Read Diospa Simin Qelqa EZEQUIEL 33 Bible Online

EZEQUIEL 33 - Diospa Simin Qelqa bible

EZEQUIEL 33

¹Señor Diosmi niwarqan:

²Qan, runaq churin, llaqta-masiykikunata niy: Huk suyu contra awqata apamuqtiymi, chay llaqta runakuna paykuna ukhumanta llaqta qhawaqta akllakunqa,

³hinan chay llaqta qhawaqqa awqanpa soldadonkuna qayllaykamuqta rikuspa, trompetanta tocanqa runakunaman uyarichinanpaq.

⁴Trompetaq waqasqanta uyarishaspa mana kasukuqtaqa awqanmi chayarqamuspa sipirqapunqa, ichaqa pay kikillanpunin wañunanpaqqa huchayoq kanqa.

⁵Trompeta waqaqta uyarishaspa mana kasukuqqa, pay kikillanpunin wañusqanmanta huchayoq kanqa. Uyarispa kasukuqqa manan wañunmanchu karqan.

⁶Chay qhawaqtaqchus llaqtanman awqanpa chayamusqanta rikushaspa, trompeta tocaywan runaman mana willanmanchu chayqa, awqaq mayqen wañuchisqanpas kikinpa huchanmantan wañunqa, ichaqa chay runaq wañusqanmantaqa qhawaqtan huchachasaq, nispa.

⁷Runaq churin, qantan Israel llaqta qhawaqta churarqayki. Qanmi willamusqaykunata makilla uyarinki, hinaspan Israel runakunaman nimusqaykunata willanki.

⁸Huk huchasapata niyman: Yaw, huchasapa, wañunkipunin, nispa, chay runamantaq mana willawaqchu huchanta saqepunanpaq chayqa, chay runaqa wañunqan kaq huchanpi. Ñoqataq ichaqa wañusqanmanta qanta huchachasqayki.

⁹Qantaqchus chay huchasapaman huchanta saqepunanpaq willanki, paytaq mana kasukunqachu chayqa, kikin huchallanpin wañupunqa, qantaq ichaqa mana huchachasqañachu kanki, nispa.

¹⁰Qan, runaq churin, Israel runakunata niy, qankunaqa nishankichis: Ñoqanchisqa kashanchis millay huchanchiskunaq ñit'iykusqanmi. Chayraykun kawsayninchispi t'awiykapushanchis. ¿Imaynatapunitaq kawsaytari atisun? nispa.

¹¹Chay hinaqa niy, Apu Señor Diosmi nin: Sutiyrayku juraspan nini, manan munanichu huchasapaq wañunanta, aswanmi huchankuta saqepuspa kawsanankuta munani. Qankunapas, Israel runakuna, millay huchaykichista wikch'upuspa ñoqaman kutirikampuychis. ¿Imanaqtintaq huchaykichispiri wañuwaqchis? nispa.

¹²Qan, runaq churin, llaqta-masiykikunata niy: Chanin runachus huchallikunqa chayqa, ñawpaq chanin kasqanwanqa manan qespisqachu kanqa. Kaqllataqmi huk millay huchasapapas saqepunqa millay kayninta chayqa, ñawpaq millay-kayninmantaqa manan wañunqachu. Chanin runapas huchallikunqa chayqa, ñawpaq chanin-kayninqa manan valenchu kawsashanallanpaq.

¹³Ñoqataq niyman chanin runata: Kawsankin, nispa, paytaq chanin-kayninman hap'ipakuspa, mana allinkunata ruwapunqa chayqa, ima allin ruwasqankunapas mana valeqmi kapunqa, aswanpas wañullanqapunin mana allin ruwasqankunamantaqa.

¹⁴Huk huchasapa runatachus niyman: Cheqaqtapuni huchaykimanta wañunki, nispa, chay runataq hucha ruwayta saqepuspa allinkaqta chaninkaqtawan ruwapunman chayqa, kawsanqapunin.

¹⁵Kutichipunmantaq manumanta ima hap'isqatapas suwakusqanmantapas, kawsananpaq kamachikuy simiytapas hunt'allanmantaq, lliw huchallikuykunatapas saqepunmantaq chayqa, cheqaqtapunin mana wañunqachu.

¹⁶Allin kaqtataq chaninkaqtawan ruwapunqapas chayqa, kawsallanqapunin, ñawpaq millay hucha ruwasqankunapas manañan yuyarisqañachu kanqa.

