Read Diospa Simin Qelqa EZEQUIEL 10 Bible Online

EZEQUIEL 10 - Diospa Simin Qelqa bible

EZEQUIEL 10

¹Chaymanta rikullarqanitaq chay querubinkunaq uman pata p'altapi anqas umiñamanta tiyanaman rikch'akuqta.

²Hinan Señor Diosqa yuraq qoysu p'achayoq runata nirqan: Haykuy querubinkunaq uranpi kaq ruedakunaq chawpinman, hinaspa nina sansata makiykipi horqomuy chay querubinkunaq ukhunmanta, llaqtaq patanmantaq hach'iykuy, nispa. Hinan rikurqani runaq haykusqanta.

³Chay ratotaq querubinkunaqa sayasharqanku Dios yupaychana wasiq ura ladonpi, phuyutaq ukhu patiota hunt'aykurqan.

⁴Chaymantataq Señor Diosqa lliphipispa querubinkunaq patanmanta hatarispa, yupaychana wasi punkuman rirqan. Hinan Dios yupaychana wasita phuyuqa hunt'aykurqan, pationpas k'ancharirqanraq Señor Diospa lliphlli-kayninwan.

⁵Querubinkunaq raphranpa raphapapasqantaq hawa patiokamaraq uyarikurqan, Tukuy-atiyniyoq Diospas rimashanman hinaraq.

⁶Linomanta yuraq qoysu p'achayoq runatan Señor Diosqa nirqan: Ruedakunaq ukhunmanta ninata horqomuy querubinkunaq chawpinmanta, nispa. Hinan runaqa rispa hukkaq ruedaq ladonpi sayaykurqan.

⁷Huk querubintaq haywarispa chawpinkupi ninamanta sansata hoqarimurqan, hinaspan haywarimurqan linomanta p'achayoq runaman. Paytaq chayta chaskiykuspa ripurqan.

⁸Chay querubinpa raphran ukhupitaq kasqa runaq makinman rikch'akuq.

⁹Querubinkunawan kuskatataq tawa ruedata rikurqani, sapanka querubintaq huk ruedawankama kasqa. Chay ruedakunataq chhipipipisqa q'omer umiña hina.

¹⁰Tawantin ruedakunaqa kikinkaman kasqa, sapanka ruedataq iskay rueda pasapunachisqaman rikch'akusqa.

¹¹Querubinkunaqa may cheqasmanpas puririyta munanku chayqa, puririllankuñan mana kutirispalla.

¹²Cuerponkupas, wasankupas, makinkupas, raphrankupas, tawantin ruedankupas ñawikunawan hunt'aykusqan kasqa.

¹³Ñoqa kikiymi uyarillarqanitaq tawantin ruedakunata: “Muyuylla-muyuq”, nispa sutichaqtapas.

¹⁴Sapanka querubintaq tawa ladoman uyayoq kasqa: ñawpaqkaq uyanmi rikch'akusqa toro uyaman, iskaykaq uyataq rikch'akusqa runa uyaman, kinsakaq uyataq rikch'akusqa león uyaman, tawakaq uyataq rikch'akusqa anka uyaman.

¹⁵Kay querubinkunaqa Quebar mayupi rikusqay kawsaqkunallapunin. Querubinkunataq phalaripurqan,

¹⁶hinaspan paykuna puririqtin ruedakunapas puririllarqantaq, pampamantapas ruedantinpachan phalarillarqantaq.

¹⁷Sayarpariqtinpas ruedakunaqa sayarparillarqantaq querubinkunawan huk espiritullayoq kasqankurayku.

¹⁸Chaymantataq Señor Diosqa lliphipipispa yupaychana wasi patamanta hataripurqan, querubinkunaq hawanpitaq sayaykurqan.

¹⁹Qhawashallaqtiytaq querubinkunaqa phalarirqanku ruedantinpacha, hinaspataq chayarqan Dios yupaychana wasiq inti haykuy lado punkunman. Israelpa Diosninpa lliphlli-kaynintaq paykunaq hawanpi k'ancharirqan.

²⁰Chaykunaqa kasqa Quebar mayu patapi Israelpa Diosninpa uranpi rikusqay kawsaqkunan, chayraqmi repararqani querubinkuna kasqanta.

²¹Sapankataqmi karqan tawa uyayoq, tawa raphrayoq, raphrankuq ukhunpitaqmi runa makiman rikch'akuq kasqa.

²²Chay rikusqay querubinkunaq rikch'aynintaq karqan Quebar mayupi rikusqay kaqkunapuni. Sapankataq purisqaku ñawpaqen ladollaman.