Read Diospa Simin Qelqa EZEQUIEL 31 Bible Online

EZEQUIEL 31 - Diospa Simin Qelqa bible

EZEQUIEL 31

¹Chunka hukniyoq wataq chunka kinsayoq killanpa qallariy p'unchayninpin Señor Diosqa niwarqan:

²Qan, runaq churin, Egipto rey Faraonta llapan runankunatawan niy: ¿Hatun kayniykiqa imamantaq rikch'akunman? Qhawariy Asiria suyuta:

³Rikch'akunmi ciprés mallkiman, huk niypitaq Líbano cedroman, mallki-mallkitan sumaq k'allmanwan llanthushan, hatun-kayninpas phuyumanraq aypashan.

⁴Paytaqa unun wiñananpaq yanaparqan, pukyumanta unukunan wiñachirqan, muyuriqninpin mayu hinaraq puririrqan, puririspataq campo mallkikunatapas qarparqan.

⁵Askha unuq kasqanraykun mallki-mallkipi mallkimanta aswanta wiñarqan, k'allmankunan yapakuspa phanchirirqan.

⁶Imaymana rikch'aq urpikunan k'allmankunapi q'esachakurqan, llapan salqa animalkunapas paypa llanthunpin miraykurqan, llapa hatun suyukunan llanthuyninpi tiyarqanku.

⁷Ancha sumaq hatun mallkin karqan phanchirisqa hatuchachaq k'allmakunayoq, saphinkunapas hallp'a ukhu unumanraqmi ayparqan.

⁸Diospa huertanpi cedropas manan pay sayayqa karqanchu, manan mayqen pinopas pay hina k'allmayoqqa karqanchu, manan mayqen plátano mallkipas pay hina k'allmayoqqa karqanchu, Diospa huertanpi mayqen mallkipas manan munay-kayninpi rikch'akurqanchu.

⁹Ñoqan sumaqyachirqani askha k'allmakunawan, Diospa huertanpi mallkikunapas llapanmi envidiakurqanku, nispa.

¹⁰Chayraykun Apu Señor Diosqa nin: Mallkitaq wiñarqan ñawinpas phuyuman aypanankamaraq, sinchita wiñaspataq umata hoqarirqan.

¹¹Chayraykun ñoqaqa wikch'uspa, hinata hap'iykachirqani wak atiyniyoq suyukunaq umallinman, chay umallin mallkita muchuchirqan millay kasqanman hina.

¹²Awqa sonqo wak llaqtayoqkunataq wit'urqospa wikch'usqata saqepurqan. K'allmankunan hinantin orqo-orqoman wayq'okunamanwan urmaykurqan, suyuntin k'aktukunapin p'akikurqan. Hinan llanthunpi tiyaq llapan suyukunaqa payta wikch'uspa ayqerikapurqanku.

¹³Kumpasqa mallkimanqa imaymana rikch'aq urpikunan tiyakuq hamurqanku, kaqllataq salqa animalkunapas k'allmanpi siriykurqanku.

¹⁴Chaymi kunanmantaqa manaña mayqen mallkipas unu patapiña kashaspapas chay sayaytapuniqa wiñanqañachu, hinaña allin qarpasqa kanqa chaypas manapunin ñawinqa phuyukamaraq taripanqañachu, chay hina sayayniyoq kanankamaqa. Llapanmi huchachasqa wañunanpaq kashan, Ukhu-pachaman haykuspa wañuqkunaman huñukuspa aya p'ampanapi kanankupaq.

¹⁵Apu Señor Diosmi nillantaq: Hatun mallki kumpakuspa Ukhu-pachaman haykuqtinmi, hallp'a ukhu unupas llakikuymanta lutokurqan, mayutapas phawaq unutapas kasqanpin sayachirqani. Ñoqan Líbano orqotapas tutayachirqani, hinan llapan sach'akunapas naq'epurqan.

¹⁶Wañusqakunaq kasqanman wañuqkunawan huñukuq haykupuqtinmi, kumpakusqanpa raqhaqaqayninqa suyukunataraq kuyurichirqan. Hinan chay hallp'aq ukhunpiña kashaq Edenmanta mallkikuna Libanomanta sumaq qarpasqa allinnin mallkikunapas paypa urmasqanmanta kusikurqanku.

¹⁷Chay mallkiq llanthunpi tiyaqkunapas paypa yanapaqninkunapas haykupullarqankutaqmi paywan kuska, ñawpaq awqa-tinkuypi wañupuqkunawan huñuykukuq.

¹⁸Edenpi mallkikunamantaqa manan mayqenpas pay hina karqanchu sumaq kayninpipas sayayninpipas, chaywanpas wakin mallkikuna hinan chinkaykurqan chay Ukhu-pachaman, mana iñiyniyoq runakunaq kasqanman, hinallataq awqa-tinkuypi wañuqkunaq kasqanman. Chay mallki, rey Faraonqa llapan runankunapiwanmi wañunqa. Ñoqa Apu Señor Diosmi chayta nini, nispa.