Read Diospa Simin Qelqa JEREMÍAS 5 Bible Online

JEREMÍAS 5 - Diospa Simin Qelqa bible

JEREMÍAS 5

¹Señor Diosmi nin: Jerusalenpa callenkunata purimuspa yachamuychis, allinta qhawamuychis, plazakunapi maskhamuychis, icha pillapas kanmanchu chanin ruwaq, cheqaq-kay ruway munaq runa. Tarirqamunkichischus chayqa, Jerusalentaqa pampachasaqmi.

²Hinaña sutiypi juraq kanku chaypas, cheqaqtapunin yanqa rimaqlla kanku, nispa.

³Señor Diosníy, qanqa hunt'aq runatan maskhashanki. Hasut'irqankin, manataq nanayta repararqankuchu, anyaykurqankin, manataq kasukurqankuchu, paykunaqa sonqonkutan rumiyaykachirqanku, manataq qanman kutirimpuyta munarqankuchu.

⁴Ñoqaqa yuyaykurqanin: Chaykunaqa mana yuyayniyoq wakchakunan kanku, Señor Diospa imachus munasqantaqa manan yachankuchu, manataq Diosninkuq kamachikuy simintapas yachankuchu.

⁵Chay hinaqa, allin wiraqochakunaman risaq, paykunawan rimamusaq, paykunaqa Señor Diospa imachus munasqantapas, Diosninkuq kamachikuy simintapas yachankupunichá, nispa. Ichaqa kasukuytapas mana munaspankun llapallanku Dios contra sayarisqaku.

⁶Chayraykun yunkamanta león lloqsimuspa wañuchinqa, ch'inneqmanta lobopas lloqsimuspa p'atanqa. Leopardon llaqta qayllamanta qhamiyashan, pillapas lloqsimuqtinqa llik'irqarinanpaq sinchi askha huchallikusqankumanta, sapa kuti Señor Diosta saqepusqankumantawan.

⁷Señor Diosmi nin: ¿Imaynataq qankunata ñoqa pampachaykichisman? Churiykikunan saqepuwarqanku, paykunan wak dioskunaq sutinpi jurarqanku, chaykunaqa manan diospunichu. Saksanankukaman mikhuchirqani, chaywanpas wasanchawaytan qallarirqanku, llapallankutaqmi qhelli huchapi puriq warmiq wasinman puriripurqanku.

⁸China caballo maskhaq wirayasqa orqo caballo hinan runa-masinkuq warminpa qhepanta phawarqanku.

⁹¿Chaykuna ruwasqankumantaqa manachu muchuchiyman? Chay hina llaqtamanri, ¿manapunichu tupaqninta qoyman?

¹⁰Awqanku haykumuspa uvas yurakunata t'irachunku, amapas llapantachu tukuchunku. Uvas yurakunata k'allmanachunku, manaña chakrayñachu kasqanrayku.

¹¹Israelpas Judapas wasanchawarqankupunin. Ñoqa Señor Diosmi chayta nini.

¹²Israelwan Judawanmi llullakuspa Señor Diosmanta rimarqanku, nirqankutaq: Manan Diosqa kanchu. Manan ima mana allinpas kawasunchu manan maqanakuypas yarqaypas kanqachu, nispanku.

¹³Profetakunaqa wayra hinallan kanku, paykunaqa Señor Diospa ima nisqantapas manan yachankuchu.

¹⁴Tukuy-atiyniyoq Señor Diosmi nin: Paykunan niwarqanku chay mana chaninkunata, chayrayku ñoqa simiykiman rimayniyta churasaq, simiykunan nina hina kanqa, Israel llaqtataqmi llant'a hina kanqa, ninataqmi llant'ata ruphaykapunqa, nispa.

¹⁵Señor Diosmi nillantaq: Yaw, Israel, qan contran karumanta hamuq llaqtata pusamushani, chayqa allin takyasqa ñawpa llaqtan, rimaynintapas manan reqsinkichu, parlasqantapas manan yachankichu.

¹⁶Llapankun maqanakuq allin qharikuna kanku, wach'inankuwanqa wañuchillankupunin.

¹⁷Llank'asqaykitapas mikhunaykitapas mikhurqapunqakun, churiykitapas ususiykitapas oqoykapunqakun, ovejaykikunatapas wakaykikunatapas mikhurqapunqakun, uvasniykitapas higosniykitapas millp'urqapunqakun, armankuwanmi allin perqayoq llaqtaykikunatapas thuninqaku, nispa.

¹⁸Señor Diosmi niwarqan: Chay p'unchaykunaña chayamuqtinpas manaraqmi llapaykichistachu thunisqaykichis.

¹⁹Llaqtayki tapusunki: ¿Imanaqtinmi tukuy chaykunata Apu Señor Diosniyku ruwawanku? nispa chayqa, kutichinki: Imaynan hallp'aykichispiraqtaq Diosniyku Señor Dios saqepuspaykichis mana reqsisqa dioskunata yupaycharqankichis, chay hinallataqmi wak suyupi mana reqsisqa runakunaq kamachin kapunkichis, nispa.

²⁰Señor Diosmi nin: Jacobpa mirayninman kayta willaychis, Judamanpas kayta willaychis.

²¹Kayta uyariy, mana yuyayniyoq loqhe llaqta, qhawaq ñawsan kanki, uyariq roqt'un kanki.

²²Ñoqa Señor Diosmi nini: ¿Manachu qankunaqa manchakuwankichis? ¿Manachu ñawpaqeypiqa khatatatankichis? Ñoqan aqota churarqani lamar-qochaq qorpan kananpaq, chay qocha manapuni wasapananpaq. Imaynataña phoqchispapas manan atinqachu, imaynataña hatarispapas manapunin wasapanqachu.

²³Qankunan ichaqa mana kasukuq loqhe sonqo kankichis, qhepaman kutirispan wikch'upuwarqankichis.

²⁴Manan hayk'aqpas kikiykichisqa ninkichischu: Diosninchis Señor Diosta manchakusun, paymi paranan mitallapipuni parachipuwanchis, wiñachinanpaq poqochinanpaq ima. Paymi mikhuy hoqarina mitatapas yachasqallataña waqaychapuwanchis, nispaqa.

²⁵Qankunaq mana chanin kayniykichismi lliwta huk-hinaman t'ikrarqapun, qankunaq huchaykichismi allin kanaykichista hark'asunkichis.

²⁶Arí, llaqtaypiqa kanpunin millay runakuna, phalaq animalta hap'inanpaq toqlla churaq hinan runa hap'inanpaq toqllata churan.

²⁷Wasinkumanqa suwasqakunatan hunt'achinku jaulaman phalaq animalkuna hunt'aykachisqata hina, chay hinapin atiyniyoqman qhapaqmanwan tukupunku.

²⁸Allin mikhusqa wirallañan lonq'ollañan kashankupas, millay ruwasqankuqa mana tukukuqmi, mana tayta-mamayoqpaqpas manan chaninchankuchu, wakchakunapaqpas manan kuskachankuchu.

²⁹¿Chaykuna ruwasqankumantaqa manachu ñak'arichiyman? ¿Chay hina suyumanqa tupaqninta manachu qopuyman?

³⁰Kay hina sinchi manchakuyraqmi kay suyupi kaykushan:

³¹Profetakunan llullakuspa rimanku, sacerdotekunan kamachikunku ima munasqankuman hina. Llaqtaytaq chay hina kanantapuni munan, ichaqa, ¿imatataq ruwankichis p'uchukay p'unchay chayamuqtinri? Ñoqa Señor Diosmi chayta nini.