Read Diospa Simin Qelqa EZEQUIEL 36 Bible Online

EZEQUIEL 36 - Diospa Simin Qelqa bible

EZEQUIEL 36

¹Qan, runaq churin, Israelpa orqonkunata profetizaspa niy, Israelpa orqonkuna, Señor Diospa siminta uyariychis.

²Apu Señor Diosmi nin: Awqaykichismi qankunamanta nirqan: ¡Hahaháy! ¡Chay ñawpa orqokunaqa ñoqaqñan! nispa.

³Chayrayku profetizay, Apu Señor Diosmi nin: Hinantin cheqasmantan qankunaman awqaykichisqa phawaykamuspa llat'anarqasunkichis, llapan wak llaqtayoqkunan qankunata munaychakurqasunkichis, hinaspataq runakuna pisicharqasunkichis rimakurqasunkichis ima.

⁴Chayrayku, Apu Señor Diospa rimasqanta uyariychis Israelpi orqokuna, moqokuna, k'ahakuna, wayq'okunapas. Señor Diosmi qankunata raqay-raqay kaqkunata, ch'usaqyachisqa llaqtakunata nin: Muyuriqniykichispi suyukunan llat'anarqasunkichis asipayarqasunkichis,

⁵chaymi ñoqa Apu Señor Diosqa k'arakta phiñakuspa rimarirqani wakin suyukuna contra Edom contrapiwan. Paykunan millay yuyaywan hatun kusikuypiwan hallp'ayta munaychakurqanku pasaqtapuni llat'ananankupaq, nispa.

⁶Chayrayku, Israel suyumanta profetizaspa, orqokunata, moqokunata, k'ahakunata, wayq'okunatapas niy, Apu Señor Diosmi nin: Wak suyukunan qankunata pisichaspa asikurqanku, chaymantan ñoqaqa sonqo nanasqa phiñasqa kashani.

⁷Chayraykun makiyta hoqarispa ñoqa Apu Señor Diosqa jurani, muyuriqniykichispi suyukunapas pisichasqa asipayasqa kanankupaq.

⁸Qankunataq Israel suyu orqokuna, k'allmasapa mallkikunaq wiñasqan kankichis, askhatataq ruruchinkichis Israel wawaykunaq mikhunanpaq, paykunaqa kutimunan patapiñan kashanku.

⁹Ñoqan qankunata yanapasqaykichis, hinan tarpusqa t'akasqa kankichis.

¹⁰Israel llaqtayta qanpi tiyaykachispaymi askhatapuni mirachisaq. Llaqtakunamanmi runakuna hunt'aykunqa, raqaykunaq kasqanpin wakmanta wasichakunqaku.

¹¹Qankuna patamanmi miraykachisaq runakunata uywakunatapas askhallaña kanankupaq. Ñawpa hinan askha wasikuna kapunqa, qankunapas ñawpaqmantaqa astawan allinmi kapunkichis. Hinaspan reqsiwanqaku ñoqa Señor Diosqa kasqayta.

¹²Israelpi orqokuna, qankuna patapin llaqtay runata purichisaq, paykunataqmi qankunata herenciankupaq hap'ikapusunkichis, hinan qankunaqa mana hayk'aqpas wawankuta qechunkichisñachu, nispa.

¹³Apu Señor Diosmi orqokunamanta nillantaq: Qankunamantan rimanku: Runakunata mikhuq, llaqtaq wawankuna ch'usaqyachiq, nispa.

¹⁴Chay hinaqa, amañayá kunanmantaqa runa mikhuqchu kanki, amataq llaqtaq wawan ch'usaqyachiqpaschu kanki. Ñoqa Apu Señor Diosmi chayta nini.

¹⁵Manan munanichu wak suyukunaq wakmanta k'aminasuykichista, manañan chay suyukunaq asipayasqanta uyarinkichisñachu, qankunaqa manañan llaqtaq wawan ch'usaqyachiqñachu kankichis. Ñoqa Apu Señor Diosmi chayta nini, nispa.

¹⁶Señor Diosmi niwarqan:

¹⁷Qan, runaq churin, uyariway. Suyunkupi tiyashaspankun Israel runakunaqa qhellichakapurqanku millay ruwasqankuwan. Paykunaq kawsayninkun ñoqapaqqa karqan killanwan kashaq warmiq qhellin hina.

¹⁸Chaymi k'arakta phiñakuspa paykunata muchuchirqani, suyupi runakunata wañuchisqankumanta idolokunata yupaychaspa hallp'ata qhellichasqankumantawan.

¹⁹Kaqllataq hinantin llaqtakunaman suyukunamanwan ch'eqeykachirqani, ñoqan juzgarqani ruwasqankuman hina.

