Read Diospa Simin Qelqa EZEQUIEL 11 Bible Online

EZEQUIEL 11 - Diospa Simin Qelqa bible

EZEQUIEL 11

¹Diospa Espirituntaq aparikuwarqan Señor Diospa wasin inti lloqsimuy lado punkuman. Chay punkupin kashasqa iskay chunka phisqayoq runakuna, paykuna chawpipitaq kashasqa llaqta umallikuna Azurpa churin Jaazanías, Benaiaspa churin Pelatiaspiwan.

²Señor Diostaq niwarqan: Qan, runaq churin, uyariway. Kay runakunan llaqtaman millay yuyaykunata qaran.

³Paykunaqa ninkun: Manan wasi ruwana tiempochu. Kay llaqtaqa manka hinan, ñoqanchistaq aycha hina kanchis, nispa.

⁴Chayrayku, qan, runaq churin, paykuna contra sutiypi rimariy, nispa.

⁵Chaymantataq Señor Diospa Espiritunqa hunt'aykuwaspa rimanaypaq kamachiwarqan: Señor Diosmi nin: Yaw, Israel runakuna, chay hinatan qankunaqa yuyankichis. Ñoqaqa yachanin qankunaq yuyaykusqaykichista.

⁶Qankunaqa askha runakunatan kay llaqtapi wañuchirqankichis, ayakunawantaq callekunatapas hunt'aykachirqankichis.

⁷Chayraykun ñoqa Apu Señor Diosqa sut'inta willaykichis: Jerusalenmi manka, aychataqmi mana qankunachu kankichis, aswanpas wañurachisqaykichis runakunaq ayanmi aychaqa, qankunatataqmi llaqtamanta wikch'upusqaykichis.

⁸¿Awqa tinkuytachu manchakunkichis? Kunanmi qankuna pataman hatun maqanakuyta kachaykamusaq. Ñoqa Apu Señor Diospunin nini.

⁹Kay llaqtamanta horqospan wak llaqtayoqkunaman hap'iykachisqaykichis. Hinaspan muchuchisqaykichis,

¹⁰qankunataq awqa tinkuypi wañunkichis, chaywanmi qankunata Israel suyu qorpapi taripasqaykichis. Chaypin reqsiwankichis ñoqaqa Señor Diospuni kasqayta.

¹¹Llaqtaqa qankunapaq manan mankachu kanqa, manataqmi aychapas qankunachu kankichis. Ñoqapunin taripasqaykichis Israel suyu qorpapi.

¹²Chaypin aswantaqa reqsiwankichis ñoqaqa Señor Diospuni kasqayta. Qankunaqa manan kamachikuyniyman hinachu kawsarqankichis, manallataqmi kasukurqankichischu unanchay simiykunatapas, aswanpas muyuriqniykichispi llaqtakunaq ruwasqantan qatichikurqankichis, nispa.

¹³Chayta Señor Diospa sutinpi rimashallaqtiyraqmi Benaiaspa churin Pelatiasqa[2] pampaman wañusqa kumpakapurqan. Ñoqataq pampaman wikch'ukuspa kunkayoqta mañakuspa qaparirqani: ¡Ay, Apu Señor Diosníy! ¿Israelpi pisi puchuqkunallatapas tukurqapunkichu? nispa.

¹⁴Señor Diosqa wakmantan nillawarqantaq:

¹⁵Qan, runaq churin, uyariway. Jerusalenpi tiyaq runakunan kamachi-kaypaq Babiloniaman apasqa llaqta-masiykikunamanta rimashanku: ¡Paykunaqa Señor Diosmanta karupin kashanku! Kay suyutataqmi ñoqanchisman Señor Diosqa qopuwanchis, nispanku.

¹⁶Chayrayku niy, Apu Señor Diosmi nin: Hinaña qankunata wak suyukunaman karu llaqtakunamanwan ch'eqechirqaykichis chaypas, ñoqa kikiymi qankunata chay suyukunapi yanapasqaykichis.

¹⁷Chayrayku, ñoqa Apu Señor Diosqa huñuykampusqaykichis ch'eqechisqay suyukunamanta kutichimpuspa, hinaspan kaqta Israel suyuta qopusqaykichis.

¹⁸Kaq Israel suyuman kutimpuspaykichismi wikch'upunkichis llapan millay rikch'aykunata cheqnikusqay idolokunatawan.

¹⁹Ñoqataqmi chay rumi sonqoykichista qechupusqaykichis, hinaspan huk mosoq sonqota, mosoq yuyaytawan qosqaykichis.

²⁰Hinan kawsankichis kamachikuyniykunaman hina, hinaspa unanchayniykunata kasukunkichis. Qankunan kankichis llaqtay, ñoqataq kasaq Diosniykichis.

²¹Ichaqa pipas chay cheqnikusqay millay p'enqay idolokunaman k'askakuqtaqa ruwasqanman hinan muchuchisaq. Ñoqa Señor Diosmi sut'inta nini chayta, nispa.

²²Chaymantataq querubinkunaqa phalaripurqan ruedankunantinpacha, Israelpa Diosninpa lliphlli-kaynintaq paykunaq hawanpi kasharqan.

²³Hinaspan llaqtamanta t'aqarikapuspa llaqtaq inti lloqsimuy ladon orqo pataq hawanpi sayarqan.

²⁴Chaymantan Diospa Espiritunqa hoqarispa Babiloniaman kutichimpuwarqan, maypichus wakin preso apasqakunapas kashasqanman. Chaytan rikhuriypi rikurqani Diospa Espiritun rikuchiwaqtin. Chaymantataq rikhuriyqa tukukapurqan.

²⁵Ñoqataq preso apasqa kaqkunaman Señor Diospa lliw rikuchiwasqanta willarqani.