Read Diospa Simin Qelqa EZEQUIEL 22 Bible Online

EZEQUIEL 22 - Diospa Simin Qelqa bible

EZEQUIEL 22

¹Señor Diostaq niwarqan:

²Qan, runaq churin, ¿runa wañuchiq millay llaqtata huchachankichu? ¿Huchachankipunichu? Chay hinaqa, rikuchiy llapan millay ruwasqankunata.

³Hinaspa niy, Apu Señor Diosmi nin: Qanmi runaykikuna wañuchiq llaqta kanki, idolokunata yupaychaspataq qhellichakurqanki, chayraykun ñak'arinayki chayamushanña.

⁴Runa wañuchisqaykimantan huchachasqa kanki, hinallataq ruwakusqayki idoloykikunawan qhellichakunki. Manaraq tiemponpin kawsayniykipas tukukapunqa, p'unchayniykipas p'uchukapunqa. Hinallataqmi llaqtakunawanpas k'amichisqayki, llapan suyukunawantaq asipayachisqayki.

⁵Yaw, lliwpa reqsisqan qhelli llaqta, ch'aqwaykunaq hunt'aykusqan llaqta, qayllaykipi kaqpas karupi kaqpas qantaqa asipayasunkikun.

⁶Chaypin Israelpa kamachiqninkuna kashan, chawpiykipi tiyaykuspa, runakunata wañuykachishan may atisqanta.

⁷Runaykikunaqa tayta-mamantapas pisichankun, wak llaqtayoqkunatapas, mana tayta-mamayoqkunatapas, viudakunatapas sarunchankun.

⁸Ch'uya kaqniykunatapas pisichankun, samana p'unchayniykunatapas mana kaqpaqmi qhawarinku.

⁹Wakin runaykikunan llullakuspa hukkunata wañurachinku, wakin runaykikunataq orqo patapi wak'a dioskunata yupaychanankupaq fiesta ruwaq purinku, hinaspan millay mana ruwanakunata ruwamunku.

¹⁰Wakintaqmi madrastankuwan puñukunku, wakintaq killan purishaqtinpacha warmikunata violanku,

¹¹kaqllataq wakinqa runamasinpa warminwan puñukun, wakintaq p'enqaytaraq qhachuninwan puñukun, wakinñataq taytanpa ususinwan puñukun.

¹²Wakinkaq runaykiñataq hinallata rantichikun hukta wañuchinanpaq. Qolqetapas manunku askha interesniyoqta, runamasinta imaymana mana chaninta ruwaspan kallpantapas k'utun. Chay hinapin ñoqata qonqapuwarqanki. Ñoqa Apu Señor Diosmi chayta nini.

¹³Ñoqaqa sinchi phiñasqapunin kashani runa q'alanasqaykimanta runa wañuchisqaykimantawan.

¹⁴¿Ñoqawan churanakunaykipaq kallpayki kanmanchu qanta muchuchiqtiy? Ñoqa Señor Diosmi rimarirqani, rimarisqaytaqa hunt'asaqpunin.

¹⁵Hinantin llaqtamanmi wisñiykusqayki, llapan suyumantaqmi ch'eqeykachisqayki, pasaqtapunin qhellikayniykita picharparisaq.

¹⁶Chay hinapin wak suyukuna pisichasunki, qantaqmi reqsiwanki ñoqapuni Señor Diosqa kasqayta, nispa

¹⁷Señor Diosmi niwarqan:

¹⁸Qan, runaq churin, uyariway. Ñoqapaqqa Israel llaqtaqa mana valeq qolqeq qhoqan hinallan, qolqe unuyachisqamanta puchuq cobre, estaño, fierro, titi hinan.

¹⁹Chayraykun ñoqa Apu Señor Diosqa nini: Paykunaqa mana imapaq valeq qhoqañataq tukupunku chayqa, Jerusalén chawpillamanmi huñuykusaq.

²⁰Imaynan qolqetapas, cobretapas, fierrotapas, tititapas, estañotapas chhaqruspa hornoman hich'aykunku, hinaspataq allinta ninawan unuyachinku, chay hinatan ñoqaq manchakuy phiñakuyniywan paykunata llaqtaman huñuykuspa unuyachisaq.

²¹Paykunata huñuykuspaymi aswantaraq phiñakuyniyta rawrarichisaq, hinan paykuna llaqtaq chawpinpi unuyachisqa kanqaku.

²²Imaynan hornopi qolqeta unuyachinku hinan, paykunapas llaqta chawpipi unuyachisqa kanqaku, chay hinapitaqmi reqsiwanqaku ñoqaqa Señor Dios kasqayta, hinallataq paykunaman phiñakuyniyta chayachisqaytapas, nispa.

²³Señor Diosmi nillawarqantaq:

²⁴Qan, runaq churin, Israel suyuta niy: Qanmi kanki mana parayoq mana unuyoq muchuchisqa qhelli suyu.

²⁵Kamachikuqniykikunapas león hinan qaparikuspa mikhunantapas mikhuq, kikin hallp'anpi runakunatapas oqon, qhapaq kaynintapas illankunatapas suwan, hinallataq askha warmikunaq qosankuta wañuchinku.

²⁶Sacerdotenkupas yachachikuyniykunatan q'ewinku, ch'uya kaqniykunatapas pisichanku, manapunin reparankuchu Diospaq t'aqasqa kaqtawan mana t'aqasqa kaqtawanpas, manallataqmi hukkunamanpas yachachinkuchu qhelli kaqtawan ch'uya kaqtawan reparanankupaq. Manapunin yuyarinkuñachu samana p'unchayniykunatapas, ñoqatapas pisichapuwankun.

²⁷Umalliykikunaqa mikhunanpaq aychata llik'irqariq lobokuna hinan kanku. Yawartan hich'anku, runakunatapas wañuchinkun, chaywantaqmi qhapaqyanku.

²⁸Profetakunan cheqaq kaqta pakaspa llulla rikhuriypi rikusqankuta llulla watuchiykunatawan willakuspa, perqa llunch'iq hina chay ruwasqankuta pakanku. Paykunan ninku: “Apu Señor Diosmi khaynata nin”, nispa, ñoqaqa mana imallatapas paykunaman nishaqtiy.

²⁹Llaqta runan millay mana chanin-kayman suwakuymanwan k'askakunku, wakchatan mana imayoqtawan q'alananku, yanqa qasin wak llaqtayoqkunata pisichanku.

³⁰Chay runakuna ukhupin ñoqa maskharqani pillapas kay suyupaq allinnin ruwaq runata, hinallataq ama ima mana allintapas ruwanaypaq ñoqata valepakuwananpaq, ichaqa manan tarirqanichu.

³¹Chayraykun phiñakuyniyta paykuna pataman kachaykusaq, hinaspan phiñakuyniywan ruphachisaq, ruwasqankuman hina muchuchinaypaq. Ñoqa Apu Señor Diosmi chayta nini.