Read Diospa Simin Qelqa EZEQUIEL 26 Bible Online

EZEQUIEL 26 - Diospa Simin Qelqa bible

EZEQUIEL 26

¹Chunka hukniyoq wataq ñawpaqkaq killanpa qallariynin p'unchaymi Señor Diosqa niwarqan:

²Qan, runaq churin, uyariway, Tiro llaqta runakunan Jerusalenmanta nirqanku: ¡Waleq! ¡Jerusalenqa thunisqan kapushan! Llapa llaqtakunaq punkunmi karqan. Jerusalenqa purunyachisqañan kapushan, kunanqa ñoqañataqmi qhapaqyapusaq, nispa.

³Chayraykun ñoqa Apu Señor Diosqa nini: Yaw, Tiro llaqta, qanpa awqaykin kani, askha suyukunatan qan contra kachamusaq lamar-qochaq phoqchiqeyninta hinaraq.

⁴Perqaykikunatan thuninqaku, torreykikunatan kumpanqaku. Hallp'aykitapas lliwtan pichachisaq, llusk'a qaqallatañan saqesqayki.

⁵Lamar-qocha ukhupin qhepakunki llika ch'akichina qaqa hinan kanki, ñoqa Apu Señor Diosmi chayta nini. Qan Tiro llaqtan suyukunaq llat'anasqan kanki,

⁶lamar-qocha pata hallp'api tiyaq runaykikunan espadaq ñawch'inpi wañunqaku. Chay hinapin reqsiwanki ñoqa Señor Diosqa kasqayta, nispa.

⁷Ñoqa Apu Señor Diosmi nillanitaq: Yaw, Tiro llaqta, wichay ladomantan qan contra Babilonia rey Nabucodonosorta apamusaq. Chay sinchi munayniyoq reytan pusamusaq, caballokunayoqta, carretakunayoqta, allin sillakuy yachaq soldadokunayoqta askha runakunayoqta ima.

⁸Espadawanmi wañurqarichinqa lamar-qocha pata hallp'api tiyaq runaykikunata, muyuriqniykipin mana pipas ayqenanpaq hark'achita ruwanqa, hallp'a montosqa seqanatan perqa muyuriqniykipi ruwanqa. Escudowan pakasqa soldadokunan qan contra phawaykamunqaku.

⁹Perqa thunina carretakunawanmi perqaykita takanqa, Torreykikunatan q'asushaspalla thuninqaku.

¹⁰Perqa q'asanta phawaykuq soldado hina Babilonia rey punkuykita haykumuqtinmi, caballoq aysasqan llapan carretakunaq phawasqanwan perqakunaraq chhaphchikunqa. Askha caballonkunaq hallp'a q'osñichisqanwanmi p'ampasunkiraq,

¹¹caballonkunaq phapatunkunan calleykikunata t'ustunqa. Paymi runaykita espadawan wañuchinqa, wasi tanqaq tusaykikunatan thunirqarinqa.

¹²Qhapaq kayniykikunatan llat'anasunkiku, qhatunaykikunatan suwaykusunkiku. Perqaykikunatan thuniykunqaku, sumaq wasiykikunatan lliwta kumpaykunqaku. Rumiykikunata, kurkuykikunatapas, llapa thunisqa kaqtapas, lamar-qochamanmi wikch'uykunqaku.

¹³Chay hinapin takisqaykita ch'inyachisaq manañataqmi arpaykiq waqasqanpas uyarikunqachu.

¹⁴Llusk'a qaqamanmi tukuchisqayki, lamar-qocha ukhupi llika ch'akichina qaqaman. Manataq hayk'aqpas sayarinkiñachu. Ñoqa Apu Señor Diosmi chayta nini, nispan nin, Señor Diosqa.

¹⁵Ñoqa Apu Señor Diosmi Tiro llaqtamanta nillanitaq: Qan thunisqa rikukuqtiyki, k'irisqakuna nanaymanta qapariqtinkun, runaykikuna wañuraqtinkun, lamar-qocha muyuriq pata suyukunapi tiyaqkuna khatatatanqaku.

¹⁶Chay suyukunaq reyninkunan kamachikuy tiyanankumanta uraykunqaku, hinaspan capankuta sumaq k'achanchasqa p'achankutapas ch'utikunqaku. Qanta rikuspataq llaksasqa q'aqchasqaraq pampapi tiyanqaku khatatatakuspallaña.

¹⁷Hinaspan kay llaki harawita takipusunkiku: ¡Ay, ikiraqmi thunisqa kashanki! ¡Ay, imaraqmi qochamanta ch'usaqyarqapunki, lliwpa reqsisqan llaqta! Qanqa runakunantinmi lamar-qochapi munayniyoq karqanki, qanqa lamar-qocha muyuriqpi suyukunatan q'aqcharqanki.

¹⁸Kunan urmaykapuqtiykin, lamar-qocha muyuriqpi suyukuna manchakuymanta khatatatanku. Kunan ch'usaq tukurqapuqtiykin, lamar-qochapi islakuna llaksakunku, nispa.

¹⁹Ñoqa Apu Señor Diosmi nini: Runaq mana tiyananta hinan raqay-raqay kanaykikama thunisqayki. Lamar-qochawanmi millp'uchisqayki,

²⁰hinaspan chinkaykachisunki wañuqkunaq kasqankamaraq, ñawpa runakunaq kasqanman. Wiñaypaq raqay-raqay kaq ukhumanmi wikch'uykusqayki, wañupuqkunawan kuskan kapunki. Chaymantaqa manapuniñan kutimunkiñachu, manataqmi wakmanta sayarichisqañachu kanki kay pachapi tiyaqkunawan kanaykipaq.

²¹Manchakuymanpunin tukuchisqayki, hinan mana kapunkiñachu, maskhasunkikun, manapunitaq pillapas tarisunkikuñachu. Ñoqa Apu Señor Diosmi chayta nini, nispa.