Read Diospa Simin Qelqa EZEQUIEL 35 Bible Online

EZEQUIEL 35 - Diospa Simin Qelqa bible

EZEQUIEL 35

¹Señor Diosmi niwarqan:

²Qan, runaq churin, Seir orqo ladoman kutirispa pay contra profetizay,

³Apu Señor Diosmi nin: Yaw, Seir orqo, ñoqan qanpa awqayki kani, chaymi muchuchisqayki raqay-raqay ch'usaqman tukuchispa.

⁴Llaqtaykikunatapas lliwtan thunisaq, qantaqmi purunman tukuchisqa kapunki, chay hinapin reqsiwanki ñoqa Señor Diosqa kasqayta.

⁵Qanqa ñawpaqmantapas Israelpa awqallanpunin karqanki, paykunaqa huchankunamanta p'uchukay hatun ñak'ariyta chaskishaqtinkun, qanqa espadawan wañuchirqanki.

⁶Chaymi ñoqarayku rimarini qantaqa wañuymanpuni hap'ichinaypaq, hinan wañuyqa qatiykachasunki. Runa wañuchiyta mana manchakuqtiykin, wañuypas mana manchakusunkichu.

⁷Seir orqo, pasaqtan purunyachisqayki, pipas qanninta puriqtaqa wañuchisaqmi.

⁸Orqoykikunata, moqoykikunata, wayq'oykikunata, k'ahaykikunatapas awqa-tinkuypi wañuq ayakunawanmi hunt'aykachisaq.

⁹Wiñaypaqmi purunyachipusqayki, hinan manapuni pillapas llaqtaykikunapi tiyanqañachu, chaymi qankunaqa reqsiwankichis ñoqa Señor Diosqa kasqayta.

¹⁰Ñoqa Señor Dios chaypi tiyashaqtiymi, qanqa nirqanki: Israel suyuta, Judá suyuta llaqtankunantintakama hap'ikapuspan tiyasaq, nispayki.

¹¹Chayrayku, ñoqa Apu Señor Diosqa sutiyrayku jurani, imaynatan Israelpaq phiñakurqanki, payta cheqnikurqanki, envidiakurqanki, chay hinallatataqmi ñoqapas muchuchisqayki. Qanta muchuchiqtiymi paykuna reqsiwanqaku.

¹²Chay hinapin yachanki Israelpa orqonkuna contra imaymana k'amisqayki uyarisqayta. Qanmi nirqanki: Kunanqa purunyasqan kapun, atinchismi oqorqoyta, nispayki.

¹³Simiykichista hanllarispan ñoqa contra rimarqankichis, chaytataq uyarirqani.

¹⁴Chayraykun ñoqa Apu Señor Diosqa niyki: Qanta pasaqta thuniqtiymi lliw pachantin kusikunqaku.

¹⁵Qanmi Seir orqo kusikurqanki Israelqa huchanmanta purunyachisqa kashaqtin, chay hinallataqmi qanwanpas kanqa, qanmi Edom suyuntin pasaq purunyachisqa ch'inneqman tukupunki, hinan llapanku yachanqaku ñoqa Señor Diosqa kasqayta, nispa.