Read Diospa Simin Qelqa EZEQUIEL 41 Bible Online

EZEQUIEL 41 - Diospa Simin Qelqa bible

EZEQUIEL 41

¹Chaykuna qhepatan runaqa pusawarqan Ch'uya Cheqas ukhumanñataq, chaypin tupullarqantaq Ch'uya Cheqasman haykunaq perqanta, chay perqaq phatunmi kinsa metro hina kasqa.

²Punkuq anchontaq phisqa metro hina kasqa, punkuq sapa ladonpa perqantaq perqa k'uchukama iskay metro qkama kasqa. Chaymantataq tupurqan Ch'uya Cheqaspa ukhunta, chaytaq wask'anman iskay chunka metro hina kasqa, anchonmantaq chunka metro hina.

³Chaymantataq haykurqan ukhukaq wasimanñataq, hinaspan tupurqan punku tusata, rakhunmi huk metro hina kasqa. Haykunaq anchontaq kinsa metro hina kasqa, haykunaq sapa ladonpa perqantaq perqa k'uchukama qanchis metro hina kasqa.

⁴Chaymantataq tupurqan ukhukaq wasita, chaymi kasqa tawantin ladon chunka metrokama. Hinan niwarqan: Kayqa Ch'uyay-Ch'uya Cheqasmi, nispa.

⁵Chaymantapas runaqa tupullarqantaq Dios yupaychana wasi perqata, chaytaq kinsa metro hina phatu kasqa. Kallasqataq perqawan kuska cuartokuna, sapankataq iskay metro hina ukhuyoq kasqa.

⁶Chay cuartokunataqmi kinsa pata altosniyoq ruwasqa kasqa, sapanka patapitaq muyurisqa kinsa chunka cuartokuna. Dios yupaychana wasiq perqantaq sapa patapi aswan ñañu kasqa, chaymanmi chakasqaku cuartokunaq kurkunkunata, chay hinapin perqata mana t'oqorqankuchu.

⁷Dios yupaychana wasiq perqanmi sapa patapi aswan-aswanta ñañuyasqa, hinan chawpikaq pata cuartokunaqa pampakaq cuartokunamanta aswan ancho kasqa, kinsa patakaq cuartokunataq chawpikaq cuartokunamantapas aswan anchoraq kasqa. Kallasqataqmi chay cuartokunaman seqana gradaspas kinsakaq patakama.

⁸Ñoqataq rikurqani Dios yupaychana wasita ukhu patiomanta aswan alto patapi ruwasqata, ukhu patiomantaqa kinsa metro hina patapi ruwasqaraqmi kasqa.

⁹Chay patapi ruwasqañan kasqa cuartokunapas, chay cuartokunaq muyuriqninqa huk p'alta pata hinan muyurisqa, chaypa anchonmi iskay metro kuskan hina kasqa.

¹⁰Cuartokunaq perqanñataq iskay metro kuskan hina kasqa. Chay cuartokunaman haykunapaqmi iskay punku kasqa, hukmi Dios yupaychana wasiq wichay ladonpi, huktaq uray ladonpi.

¹¹Cuartokunaq k'uchunmanta ukhu patiopi kaq sacerdotekunaq wasi perqan k'uchukama chunka metro hina kasqa.

¹²Dios yupaychana wasiq inti haykuy ladonpi huk hatun wasitaq kasqa, anchonman kinsa chunka phisqayoq metro hina, wask'anmantaq tawa chunka phisqayoq metro hina, iskay metro kuskannin hina phatu perqayoq.

¹³Runataq tupurqan Dios yupaychana wasita, hinan llapanpi kasqa wask'anman phisqa chunka metro hina. Tupullarqantaq Dios yupaychana wasiq qhepanmanta inti haykuy ladopi hatun wasiq qhepankama, chaymi kasqa phisqa chunka metro hina.

¹⁴Dios yupaychana wasiq ñawpaqen patiotaq wichay ladopi kaq sacerdotekunaq wasinmanta uray ladopi kaq sacerdotekunaq wasinkama phisqa chunka metro hina kasqa.

¹⁵Chaymantapas tupullarqantaq inti haykuy ladopi hatun wasiq ñawpaqenta llapan pasanakuq wasintinta, chaypas kallasqataq phisqa chunka metro hina. Ch'uyay-ch'uya Cheqaspas, Ch'uya Cheqaspas, haykuna wasipas,

¹⁶punkukunaq sarunanpas llapanmi tablawan qatasqa kasqa, sapanka wasiqmi k'ullu marcoyoq huch'uy ventanankuna kasqa. Llapanpunin tablawan qatasqa kasqa pampanmantapacha ventanakama, ventanakunapas wisq'ana hinalla kasqa.

¹⁷Chay qatasqa tablapin llapanpipuni muyuriq ukhupi punku hawakamaraq

¹⁸k'awaspa dibujasqa querubinkuna palmera sach'akunapiwan kasqa. Chay querubinkunan palmera sach'akunawan chawpinasqa kasqa. Sapanka querubinkunataq iskay uyayoqkama kasqa,

¹⁹huk uyanmi runaq uyan hina kasqa, palmera sach'a qhawantin, hukkaq uyantaqmi leonpa uyan hina kasqa, huk lado palmera sach'a qhawantin. Llapanmi chay hinakama kasqa Dios yupaychana wasiq muyuriqnintinpi.

²⁰Ch'uya Cheqaspa perqanpin pampanmantapacha punkuq hawankamaraq k'awaspa dibujasqa querubinkuna palmera sach'akuna ima kasqa.

²¹Ch'uya Cheqaspa punkunpi kurkutaq tawa esquinayoq llaqllasqa kasqa.

²²Ch'uyay-ch'uya Cheqasman haykunapin k'ullumanta altarman yaqa rikch'akuq kasqa, sapanka ladontaq huk metrokama kasqa, sayayninmantaq huk metro kuskannin hina kasqa. Esquinankunapas, teqsinpas, sapa ladonpas k'ullumantan kasqa. Runataq niwarqan: Kaymi Señor Diospa ñawpaqenpi kaq mesa, nispa.

²³Ch'uya Cheqaspas, Ch'uyay-ch'uya Cheqaspas iskay ladoman kichakuq punkuyoqmi kasqa,

²⁴sapanka punkutaq iskayman q'echukuqkama kasqa.

²⁵Ch'uya Cheqaspa punkuntaq kasqa k'awaspa dibujasqa querubinkunayoq palmera sach'akunayoq ima, imaynan perqanpipas karqan chay hina. Haykuna wasiq hawa punku mat'inpitaq tablamanta llanthuna kasqa.

²⁶Chay wasiq sapa ladonpin ventanakuna kasqa, ventanakunaq sapanka ladonpitaq k'awaspa dibujasqa palmera sach'akuna kasqa. (Dios yupaychana wasiq waqtankunapi cuartokunapas llanthunallayoqtaqmi kasqa).