²⁰Ichaqa hinantin chayasqanku suyupin ch'uya sutiyta pisicharqanku, chay runakunataq nirqanku: Kaykunaqa Señor Diospa llaqtanmi, chaywanpas ichaqa suyunkumantan qarqochikamurqanku, nispa.

²¹Israel runakunan hinantin suyuman chayasqankupi ch'uya sutiyta pisicharqanku, chayraykun yuyaykurqani sutiyta mana pisichanankupaq.

²²Chay hinaqa Israel runakunata niy, Apu Señor Diosmi nin: Israel runakuna, hinantin suyukunaman chayasqaykichispin ch'uya sutiyta pisicharqankichis. Kunan imatachus ruwasaq chayqa manan qankunaq allinniykichispaqchu kanqa, aswanmi ch'uya sutiy hatunchasqa kananpaq kanqa.

²³Qankunan sutiyta suyukunapi pisicharqankichis, ñoqataqmi suyukunaman rikuchisaq may ch'uyataq hatuntaq sutiyqa kasqanta, hinan paykuna yachanqaku ñoqa Señor Diosqa kasqayta. Qankunata imaynatachus ruwasqaywanmi suyukunaman rikuchisaq ñoqa ch'uya kasqayta. Ñoqa Apu Señor Diosmi chayta nini.

²⁴Chay hinantin llaqtakunamanta suyukunamantawanmi ñoqa horqokampusqaykichis, huñurqospaymi suyuykichisman kutichimpusqaykichis.

²⁵Ch'uya unuwanmi ch'aqchusqaykichis, hinan qankuna ch'uyanchasqa kankichis. Ch'uyanchasqaykichismi llapan qhelliykichiskunamanta idoloykichiskunamantawan.

²⁶Mosoq sonqotawan mosoq yuyaytawanmi churasqaykichis. Qechupusqaykichismi chay rumi sonqoykichista, hinaspan kasukuq sonqota churasqaykichis.

²⁷Qankunamanmi Espirituyta qosqaykichis, hinaspan kamachikuy simiykunata unanchasqa simiykunatawan kasukuqta ruwasqaykichis.

²⁸Ñawpa taytaykichisman qosqay suyupitaqmi tiyakapunkichis, hinaspan llaqtay kankichis, ñoqataq Diosniykichis kasaq.

²⁹Lliw qhellichaqniykichismantan qespichisqaykichis. Chakraykichistan kamachisaq askha trigota ruruchinanpaq, yarqaywanpas manañataqmi muchuchisqaykichischu.

³⁰Hinallataq mallkikunatapas mikhuykunatapas allinta ruruchisaq, manañan yarqay kanqachu wak suyukunaq qayllanpi p'enqasqa kanaykichispaq.

³¹Chaymantataq millay-kayniykichismanta mana chanin ruwasqaykichismantawan yuyarispaykichis, qankuna kikillaykichismanta millakapunkichis huchaykichismanta millay ruwasqaykichismantapas.

³²Israel runakuna, ñoqa Apu Señor Diosmi nini: Allinta yachaychis, kaytaqa ruwani manan qankunaraykuchu, aswanpas millay mana chanin ruwasqaykichismanta p'enqakunaykichispaqmi, nispa.

³³Ñoqa Apu Señor Diosmi nini: Lliw huchaykichiskunamanta ch'uyanchaqtiymi, tiyakapunkichis llaqtaykichispi, hinaspanmi raqaykunata allicharispa wasichakapunkichis.

³⁴Ch'inneq purunman tukupuq hallp'an yanqa ch'in kashanantaqa tarpusqa kapunqa, llapa chayninta puriqkunaq qhawarinankupaq.

³⁵Hinan ninqaku: Kay ch'in hina kapuq hallp'amá, kunanqa Edén huerta hinaraq kapusqa, thunisqa q'asuykusqa raqay-raqay llaqtapas kunanqa wasikunawan hunt'aykusqan, allin perqasqa pakakuna llaqtan kapusqa, nispa.

³⁶Chay hinapin muyuriqniykichispi suyukuna yachanqaku ñoqa Señor Diosqa thunisqaytapas sayarichiq kasqayta, purunyasqatapas tarpuq kasqayta. Ñoqa Señor Diosqa nisqaytaqa ruwasaqpunin, nispa.

³⁷Ñoqa Apu Señor Diosmi nillanitaq: Huk kutimantawanmi Israel runakunaq mañakusqanta uyarisaq, hinallataq paykunata askhayachisaq ovejata hinaraq.

³⁸Thunispa purunyachisqa raqay-raqay llaqtakunan askha runawan hunt'aykusqa kanqa, Jerusalenpi fiestaman ovejakunata sacrificanapaq qatimunku chay hinaraqmi kanqa. Chay hinapin reqsiwanqaku ñoqa Señor Diosqa kasqayta, nispa.