Read Diospa Simin Qelqa EZEQUIEL 12 Bible Online

EZEQUIEL 12 - Diospa Simin Qelqa bible

EZEQUIEL 12

¹Señor Diosqa nillawarqantaqmi:

²Qan, runaq churin, mana kasukuq llaqta chawpipin tiyashanki. Paykunaqa qhawashaspa mana rikuq, uyarishaspa mana uyariqmi kanku, millay mana kasukuq kasqankurayku.

³Chayrayku, qan, runaq churin, kaqniykikunata wakichikuy kamachi-kayman apasqa kaspa apakapunaykipaq. Hinaspan llapa runa rikushaqtin p'unchaypi wasiykimanta wak llaqtaman lloqsipunki. Ichapaschá chay hinapi yuyayta hap'inkuman, hinaña mana kasukuq kanku chaypas.

⁴P'unchaypin sut'ita lliw runaq rikushasqan imaykikunatapas q'epichakunki, kamachi-kayman apasqa hina puririnaykipaq, ch'isinmanpas kaqllataq ñapas apasqa runa hina lloqsipunki.

⁵Chaymantapas llapa rikushaqtinku perqata t'oqospa chayninta lloqsinki kaqniykikuna q'epiykusqa.

⁶Laqhayaykuqtintaq q'epillaykita q'epirikuspa llapanku rikushaqtin pasapunki, uyaykitataq qatakunki suyuntinta mana rikunaykipaq. Chayta ruwaspaykin Israel llaqtapaq huk willakuy kanki, nispa.

⁷Chaymi Señor Diospa kamachiwasqanman hina p'unchaypi q'epiyta q'epichakurqani, kamachi-kayman apanapaq. Ch'isinmantaq makiywan perqata t'oqorqani, hinaspan laqhayaykuqtin hina lliw runa rikushaqtin, q'epillayta q'epirikuspa puriripurqani.

⁸Tutamantataq Señor Diosqa niwarqan:

⁹Qan, runaq churintan chay mana kasukuq Israel runakunaqa ch'isi tapurqasunki: ¿Imatan ruwashanki? nispa.

¹⁰Chaymi ninki, Apu Señor Diosmi nin: Kayqa huk willakuymi Jerusalenpa umallinpaq, chaypi tiyaq llapan Israel runakunapaqwan, nispa.

¹¹Nillankitaq: Ñoqaqa qankunapaq huk waqyakuy willakuymi kani. Imaynatan ñoqa ruwashani, chay hinata ruwaspan Jerusalenpi tiyaqkuna kamachi-kayman ripunqaku.

¹²Paykunaq umallinmi kaqninkunata q'epirikuspa tutayaykuqtin perqa t'oqonta lloqsispa ripunqa, uyanta qatarqokuspa suyuta mana rikunanpaq.

¹³Ñoqataqmi payta urmachinaypaq llikata churasaq, Babilonia llaqtamantaq Caldea runakunaq hallp'anman apasaq, paytaqmi ichaqa ñawsa kaspa chay suyuta mana rikunqachu, chaypin wañupunqa.

¹⁴Hinantinmanmi wayrawan hina aparparichisaq llapan oficialninkunata, yuyaychaqninkunata, soldadonkunatapas, hinaspataq qhepankuta espadantin qatipasaq.

¹⁵Maypachachus karu suyukunaman wak llaqtakunaman aparparisqa kaspankuqa, reqsiwanqakun ñoqaqa Señor Diospuni kasqayta.

¹⁶Ichaqa, pisillataqa ayqechisaqpunin hatun maqanakuymanta, yarqaymanta, onqoykunamantawan, chay hinapi may llaqtapiña kasqankupipas millay mana chanin p'enqay ruwasqankumanta yuyayta hap'inqaku, hinallataq ñoqa Señor Dios kasqaytapas reqsiwanqaku, nispa.

¹⁷Señor Diosqa nillawarqantaqmi:

¹⁸Qan, runaq churin, mikhushaspan khatatatanki, ukyashaspataq mancharikuymanta chhaphchikunki.

¹⁹Runakunatataq ninki: Apu Señor Diosmi Jerusalenpi Israel suyupipas tiyaq runakunamanta nin: Paykunan millayta awqanakunku chaymi llaksasqallaña mikhunqaku, ukyanankutapas q'aqchasqallaña ukyanqaku, suyunkupas thunisqataq ch'usaqtaqmi qhepapunqa.

²⁰Llapan runayoq llaqtan thunisqa kanqa, suyuqa ch'inneqman tukuchisqan kapunqa. Chay hinapin paykunaqa Señor Dios kasqayta reqsiwanqaku, nispa.

²¹Señor Diosmi nillawarqantaq:

²²Runaq churin, ¿Ima niytan munan Israel runakunaq: P'unchaykunan pasarqapun, profetaq rikhuriypi rikusqanqa manataq hunt'akunchu, nisqankuqa?

²³Paykunamanmi ninki, Apu Señor Diosmi nin: Chay rimaytaqa ñoqan yanqaman tukuchipusaq, Israel runakunaqa manañan chay rimayta rimanqakuchu. Aswanmi chayamushanña lliw unanchasqakunaq hunt'akunan p'unchay, llapallanmi hunt'akunqa rikhuriypi rikuchisqakunaqa.

²⁴Manan Israel runakuna ukhupiqa kanqachu yanqa rikhuriykunapas llunk'upayay willakuykunapas.

²⁵Aswanmi ñoqa Señor Diosqa ima ruway munasqayta nisaq, hinan lliw nisqaypas usqhaylla hunt'akunqa. Yaw, mana kasukuq llaqta, kawsasqayki p'unchaypin rikunki lliw hunt'akusqanta. Ñoqan rimarisaq, rimarisqayqa lliwmi hunt'akunqa. Ñoqa Apu Señor Diosmi chayta nini, nispa.

²⁶Chaymantapas Señor Diosqa nillawarqantaqmi:

²⁷Runaq churin, lliw Israel runakunan rimanqaku: Profetaq rikhuriypi rikusqanpas willakusqanpas qhepamanraqmi hunt'akunqa, nispa.

²⁸Chayrayku, paykunata niy, Apu Señor Diosmi nin: Rimasqaykunaqa kunallanmi hunt'akunqa, ima rimasqallaypas hunt'akunqapunin, nispa.