Read Diospa Simin Qelqa EZEQUIEL 39 Bible Online

EZEQUIEL 39 - Diospa Simin Qelqa bible

EZEQUIEL 39

¹Qan, runaq churin, Gog contra profetizaspa niy, Apu Señor Diosmi nin: Yaw Gog, qanmi kanki Tubal suyuq Mesec suyuq umallinkunaq qollanan, ñoqan kani awqayki.

²Kutirichimuspaymi aysamusqayki karuy-karu wichay ladomanta, hinaspan pusamusqayki Israelpi orqokuna contra.

³Chaymantataqmi lloq'e makiykipi hap'isqayki p'eqtaykita p'akisaq, paña makiykipi wach'ikuna apasqaykitapas kacharichisqaykin.

⁴Qantaqmi soldadoykikunantin, puriysiqniyki llapa suyukunantin Israel orqokunapi wañurankichis. Chaypin ayaykichista qaraykusaq imaymana rikch'aq phalaq animalkunaman, salqa animalkunamanwan.

⁵Q'ala pampapin urmankichis, ñoqa Señor Diosmi chayta nini.

⁶Magog suyutan ninawan kanaykusaq lamar-qocha patapi llakhilla tiyaq llaqtakunatawan, chaywanmi reqsiwanqaku ñoqa Señor Diosqa kasqayta.

⁷Israel llaqtay chawpipin ch'uya kasqayta reqsichikusaq, ñoqaq sutiyta sarunchawanankutaqa manañan hinallatachu qhawasaq, wak suyukunataq yachanqaku ñoqa Señor Diosqa, Israelpi Ch'uya Dios kasqayta.

⁸Apu Señor Diosmi nillantaq: Rimasqay p'unchayqa chayamunqapunin.

⁹Chay p'unchaymi Israel suyu llaqtakunapi tiyaqkuna lloqsispa imaymana rikch'aq armakunawan wayk'ukunqaku, chay hinapin ruphachinqaku p'eqtakunata, wach'ikunata, chanqana lanzakunata, maqanakunata, escudokunatapas. Chaykunan kanqa qanchis watantin nina rawrachinapaq llant'a hina.

¹⁰Chay armakunan kanqa wayk'unankupaq, chaymi manaña llant'ata llant'aqpas pampakunata rinqakuchu, manallataq sach'a-sach'akunapi ch'eqtata ch'eqtaqpas rinqakuñachu. Paykunan llat'ananqaku ñawpaq llat'anaqninkuta, ch'utinqakutaq ñawpaq ch'utiqninkuta. Ñoqa Apu Señor Diosmi chayta nini.

¹¹Chay p'unchaypin Israelpi huk cheqasta Gogman qosaq p'ampasqa kananpaq. Chay cheqasqa Kachi Qochaq inti lloqsimuy ladonpi “Puriqkunaq Wayq'on” nisqan. Chaypin Gogtaqa llapan soldadonkunantinta p'ampapunqaku, hinan ñan purinata hark'anqa, sutintataqmi churanqaku: “Gogpa Soldadonkunaq Wayq'on” nispanku.

¹²Israel runakunan suyunkuta ch'uyanchanankupaq qanchis killantin ayakunata p'ampanqaku.

¹³Llapan runakunan aya p'ampasqallankupiña usqhanqaku, atipaspa hatunchasqa kasaq chay p'unchaymi paykunapas chay ruwasqankumanta alabasqa kanqaku. Ñoqa Apu Señor Diosmi chayta nini.

¹⁴Qanchis killa qhepatan huk t'aqa runata kachanqaku suyuntinta qhawaraqta, paykunan ima ayatapas tarimuspankuqa p'ampamunqaku, chay hinapin paykunaqa suyukunata ch'uyanchanqaku.

¹⁵Chay runakunamanta mayqellanpas suyuntinta purisqanpi runa tulluta rikunqa chayqa, chay cheqastan tuyruykunqa aya p'ampaqkunaq “Gogpa Soldadonkunaq Wayq'on” nisqapi p'ampanankupaq.

¹⁶Chay hinapin suyuta ch'uyanchanqaku. Chay wayq'o qayllapiqa kallanqataqmi huk llaqta “Soldadokunaq Llaqtan” nisqa.

¹⁷Qan, runaq churin, uyariway, ñoqa Apu Señor Diosmi niyki: Waqyay llapan salqa animalkunata, phalaq animalkunatawan, hinantinmanta huñukamuspa Israelpi orqokunaman hamunankupaq. Chaypin paykunapaq hatun sacrificiota wakichishani, aychatan mikhunqaku, yawartan ukyanqaku.

¹⁸Allin qharikunaq aychantan mikhunqaku, kay pacha kamachikuqkunaq yawarnintan ukyanqaku. Chay soldadokunan kanqa Basán suyumanta wirayachisqa borregokuna, anejokuna, orqo cabrakuna, torokuna hina nak'asqa.

¹⁹Chay wakichisqay mikhunamantan wiranta mikhunqaku onqonankukamaraq, yawartapas ukyanqaku machanankukamaraq.

²⁰Mesaypin saksanqaku caballo aychawan, sillakuqkunaq aychanwan, soldadokunaq aychanwan, allin qharikunaq aychanpiwan. Ñoqa Apu Señor Diosmi chayta nini.

²¹Chay hinapin qhapaq-atiyniyta rikuchisaq wak suyukunaman, llapan suyukunataq yachanqaku paykunata hap'irqospa muchuchiq kasqayta.

²²Chay p'unchaymantapachan Israel runakunaqa yachanqaku ñoqa Diosninku Señor Dios kasqayta.

²³Yachallanqakutaqmi wak suyukunapas Israel runakunaqa wasanchawasqanku huchankumanta kamachi-kaypaq aparparisqa kasqankuta. Mana chanin kasqankumantan ñoqapas qheparparipurqani, hinaspan awqankuman hap'iykachirqani, hinan awqa-tinkuypi wañupurqanku.

²⁴Ñoqaqa millay mana chanin kasqankuman hinapunin muchuchirqani, chaymi qheparparirqani.

²⁵Chayraykun ñoqa Apu Señor Diosqa nini: Kunanqa wakmantan Jacobpa mirayninta t'ikarichisaq, hinaspan llapan Israelta khuyapayasaq. Ch'uya sutiymantapas sientesaqtaqmi.

²⁶Huk kutimantawanmi suyunkupi mana piqpa rimapayasqan tiyakunqaku, chay pachataqmi paykunaqa qonqapunqaku ñoqa wasanchawasqanku huchankutapas, p'enqakuyninkutapas.

²⁷Awqankuq suyunkunapi ch'eqesqakunata huñuykuspaymi, chay suyukunamanta kutichimpusaq. Chaywanmi ch'uya kasqayta suyukunaman reqsichikusaq.

²⁸Hinan llaqtaypas yachanqa ñoqaqa Diosninku Señor Dios kasqayta, hinaña kamachi-kayman aparichirqani chaypas, kaqtan suyunkuman kutichimpusaq mana hukllatapas wikch'umuspa.

²⁹Manañataqmi qheparparisaqñachu, aswanpas Israel runakunamanmi Espirituyta kachaykamusaq. Ñoqa Apu Señor Diosmi chayta nini, nispa.