Read Diospa Simin Qelqa JEREMÍAS 49 Bible Online

JEREMÍAS 49 - Diospa Simin Qelqa bible

JEREMÍAS 49

¹Señor Diosmi Amonmanta nin: ¿Israelqa mana churiyoqchu? ¿Israelpaqa manachu pillanpas kan? Chay hinari, ¿imanaqtintaq Amón runakunaq Milcom diosninri Gad aylluq hallp'anta hap'ikapun? ¿Imanaqtinmi Gadpa llaqtankunapi Amón runakunaqa tiyanku?

²Chayamunqan huk p'unchay, ninmi Señor Diosqa. Amón runakunaq llaqtan Rabá contra phawaykamunankupaq qaparkachasqankuta uyarichinay. Rabá llaqtaq raqay-raqayman tukupunan, muyuriq llaqtachankunapipas ninallaña rawraykapunan. Hinan Israel runakunaqa paykuna qarqoqta qarqollanqakutaq. Ñoqa Señor Diosmi chayta nini.

³¡Hesbón runakuna, qapariychis Hai llaqtaq thunikusqanmanta! ¡Rabá warmikuna, nanaymanta qaparkachaychis! ¡Qhasqa p'achawan churakuspa qhasqoykichista takakuychis! Phawaychis waq'a hina cuerpoykichista k'irikuspa, Milcom diosniykichistan karu suyuman apanqaku sacerdotentinta allichachaq runakunantinta.

⁴Yaw, mana chanin llaqta, ¿imanaqtinmi qhari-qhariman tukunki? Kallpaykiqa pisi-pisimantan chiriyashanña, huñusqayki qhapaq kayniykipi suyakuspan ninki: ¿Pitaq atinman ñoqa contra hamuyta? nispayki.

⁵Allinta yachakuy, hinantinmanta kachaykamuspan q'aqchasqaykichis, sapankaykichismi mana qhawarikuspa phawarikapunkichis, manañataqmi kanqachu wakmanta huñuykuqniykichis.

⁶Chaymantañan ichaqa Amón suyuta wakmanta t'ikarichisaq. Ñoqa Señor Diosmi chayta nini.

⁷Tukuy-atiyniyoq Señor Diosmi Edommanta nin: ¿Manañachu Temanpi yachayniyoqqa kan? ¿Manañachu yuyaysapakunaqa yuyaychayta atin? ¿Yachayninchu waqllirqapun?

⁸Dedanpi tiyaqkuna, Esaú llaqtataqa thunisaqñan, muchuchinay p'unchaymi chayamushan, chayrayku kutirispa ayqekuychis, qaqa wasikunapi pakakamuychis.

⁹Uvasta pallaqkunapas wakin uvas ch'ampataqa saqenmi. Tuta suwa hamuspapas ima munasqallantan apan.

¹⁰Ñoqan ichaqa Esaú llaqtata ch'usaqta ruwasaq, tarisaqmi pakakunanku cheqastapas, manapuniñan pakakuyta atinqakuchu. Wawanku, ayllunku, wasi-masinkupas llapallanmi thunisqa kanqa. Manan pipas ninqañachu:

¹¹Wakcha wawaykikunata saqeway, uywapushasqayki, viudaykikunatapas ñoqaña qhawaripushasqayki, nispa.

¹²Señor Diosmi nin: Phiñakuyniywan hunt'aykusqa vasomanta manaña ukyananpaq kaqpas ukyanmi, ¿chaychu qanqa chay vasomanta mana ukyawaq? Manapunin hinallaqa kawaqchu, aswanpas ukyankipunin.

¹³Ñoqa Señor Diosmi sutiyrayku jurani: Bosra llaqtapas purunyachisqan kanqa, hinallataq k'amisqa ñakasqa llaksakuyraq kanqa, llapan llaqtakunapas lliwpunin purunyapunqa, nispa.

¹⁴Señor Diosmantan willakuyta uyarini, huk willakuqmi suyukunaman willamunanpaq kachasqa: ¡Huñukuychis! ¡Edom contra puririychis! ¡Sayarispa maqanakuq phawariychis! nispa.

¹⁵Ñoqan lliw llaqtakunamanta aswan huch'uyman tukuchisqayki, llapan runakunaq pisichasqantaq kanki.

¹⁶Yaw, qaqa k'akllukunapi tiyaqkuna, uyariychis qaqa ñawch'ikunapi tiyaqkuna, wak runakuna manchachiq kasqaykichiswanmi uma hoqariq kasqaykichispiwan q'otuchikurqankichis. Hinaña anka hina sinchi alto ranrapi tiyankichis chaypas, chaymantan urmaykachimusqaykichis. Ñoqa Señor Diosmi chayta nini.

¹⁷Señor Diosmi nillantaq: Edompa thunikuyninqa sinchi mancharikuymi kanqa. Lliw chayninta puriqkunan muchusqanta rikuspanku manchakuymanta: ¡Ay, imaraqmi, ikiraqmi! ninqaku.

