniyoq Señor Diospa p'unchaynin, ayni-kutichinan p'unchay, awqanman ayni-kutichinan p'unchay. Saksanankaman espadaqa wañuchinqa, yawarwanpas machanankamaraq. Arí, Tukuy-atiyniyoq Señor Diosmi wichay lado suyupi Eufrates mayu patapi paykunata wañuchinqa.

¹¹Egipto llaqta doncella sipas, Galaadta wichay balsamota maskhaq. Askha hampikunawanña hampikunki chaypas yanqapaqmi kasunki, qanpaqqa manapunin hampi kanñachu.

¹²Suyukunaqa ñan yachanña k'umuykachisqa kasqaykita, llapan llaqtakunan uyarishankuña qaparisqaykita. Maqanakuqkunan paykunapura takanakuspa iskayninku pampaman urmanku.

¹³Babilonia rey Nabucodonosor Egiptoman phawaykunanpaq qayllaykushaqtinmi, Señor Diosqa profeta Jeremiasta nirqan:

¹⁴— Egiptopi kayta willaychis, Migdolpi, Menfispi, Tafnespiwan willaychis, muyuriqniykichistañan espadaqa tukurqamushan, chayrayku wakichisqallaña sayashaychis.

¹⁵¿Imanaqtinmi Apis diosniykichisqa ayqekun? ¿Imanaqtinmi toroykichisqa mana allin takyasqatachu sayan? Chaytaqa ñoqa Señor Diosmi thunirqani.

¹⁶Soldadokunan misk'akuspa urmapunku, kukkuna-kukkunataq ninakunku: Haku kaymanta llaqtanchisman kutipusun, paqarisqanchis suyunchisman, atipaq espadamanta ayqesunchis, nispa.

¹⁷Chaypin qaparirqanku: Egipto rey Faraonta sutichaychis, rimaylla-rimaq mana ima ruwaq, nispa.

¹⁸Ñoqan kawsaq Reyqa kani, sutiytaqmi Tukuy-atiyniyoq Señor Dios. Sutiypin jurani: Imaynan Tabor orqo wakin orqokunamanta aswan hatun, imaynan Carmelo orqopas lamar-qochamanta aswan hatun, chay hinan awqaqa hamunqa.

¹⁹Egiptopi tiyaqkuna, q'epiykichista wakichikuychis kamachi-kayman apachikapunaykichispaq, Menfisqa purunyapunqan, mana piqpa tiyanan ch'usaqmi kapunqa.

²⁰Egiptoqa munay wirayasqa malta wakan, ichaqa wichay ladomanta hamuspan tankayllu k'utunqa.

²¹Paywan kashaq pagasqa mink'a soldadokunapas wirayasqa torillokuna hinallataqmi, paykunapas phawashaspan kutirikampunku mana qhari hinachu sayaspanku, paykunaqqa qaqapananmi chayamun, ñak'arinanku p'unchaypiwan.

²²Egiptoqa q'osñiyoqraqmi mach'aqway hina silbakuspa ayqen, soldadokuna qayllaykamushaqtin, mallki wit'uq hina hachakunantin hamushaqtin.

²³Paykunan mallkikunata wit'unku, mana haykuy atina mallki-mallki kashaqtinpas. Langosta hina askhallañan kanku, mana piqpa yupay atinanraq. Ñoqa Señor Diosmi chayta nini.

²⁴Egipto llaqtataqmi p'enqachisqa kashan, wichay ladomanta hamuq llaqtaman hap'ichisqan kashan.

²⁵Israelpa Diosnin Tukuy-atiyniyoq Señormi nin: Ñak'arichisaqñan Tebas llaqtaq Amón diosninta, Egiptotapas llapan diosnintinta, reynintinta, Faraontapas payman hap'ipakuqkunatawan.

²⁶Wañuchiy munaq Babilonia rey Nabucodonosorpa runankunantinpa makinmanmi urmaykachisaq. Ichaqa qhepa p'unchaymanqa Egipto suyupi tiyaqqa wakmantan ñawpaq hina kanqa. Ñoqa Señor Diosmi chayta nini.

²⁷Señor Diosmi nin: Kamachiy Jacob, ama manchakuychu, Israel llaqtalláy, ama musphaychu. Qantaqa karu llaqtamantan qespichisqayki, wawaykikunatapas apasqa kasqan llaqtamantaqa horqompusaqmi. Jacobqa kutimuspa llakhillan kanqa, mana piqpa muchuchisqan allillanmi kanqa.

²⁸Kamachiy Jacob, ama manchakuychu, qanwanmi ñoqaqa kashani. Maykunamanchus qanta ch'eqechisqay suyukunatan llapanta thunisaq, qantataqmi ichaqa manaña thunisqaykichu. Chaywanpas huchaykikunamantaqa muchuchisqaykipunin ahinapi wananaykipaq, nispa.