Read Diospa Simin Qelqa EZEQUIEL 47 Bible Online

EZEQUIEL 47 - Diospa Simin Qelqa bible

EZEQUIEL 47

¹Chaymantan runaqa Dios yupaychana wasi punkuman kutichiwarqan, hinan rikurqani punku sarunamanta unu phawamushaqta, chay unutaq phawarqan inti lloqsimuy lado cheqasman, maytachus Dios yupaychana wasi qhawashan chayman hina. Unutaq uraykurqan Dios yupaychana wasiq uranta altarpa uranta.

²Chaymantataq runaqa ukhu patiomanta lloqsichiwarqan wichay lado haykunanta, hinaspan muyuchimuwarqan hawanta inti lloqsimuy lado qhaway haykunakamaraq, unutaq phawamusharqan haykuna uray cheqasmanta.

³Runataq inti lloqsimuy lado cheqasman rirqan tupuna cordel hap'intin, haykuna punkumanta phisqa pachak metrota tupuspan unuta chimpachiwarqan, unutaq aypamuwarqan chaki moqochuyman.

⁴Wakmanta tupullarqantaq phisqa pachak metrotawan, unutaqa chimpachillawarqantaqmi, hinan unuqa moqoykamaña aypamuwarqan. Wakmanta huk phisqa pachak metrotawan tupullarqantaq, hinaspan unuta chimpachillawarqantaq, chaypin unuqa cinturaykamaña aypamuwarqan.

⁵Wakmanta huk phisqa pachak metrotawan tupullarqantaq, hinan mayuqa aswanta yapaykukurqan mana chimpay atiytaña. Mayuqa sinchi ukhullaña kapusharqan, nadaspallañan chimpaytapas atikurqan.

⁶Hinan niwarqan: — Qan, runaq churin, allinta yuyay kay rikusqaykita, nispa. Chaymantaqa wakmantan kutichiwarqan mayu patantakama,

⁷chaypitaq rikurqani mayuq chimpapuranpi askha mallkikunata.

⁸Hinan niwarqan: Kay unun phawashan inti lloqsimuy ladoman, Jordán mayu qheswa wayq'okama. Chaymantataq haykun Kachi Qochaman, chay qochaman chayaqtinmi qocha unuqa misk'iyanqa.

⁹Kay mayuq chayasqanpiqa may cheqaspipas imaymana rikch'aq qocha animalkunan kawsan. Kay mayuqa ima p'osqo unutapas misk'imanmi tukuchin, chayraykun askhallaña challwakuna kanqa, kay mayuq chayasqanpiqa may cheqaspipas lliwmi kawsanqa.

¹⁰En-gadi nisqa pukyumanta En-eglaim nisqa pukyukaman kanqa challwaqkuna, chaypin llikankuta churanqaku, ch'akichinqaku ima. Chaypin kapunqa imaymana rikch'aq challwakuna lamar-qochapi hinaraq.

¹¹Ch'urakunapin oqhokunapin ichaqa mana misk'i unu kanqachu, chaypiqa kachi unullapunin kanqa, kachita horqokunankupaq.

¹²Mayuq iskaynin patanpitaqmi wiñanqa imaymana rikch'aq mikhuna, ruruyoq mallkikuna. Raphinpas manan hayk'aqpas urmanqachu, manallataq ruruytapas tatinqachu. Sapa killan rurunqa, Dios yupaychana wasimanta lloqsimuq unuwan qarpasqa kasqanrayku. Rurunmi mikhunapaq kanqa, raphintaq hampipaq kanqa.

¹³Apu Señor Diosmi nin: Hallp'ataqa Israelpa chunka iskayniyoq ayllunpaqmi phasminkichis, Josepa mirayninmantaq iskay t'aqata qonkichis.

¹⁴Ñoqan kay hallp'ata ñawpa taytaykichisman qonaypaq cheqaqtapuni jurarqani, chay hinaqa, kuska-kuskallamanta phasmiykunakuychis, suyuntinmi herenciaykichis kanqa. Kaykunataqmi kanqa suyuq qorpankuna:

¹⁵Wichay lado qorpanmi lamar-qochamantapacha inti lloqsimuy ladoman rispa pasanqa Hetlón llaqtanta, Hamat Q'asanta, Zedad llaqtanta,

¹⁶Berota llaqtanta, Sibraim llaqtanta, Hazar-enán llaqtakama. Berota llaqta Sibraim llaqtapiwanqa Hamatwan Damascowan tupaypin kashan. Hazar-enán llaqtaqa Haurán suyu qorpapin kashan.

¹⁷Chay hinatan wichay qorpaqa lamar-qochamanta rispa Hazar-enankama chayanqa, Damasco llaqta hallp'awan Hamat llaqta hallp'awanqa Israelpa wichayninpiraqmi kashan.

¹⁸Inti lloqsimuy lado qorpantaq Damasco llaqta hallp'awan Haurán suyuwan tupaymanta qallarispa, uray ladoman rinqa. Jordán mayuq qheswa wayq'ontakama pasanqa, inti haykuy ladonpi Israel hallp'a kanqa, inti lloqsimuy ladonpitaq Galaad hallp'a kanqa. Hinan qorpaqa chayanqa Kachi Qocha patapi Tamar llaqtakama.

¹⁹Uray lado qorpantaq Tamar llaqtamanta qallarispa, Meriba-Cadespa pukyu-pukyunta rispa Egiptoq qorpantakama pasanqa lamar-qochaman aypanankama.

²⁰Inti haykuy lado qorpantaq kanqa lamar-qocha patamantakama, Egipto qorpamanta Hamat Q'asaq inti haykuy cheqasninpi lamar-qocha patakama.

²¹Kay hallp'atan sumaqta phasminakunkichis Israelpa chunka iskayniyoq ayllunman hina.

²²Chaymi qankunaman tupaq hallp'aykichis kanqa, kaqllataq qankuna ukhupi tiyaq wak llaqtayoqkunapaqpas wawankunapaqwan. Qankuna hallp'ata phasminakuqtiykichisqa paykunamanpas tupallanqataqmi kaqninku, Israelpi paqariqta hinan chaskipunkichis.

²³Wak llaqtayoqkunamanqa mayqen aylluwanchus tiyashanku chaypin qonkichis. Ñoqa Apu Señor Diosmi chayta nini, nispa.