¹⁸Sodoma llaqta Gomorra llaqta muyuriqninpi llaqtakuna hinan thunisqa kapunqa. Manan pipas chaypi tiyanqañachu, manataqmi wasichakunqapaschu. Ñoqa Señor Diosmi chayta nini.

¹⁹Jordán mayu pata sach'a-sach'amanta q'achu-q'achuman lloqsiq león hinan Edom suyu runakunata hallp'ankumanta qatirparisaq kaq ratopacha, pi munasqaytataq rantinpi churasaq. ¿Pin ñoqa hina kanman? ¿Pin ñoqawan churanakunman? ¿Mayqen michiqmi hark'ayta atiwanman?

²⁰Chayrayku uyariychis ñoqa Señor Diospa Edom contra yuyaykusqayta, Temanpi tiyaqkuna contra unanchasqayta: Huch'uy uñakunatapas aysanqakun, waylla-wayllatapas chaqonqakun.

²¹Edompa thunikuyninqa pasaqtan kununununqa, pacharaqmi khatatatanqa, qaparisqanpas Puka Qochamanraqmi uyarikunqa.

²²Awqanqa hanaqmanta phalaykamuq anka hinan Bosra pataman raphracharikuspan phawaykunqa. Chay p'unchaytaqmi Edompa soldadonkunaqa khatatatanqaku wachakuy nanaywan kashaq warmi hinaraq.

²³Señor Diosmi Damascomanta nin: Hamat llaqtawan Arfad llaqtawanmi khuyay llakisqa kashanku, mana allin willakuykunata uyarispa. Lamar-qochaq aytiynin hinan sonqonkuqa mana tiyanchu.

²⁴Damascoq kallpanmi chiriyarqapun, ayqekunanpaq kutirispan llaksakurqan, nanaywan phutikuywanmi lliwta q'aqcharqan wachakuy nanaywan kashaq warmi hina.

²⁵¡Allin mentasqa llaqtan, kusisqalla kakuq llaqtan wikch'urparisqa kapun!

²⁶Chay p'unchaymi waynankuna plazankunapi sinku-sinku kanqa, llapan maqanakuqkunataq wañuranqaku.

²⁷Damasco muyuriq perqataqa ninawanmi kanaykusaq, rey Ben-Hadadpa qhapaq wasinkunatapas ruphaykunqan. Ñoqa Tukuy-atiyniyoq Señor Diosmi chayta nini.

²⁸Babilonia rey Nabucodonosorpa atipasqan Cedar ayllumanta Hazorpa umallinkunamantawan Señor Diospa nisqan: ¡Usqhaylla Cedarman phawaykuychis! ¡Chay inti haykuy ch'inneqpi tiyaq runakunata thuniychis!

²⁹Qechumuychis karpankuta uywankutawan, cortinankuta, camellonkunatawan, lliw imaymanankunatawan. Qapariychistaq: ¡Muyuriqniykichispin sinchi manchakuy kashan! nispa.

³⁰Señor Diosmi nin: Qankuna Hazorpi tiyaqkuna, ¡usqhaylla ayqeychis! ¡Allin-allinta pakakamuychis! Babilonia rey Nabucodonosormi qankuna contra yuyaykun, qankuna contra unanchaspan nin:

³¹Hakullaña phawaykusun chay llakhi tiyaq runakunaman, paykunaqa tiyanku yanqa pampapin, mana imata yuyarispa, sapallanku mana piniyoq.

³²Camellonkunata qechusunchis, mana yupay atiy uywankunata apasunchis, nispa. Señor Diosmi nin: Hinantinmanmi ch'eqeykachisaq chay ch'ipu chukchan rutukuq runakunata, hinantinmantataqmi thuniqniykita apamusaq.

³³Hazormi wiñaypaq purunyapunqa, chaypin chacal animalkuna tiyanqa, manan pillapas tiyanqañachu, manataqmi pipas wasichakunqachu. Ñoqa Señor Diosmi chayta nini.

³⁴Judá suyupi kamachikuyta Sedequías qallarishaqtinmi, Señor Diosqa Jeremiasta Elammanta kayta nirqan.

³⁵Ñoqa Tukuy-atiyniyoq Señor Diosmi nini: Uyariy, Elampa wach'iqninkunatan chiriyachisaq, chaykunallawanmi payqa kallpayoq kashan.

³⁶Elam llaqta contran hinantinmanta wayrachisaq, hinantinmanmi ch'eqechisaq, manan kanqachu huk suyullapas Elam runakunaq mana chayasqanqa.

³⁷Elamtan awqanpa ñawpaqenpi khatatatachisaq, paykuna wañuchiy munaqpa ñawpaqenpin q'aqchasaq. Hatun llakikunatan chayachimusaq, paypin phiñakuyniyta thasnukusaq, pasaqta thuninaykaman maqanakuywan kachaykusaq. Ñoqa Señor Diosmi chayta nini.

³⁸Elampin kamachikuy tiyanayta churasaq, reyninkuta umallinkunatawanmi lliwta wañuchisaq.

³⁹Qhepamanmi ichaqa Elamta wakmanta t'ikarichisaq. Ñoqa Señor Diosmi chayta nini.