¹⁷Chaywanpas llaqta-masiykikunaqa ninkun: Señor Diospa ruwasqankunaqa manan chaninchu, nispanku, ichaqa paykunan mana chanin ruwaqkunaqa kashanku.

¹⁸Huk chanin runataq chanin-kayta saqepuspa mana allinkunata ruwapunman chayqa, wañullanqapunin ruwasqanmantaqa.

¹⁹Huk huchasapa runataqchus millay kayninta wikch'upuspa allinkaqta chaninkaqtawan ruwapunman chayqa, kawsallanqapunin.

²⁰Chaywanpas, Israel runakuna, qankunaqa nishallankichispunin: Señor Diospa ruwasqankunaqa manan chaninchu, nispaykichis. Ñoqataqmi qankunata ruwasqaykichisman hina juzgasqaykichis, nispa.

²¹Kamachi-kaypaq apachikusqaykumanta chunka iskayniyoq wataq chunka killanpa phisqakaq p'unchayninpin huk ayqekuq runa Jerusalenmanta chayamurqan, hinaspan willawarqan: ¡Jerusalenmi awqakunaq makinman urmaykun! nispa.

²²Ayqekuq runaq chayamunan ñawpaq ch'isin ñoqata Señor Diosqa llamiykuwarqan. Hinan tutamanta runa chayarqamuqtinpacha upa-kayniymanta Señor Diosqa rimarichiwarqan.

²³Chaymantataq Señor Diosqa niwarqan:

²⁴Runaq churin, Israel suyuq raqay-raqayninpi tiyaq runakunan kay hinata rimakuspa purishanku: Hinaña Abrahamqa sapallan karqan chaypas, suyuntin hallp'an paypaqa karqan. Ñoqanchisqa askhamá kanchis, chay hinaqa, llapanmi ñoqanchispa, nispanku.

²⁵Chayrayku paykunata niy, Apu Señor Diosmi nin: Qankunaqa aychatan yawarnintinta mikhunkichis, idolokunatan yupaychankichis, runakunatan wañuchinkichis. ¿Chaychu suyuntintaraq hap'ikapuyta munankichis?

²⁶Qankunaqa maqanakuq, usqhaylla phawariq, cheqnikusqaykuna ruwaq, llapallaykichis runa-masiykichispa warminwan wasanchaqkunan kankichis. ¿Chay hina runachu suyuntinta hap'ikapuwaqchis? nispa.

²⁷Nillaytaq: Apu Señor Diosmi nin: Sutiyrayku juraspan nini, chay raqay-raqaypi tiyaq runakunapas wañuchisqan kallanqakutaq, wak pampakunapi tiyaqkunatataqmi salqa animalkuna mikhupunqa. Qaqa wasikunapi pakakuqkunatataqmi onqoywan wañuchisaq.

²⁸Suyutaqa llapantapunin purunyachipusaq, uma hoqarichiq kallpantapas chinkachisaqpunin. Israelpa orqonkunapas ch'inmi kapunqa, manapunin pillapas chaynin puriqqa kanqachu.

²⁹Millay p'enqay huchallikusqanmanta kay suyuta llapanta purunyachiqtiymi, reqsiwanqaku ñoqa Señor Diosqa kasqayta, nispa.

³⁰Nillawarqantaq: Qan, runaq churin, llaqta-masiykikunan qanmanta rimanku perqa k'uchukunapi, wasi punkukunapi. Hukmanta huktaq asikuspa ninakunku: Hamuychis, uyarisun ima willakuychá Señor Diospa kashan chayta, nispa.

³¹Hinaspan llaqtay hamuspa uyariq chimpaykamusunkiku, imaynan parlasqaykitaqa uyariq hamullankupuni chay hinata, ñawpaqeykipin tiyaykunku, ichaqa manan kasukunkuchu. Paykunaqa simillankuwanmi ñoqamanta sumaqta rimarinku, sonqonkuwantaq ichaqa qolqellatapuni munapakushanku.

³²Paykunaqa sumaq takiqta, munay kunkawan takiqta, allin arpa tocaqta hinallan qhawarisunkiku. Rimasqaykitapas uyarinkun, ichaqa manan ruwaytapuniqa munankuchu.

³³Chaywanpas lliwpunin hunt'akunqa, hunt'akuqtintaqmi yachanqaku paykuna ukhupi huk profeta kasqanta, nispa.