Read Diospa Simin Qelqa EZEQUIEL 18 Bible Online

EZEQUIEL 18 - Diospa Simin Qelqa bible

EZEQUIEL 18

¹Señor Diosmi niwarqan:

²¿Imataq Israelpi rimashanku chay rimayri: Taytanmi p'osqo uvasta mikhun, churinpa kiruntaq chhukukukun, nispa?

³Ñoqa Apu Señor Diosmi sutiyrayku jurani, Israelpiqa chay rimayta hinaqa manañan rimankichisñachu.

⁴Ñoqaqmi llapan runaqa, churinpas, taytanpas. Huchallikuq runaqa wañunqapunin.

⁵Chanin runan chaninkaqta allinkaqtawan ruwaqqa:

⁶Wak'a dioskuna yupaychanapaq orqo patapi mikhuna wakichisqakunapi mana mikhupakunchu, Israelpa yanqa idolonkunata mana qhawarinchu, runamasinpa warminwan mana wasanchanchu, warminpa killan purishaqtinpas paywan mana puñunchu.

⁷Manan pitapas sarunchanchu, manumanta ima hap'isqantapas kutichipunmi, manan pimantapas suwakunchu. Mikhuynintapas yarqasqakunamanmi qoykun, mana p'achayoqtapas p'achachinmi,

⁸qolqetapas manan interesniyoqpaqchu manun, manan pitapas mana allintaqa ruwanchu, runapuratapas allintan chaninchan.

⁹Kamachikuyniyman hinan ruwan, unanchay simiykunatapas allintapunin hunt'an. Chay runan chaninpuniqa, payqa manan wañunqapunichu. Ñoqa Apu Señor Diosmi chayta nini.

¹⁰Chay runaq churintaqchus kanman runa wañuchiqpas, loqhepas, chaykunamanta imakuna ruwaqpas,

¹¹taytanpa mana ruwasqankunata ruwaysikuqpas, orqo patapi wak'a dioskuna yupaychanapaq mikhuna wakichisqata mikhuysikuqpas, runamasinpa warminwan wasanchaqpas,

¹²wakchakunata mana imayoqkunatawan sarunchaqpas, suwakuqpas, manumanta ima hap'isqanta mana kutichipuqpas, idolokunata yupaychaqpas, cheqnisqaykunata ruwaqpas,

¹³qolqenta interesniyoqta manuqpas, ¿chay hina runaqa kawsanmanchu? ¡Manapunin kawsanqachu! Chay millay cheqnisqakunata ruwaqqa wañunqapunin, pay kikillanpunin huchanmantaqa wañunqa.

¹⁴Chay millay runaq churintaqchus kanman taytanpa lliw imaymana huchakuna ruwasqanta rikushaspa mana chay ruwasqanta hina ruwaq.

¹⁵Payqa wak'a dioskuna yupaychanapaq orqo patapi mikhunakuna wakichisqamanta mana mikhuysikuqpaschu, manallataq Israelpa idolonkunata qhawariqpaschu, runamasinpa warminwanpas mana wasanchanpaschu,

¹⁶pitapas mana sarunchaqchu, manumanta ima hap'isqantapas mana hap'ipakuqchu, mana suwakuqpaschu, mana mikhunayoqkunaman mikhuyninpas qoykuq, mana p'achayoqmanpas p'achaykachiq,

¹⁷mana pitapas mana allin ruwaqchu, qolqentapas mana interesniyoqta manuq. Payqa kamachikuyniyman hinan ruwanpas, unanchasqay simiykunatapas allintapunitaq hunt'anpas chayqa, chay runaqa manan taytanpa huchanmanta wañunqachu, aswanpas kawsanqapunin.

¹⁸Taytantaqchus runa muchuchiq, suwakuq, llaqtan ukhupi mana allin ruwaq kanman chayqa, wañunqan pay kikinpa huchanmanta ñak'arispa.

