Read Diospa Simin Qelqa EZEQUIEL 3 Bible Online

EZEQUIEL 3 - Diospa Simin Qelqa bible

EZEQUIEL 3

¹Niwarqantaq: Qan, runaq churin, kay qelqa k'uyuta mikhuy,[1] hinaspa phaway Israel runakunata rimapayaq, nispa.

²Hinan ñoqaqa simiyta hanllarirqani, paytaq qelqa k'uyuta mikhunaypaq qowarqan.

³Chaymantataq niwarqan: Kay qelqa qosqayta mikhuspa saksaykuy, nispa. Mikhuykuqtiytaq sumaq kasqa miel misk'i hina añakallaña.

⁴Chaymantataq niwarqan: Qan, runaq churin, ¡phaway! Israel llaqtaman imatachus ñoqaq “paykunaman niy” munasqayta willamuy.

⁵Manan qantaqa kachasqayki mana yachasqa sasa rimay rimaq llaqtamanchu, aswanpas Israel llaqtallamanmi.

⁶Manallataqmi qanpa mana yachasqayki sasa rimaykunata rimaq askha suyukunamanpaschu kachasqayki. Chay llaqtakunaman kachaqtiypas chaykunaqa uyarisunkipunin.

⁷Israel llaqtaymi ichaqa manapuni uyariytapas munasunkichu, mana ñoqata kasuyta munawasqankurayku. Llapanmi Israel llaqtaqa mana kasukuq k'ullukuna kanku.

⁸Ñoqataqmi qanta ruwasqayki paykuna hina k'ulluta mana nanachikunaykipaq.

⁹Qespi rumita hinan ch'ilata ruwasqayki, qaqamantapas aswan ch'ilataraq. Paykunataqa amapunin manchakunkichu, millay mana kasukuq uyantinña kashaqtinkupas, nispa.

¹⁰Chaymantapas nillawarqantaq: Qan, runaq churin, allintapuni uyariy lliw ima nisqaytapas, allinta hap'iy sonqoykipi.

¹¹Hinaspataq riy kamachi-kaypi kashaq llaqta-masiykikunaman, hinaspa nimuy: Ahinatan nin Apu Señor Diosqa, nispayki, uyarichunkupas amapas, nispa.

¹²Hinan Diospa Espiritun hoqariwarqan, qhepaypitaq uyarirqani manchay raphapapayta: “Señor Diospa lliphlli-kayninta hanaq pachapi yupaychaychis”, nispa nishaqta.

¹³Chay raphapapaytaqa kawsashaqkunaq raphrankunan ruwasqa paykunapura waqtanakuspan, hinallataq paykunawan kaq ruedakunapas. Chay raphapapaytaq karqan pacha kuyuy hinaraq.

¹⁴Diospa Espirituntaq chaymanta horqorqowaspa aparikuwarqan, ñoqataq kasharqani khuyaytaq phiñasqataq, Señor Diostaq ichaqa qaqatapuni makinwan hap'ishawarqan.

¹⁵Hinan chayarqani Quebar mayu patapi Tel-Abibman. Chaypin kamachi-kaypaq apasqa Israel runakuna tiyasharqanku, ñoqataq paykunawan qanchis p'unchayta tiyaykuspa, mana imata ruwaspa musphasharqani.

¹⁶Qanchis p'unchay qhepatataq Señor Diosqa niwarqan:

¹⁷Qan, runaq churin, Israel llaqta qhawaqtan churayki. Chay hinaqa allinta uyariway, ñoqaq sutiypitaq anyay, nispa.

¹⁸Huk huchayoq runata: Wañunkipunin, nishaqtiy mana willankichu manataq rimapayallankipaschu: Huchallapi kawsayniykita saqepuy kawsanaykipaq, nispa chayqa, huchan hawan payqa wañupunqa, ñoqataq qanmanta cuentata mañasqayki chay runaq wañusqanmanta.

¹⁹Qantaqchus huchasapata anyanki chayqa, paypuni millay ruwayninta huchallikuynintapas mana saqenqachu chayqa, huchan hawan wañupunqa, qantaqmi ichaqa qespikunki.

²⁰Huk chanin runa chanin kayninta saqepuspa mana chaninta ruwanman, ñoqataq chay runaq urmananpaq hina pruebata churayman, qantaq mana payta: Paqtataq wañuwaq, nispa niwaqchu chayqa, chay runan huchan hawa wañupunqa, ichaqa wañusqanmantan cuentata mañasqayki.

²¹Qantaqchus chay chanin runata niykuwaq ama huchallikunanpaq, paypas manataq huchallikunmanchu chayqa, kawsanqapunin, willasqata kasukusqanrayku, qanpas kawsayniykita qespichikunkin, nispa.

²²Chaymantataq Señor Diosqa llamiykuwaspa niwarqan: Sayarispa riy haqay pampaman, chaypin rimapayasqayki, nispa.

²³Ñoqataq pampaman puririrqani, chaypitaq Señor Diospa lliphlli-kayninta rikumurqani, Quebar mayu patapi rikusqayta hina. Uyanpamantataq wikch'ukurqani,

²⁴Diospa Espirituntaq ichaqa ñoqaman haykuykuwaspa sayarichiwarqan. Niwarqantaq: Riy wasiykita hinaspa wisq'akamuy.

²⁵Qan, runaq churintaqa watanakunawanmi wataykusunkiku, chay hinapin llaqtaman mana lloqsiyta atinkichu, manañataq paykunawanpas kayta atinkichu.

²⁶Chaymantapas ñoqan qalluykita simiykiman k'askarqachisaq upayapunaykipaq, manataq paykunata anyayta atinkichu millay mana kasukuq uyantin kaqtinkupas.

²⁷Ñoqa rimaykuqtiymi simiykiqa kicharikapunqa, hinan paykunata ninki: Ahinatan Apu Señor Diosqa nin, nispa, pipas uyariyta munan chayqa uyarichun, mana uyariyta munaqqa amapas uyarichunchu, mana kasukuq llaqta kasqankurayku, nispa.