Read Diospa Simin Qelqa EZEQUIEL 14 Bible Online

EZEQUIEL 14 - Diospa Simin Qelqa bible

EZEQUIEL 14

¹Israel llaqta wakin kurak runakunan hamuspa ñawpaqeypi tiyaykurqanku.

²Hinan Señor Diosqa nimuwarqan:

³Qan, runaq churin, uyariway. Kay runakunan idolonkumanpuni hap'ipakunku, hinaspan chay diosninkuwan huchallikunankupaq aysachikunku. ¿Chaychu ñoqata paykuna tapuwankuman?

⁴Chay hinaqa niy, Apu Señor Diosmi nin: Mayqen Israel runapas idolonkunaman hap'ipakuspa, chay dioskunawan huchallikunanpaq aysachikuspa, profetaman tapukuqraqtaq hamunman chayqa, ñoqa kikiymi payman kutichisaq millay idolokuna yupaychaq kasqanman hina.

⁵Llapan Israel runakunan idolonkurayku t'aqakuwanku, chayraykun chayta ruwasaq sonqonkuta wakmanta suwanaypaq.

⁶Chayrayku Israel runakunata niy, Apu Señor Diosmi nin: ¡Yuyayta hap'ispa ñoqaman kutirikampuwaychis! Millay p'enqay ruwasqaykichista, idoloykichistapas wikch'upuychis.

⁷Mayqen Israel runapas, Israel suyupi tiyaq wak llaqtayoq runapas ñoqata saqewaspa idolokunaman hap'ipakuspa, chay diosninkuwan huchallikunanpaq aysachikunqa, hinaspa huk profetaymanraqtaq tapukuq hamunmanpas chayqa, ñoqa kikiymi payman kutichisaq.

⁸Chay runaq awqanmi kapusaq, lliwpa rikunanpaqmi muchuchisaq chaymanta qhepaman parlanankupaq, llaqtaymantapas wikch'upusaqtaqmi. Chay hinapin yachankichis ñoqa Señor Diosqa kasqayta.

⁹Huk profetachus llullakunanpaq q'otuchikuspa willakunman chayqa, ñoqa Señor Diospa q'otusqay profetan kanqa, hinan ñoqaqa chay profetata ñak'arichisaq, Israel llaqtaymantapas wikch'upusaq.

¹⁰Profetapas payta tapukuq runapas iskayninkun huchachasqa kanqaku.

¹¹Chay hinapin manaña Israel llaqtaqa astawan ñoqamanta t'aqakuwanqakuñachu, manañataq huchankuwan qhellichakunqakuñachu. Paykunan llaqtay kapunqaku, ñoqataq Diosninku kasaq. Ñoqa Apu Señor Diosmi chayta nini, nispa.

¹²Señor Diosmi niwarqan:

¹³Qan, runaq churin, uyariway. Suyuntin runachus ñoqa contra huchallikunkuman wasanchawankumantaq chayqa, ñoqan makiyta haywarispa llapantapuni mikhunankuta qechusaq. Paykunamanmi yarqayta kachaykusaq, hinan runakunapas uywakunapas wañuranqaku.

¹⁴Chay suyupitaqchus tiyanman Noepas, Danielpas, Jobpas chayqa, paykuna kinsantillanmi qespichisqa kankuman chanin kasqankurayku. Ñoqa Apu Señor Diosmi chayta nini.

¹⁵Salqa animalkunataña kachaykuyman suyuntinpi tiyaqkunata mikhunanpaq, hinataq chay animalta manchakuspa mana piqpa purinan ch'inneqman suyuntin tukupunman,

¹⁶chaypitaqchus chay kinsantin runakuna tiyashanman chaypas, manapuniñan wawankunata horqokapuyta atinkumanchu. Paykunallañan qespichisqa kankuman, suyuntintaqmi ch'inneqmanpuni tukupunman. Ñoqa Apu Señor Diosmi sutiyrayku jurani.

¹⁷Maqanakuytachus chay suyuman kachaykuyman, hinaspataq kamachiyman runata uywatawan wañuchinanpaq,

¹⁸chay kinsantin runakunataqchus chaypi tiyankuman chaypas, manapunin wawankunata horqokapuyta atinkumanchu, paykunallapunin qespichisqa kankuman. Ñoqa Apu Señor Diosmi sutiyrayku jurani.

¹⁹Onqoykunatachus chay suyuman kachaykuyman, phiñakuyniywantaq wañuyta t'akaykuspa wañurachiyman runakunata uywakunatawan,

²⁰chaypitaqchus kashanman Noepas, Danielpas, Jobpas chayqa, manapunin wawankunata horqokapuyta atinkumanchu. Paykunallapunin qespichisqaqa kankuman, chanin runa kasqankurayku. Ñoqa Apu Señor Diosmi sutiyrayku jurani.

²¹Ñoqa Apu Señor Diosmi nillanitaq: Ñoqan Jerusalenta muchuchisaq tawa manchana ñak'ariykunawan: hatun maqanakuywan, yarqaywan, salqa animalkunawan, onqoypiwan. Chaykunan wañurachinqa runata uywakunatawan tukunankama, chay hinaqa, ¡imayna mancharikuyraqmi Jerusalenpaqqa kanqa!

²²Chaywanpas iskay kinsallan kawsashaq ayqenqaku, chaykunallan wawakunantin lloqsinqaku. Paykuna qankunaman hamuqtinmi yachankichis imaynachus kasqankuta, imachus ruwasqankutawan, chayraqmi rikunkichis imamantachus Jerusalenta lliw ñak'ariykunawan kachaykusqayta.

²³Qankunaqa rikunkichismi imachus ruwasqankuta imaynachus kasqankutawan, chay hinapin yachankichis Jerusalentaqa mana yanqa qasichu muchuchisqayta. Ñoqa Apu Señor Diosmi chayta nini, nispa.