Read Diospa Simin Qelqa EZEQUIEL 5 Bible Online

EZEQUIEL 5 - Diospa Simin Qelqa bible

EZEQUIEL 5

¹Señor Diosqa nillawarqantaqmi: Qan, runaq churin, kunan hap'iy huk espadata allin filollataña, sunkha k'isunata hina, chaywantaq rutukuy chukchaykita sunkhaykitawan. Balanzapi pesaspataq kinsaman t'aqanki, chukchaykita sunkhaykitawan.

²Llaqtaq awqankuna muyuykuyta tukuqtinkutaq, llaqtaq chawpinpi chay chukchaykiq kinsaman t'aqasqaq huk t'aqanta kanaykunki. Chaymantataq espadata hap'ispa, wakin t'aqanta ñut'urqospa llaqtaq muyuriqninman wisñimunki, puchuqnintataq wayrawan aparparichinki. Ñoqataqmi paykunaq qhepanta risaq espadantin.

³Wakin chukchakunatataq hoqarispa p'achaykiq ch'ullpanman watarqonki.

⁴Chay watasqa kaqmanta huk pisita hoqarispataq ninaman wikch'uykunki ruphananpaq. Chaymantan nina lloqsimunqa llapan Israel llaqtata ruphananpaq.

⁵Apu Señor Diosmi nin: Kayqa Jerusalenmi kashan, ñoqan kay pachaq chawpinman churarqani, chaymi llapa suyukunaq llaqtakunaqpas muyuykusqan kashan.

⁶Jerusalenmi ichaqa kamachikuyniyta unanchayniytawan manapuni munarqanchu, hinaspan payqa muyuriqninpi llaqtakunamanta suyukunamantapas aswan mana chaninraq kapun. Kamachikuyniytan manapuni munarqanchu, unanchayniytapas manan kasurqanchu.

⁷Chayraykun Apu Señor Diosqa nin: Kamachikuyniyta mana kasukuspan qankunaqa aswan millaypuni kankichis, muyuriqniykichispi llaqtakunamantapas. Manapunin kasukurqankichischu muyuriqniykichispi tiyaq llaqtakunaq kamachikuy siminkunallatapas.

⁸Chayraykun Jerusalén, Apu Señor Diosqa qan contra kashan. Hinallataq llapan suyukuna rikushaqtin pay kikin qanta muchuchisunki.

⁹Manataq hayk'aqpas chay hinataqa ruwarqanchu, manañataq ruwanqapaschu, millay mana chanin ruwasqaykirayku.

¹⁰Qankuna ukhupiqa kanqan wawan mikhuq taytakuna, taytankuta mikhuq wawakunapas. Ñoqa kikiymi muchuchisqayki, wakin kawsaqkunatataq wayrawan hina llapa ladoman ch'eqechisaq.

¹¹Ñoqa Apu Señor Diosmi cheqaqtapuni jurani, imaynan qankunapas millay mana chanin ruwayniykichiswan ch'uya wasiyta qhellicharqankichis, chay hinatan qankunatapas mana khuyapayaykuspa chhallusqaykichis, manapunin llakipayasqaykichischu.

¹²Huk kinsakaq t'aqa runakunan chawpiykipi wañunqaku onqoywan yarqaymantawan, huk kinsakaq t'aqañataq wañunqaku muyuriqninpi awqanpa wañurachisqan, wakin kinsakaq t'aqatañataq wayrawan hina hinantinman aparparichisaq, hinan qhepanta risaq espada hap'intin.

¹³Chaymantataq sonqoy tiyaykuqtin phiñakuyniy thasnukuqtin, thak kapusaq, manañataq imanasqaykichispaschu. Chaykuna qhepatan yachankichis ñoqa Señor Diosqa qankunamanta anchata sientespa phiñakusqayta.

¹⁴Jerusalén, ñoqan qanta purunyachisqayki, hinan llapan muyuriqniykipi kaq llaqtakunapas llapan qayllaykita puriqkunapas pisichasunkiku.

¹⁵Ñoqa qan contra k'araktapuni phiñakuspa pasaqta muchuchiqtiymi, muyuriqniykipi suyukuna k'amisunkiku, millayta nisunkiku, hinallataq qanta rikuspa sinchita mancharikunqaku, hinaspa wanapunqaku. Ñoqa Señor Diosmi chayta nini.

¹⁶Ñoqan kachamusqaykichis manchay yarqayta, wañuchiq wach'ita hinaraq. Aswan-aswantan yarqay q'oñirinqa, hinan mikhunaykichista qechupusqaykichis.

¹⁷Kachamullasaqtaqmi yarqayta salqa animalkunatapas wawaykichista mikhunanpaq, hinallataq kachamusaq onqoyta, maqanakuyta, wañuytawan qankunata wañurachinaypaq. Ñoqa Señor Diosmi chayta nini, nispa.