¹⁹Qankunan ninkichis: Chayri, ¿imanaqtintaq taytanpa huchanmanta churinpas mana paganchu? nispa. Churinqa allintan chanintan ruwarqan, hinallataq kamachikuy simiykunatapas llapanta ruwaspa hunt'arqan, chayraykun payqa kawsanqapuni.

²⁰Aswanpas pipas hucha ruwaqllan wañunqaqa. Manan churinqa taytanpa huchanmantaqa wañunmanchu, manallataq taytanpas churinpa huchanmantaqa wañunmanchu. Chanin runaqa chanin kaqllatapunin chaskinqa, mana chanin runataq mana chanin kasqanmanta ñak'ariyta chaskinqa, nispa.

²¹Huk millay runataqchus lliw hucha ruwasqanmanta t'aqakapunqa, hinaspataq llapan kamachikuyniykunatapas hunt'apunqa, allinkaqtapas chaninkaqtapas ruwanqa chayqa, kawsanqapunin, manan wañunqachu.

²²Ñoqapas manañataqmi yuyarisaqñachu ima huchakuna ruwasqanmantapas, chaymi payqa kawsanqa lliw chaninkaqkuna ruwasqanrayku.

²³¿Ñoqari huchayoqpa wañunanta munanichu? Manan, aswanmi munani yuyayta hap'ispa kutirikamuwananta hinaspa kawsananta. Ñoqa Apu Señor Diosmi chayta nini.

²⁴Huk chanin runataqchus chanin-kayninta wikch'upuspa huchallikunman millay runaq ruwasqan cheqnikusqaykunata ruwaspa chayqa, ¿payri kawsanmanchu? Ñoqaqa manan yuyarillasaqpaschu llapan allinkuna ruwasqantaqa. Payqa mana hunt'aq kasqanmanta huchanmantawanmi wañunqa.

²⁵Qankunan ichaqa nishankichis: Señor Diospa ruwasqanqa mana chaninmi, nispa. Chayrayku, yaw, Israel runakuna, uyariwaychis. ¿Ñoqaq ruwasqayqa manachu chanin? Aswanpas, ¿manachu qankuna mana chanin ruwaqqa kankichis?

²⁶Chanin runataqchus chanin-kayninta wikch'upuspa mana allinta ruwapunqa chayqa, mana allin ruwasqan huchanmantan wañupunqa.

²⁷Mana chanin runataqchus chay ruwasqankunamanta t'aqakapuspa allinkaqta chaninkaqtawan ruwapunqa chayqa, kawsaynintan qespichikunqa.

²⁸Allinta qhawarispachus lliw mana allin ruwasqanmanta t'aqakapunqa chayqa, cheqaqtapunin kawsanqa, manataq wañunqachu.

²⁹Israel llaqta runakunan ichaqa nishanku: Señor Diospa ruwasqanqa mana chaninmi, nispa. Yaw, Israel runakuna, ¿ñoqaq ruwasqayqa manachu chanin? Aswanpas, ¿manachu qankuna mana chanin ruwaqqa kankichis?

³⁰Israel runakuna, ñoqaqa sapankaykichistan ruwasqaykichisman hina juzgasqaykichis. Ñoqa Apu Señor Diosmi chayta nini. Hukpaqkama mana allin ruwayniykichiskunata wikch'upuspa ñoqaman kutirikampuwaychis, chay hinapi huchaykichismanta mana muchuchisqa kanaykichispaq.

³¹Ñoqa contra llapan mana chanin ruwasqaykichismanta t'aqakuychis, maskhaychis mosoq sonqota mosoq yuyaytawan. Israel runakuna, ¿imanaqtinmi wañuwaqchis?

³²Ñoqaqa manan pitapas wañunanta munanichu. Lliw mana allinmanta t'aqakuspa ñoqaman kutirikampuwaychis, hinan kawsankichis. Ñoqa Apu Señor Diosmi chayta nini, nispa.