Read Diospa Simin Qelqa EZEQUIEL 7 Bible Online

EZEQUIEL 7 - Diospa Simin Qelqa bible

EZEQUIEL 7

¹Señor Diosmi niwarqan:

²Qan, runaq churin, uyariway. Ñoqa Señor Diosmi Israel suyuta nini: ¡P'uchukaymi chayamunqaña! ¡Ñan teqsimuyuntinpaq p'uchukay kanqaña!

³Israel, qanpapas p'uchukayniykiqa chayamunqañan, qan patamanmi phiñakuyniyta chayachisaq. Imaynachus kasqaykiman hinan huchachasqayki, hinaspataqmi p'enqay ruwasqaykikunamanta muchuchisqayki.

⁴Manan khuyapayasqaykichu, manan llakipayasqaykichu, imaynachus kasqaykimanta p'enqay ruwasqaykikunamantawanqa muchuchisqaykipunin. Chaypin yachankichis ñoqa Señor Diosqa kasqayta.

⁵Apu Señor Diosmi nin: ¡Ñan hatun llakikuy p'unchay chayarqamushanña!

⁶¡Hatun llakipas qati-qatiraqmi chayarqamushan! ¡Chayarqamunñan p'uchukayniyki! ¡Chayarqamunñan tukukunayki!

⁷Suyupi tiyaqkuna, chayamunñan thunikunaykichis. Kunallanmi chayarqamunqa, chayarqamushallantaqmi taripay p'unchay. Orqokunapipas manañan kusikuy kanchu, aswanpas q'aqchakuyllañan.

⁸Kunanpachan qan contra phiñakusaq amikunaykamaraq. Lliwtan watusqayki ima ruwasqaykimantapas, hinaspan muchuchisqayki p'enqay ruwasqaykikunamanta.

⁹Manapunin khuyapayasqaykichu, manapunin llakipayasqaykichu, aswanmi lliwmanta cuentata mañasqayki, millay p'enqay ruwasqaykimantataq muchuchisqayki. Hinan qankuna yachankichis ñoqa Señor Diosqa ñak'arichiq kasqayta.

¹⁰¡Kayqa chay p'unchay! ¡Chayamunpacha! ¡Hamushanñan thunikuyniyki! Millay runakunan llanllarishan, anchaykachaymi t'ikarishan.

¹¹Millay ruwaykunan wiñarispa mana chaninkunata paqarichin. Chaywanpas paykunaqqa manan imanpas qhepanqachu, qhapaq kayninkupas, imaymanayoq kayninkupas, allichachaq-kayninkupas.

¹²¡Chayamunmi kunanqa chay p'unchay! Manan qhatuqpas imamantapas llakikunan kanchu, manallataqmi rantiqpas imamantapas kusikunan kanchu, llapankumanpunin phiñakuyniytaqa chayachisaq.

¹³Qhatuqqa manapuniñan qhatusqanta wakmanta tarinmanñachu, unaytaña kawsaspapas. Millay runaqa huchan hawan kawsayninta mana waqaychayta atinmanchu.

¹⁴Awqa-tinkuy trompetan waqamun, llapataqmi wakichikunku, ichaqa manan pillapas maqanakuqqa lloqsinchu, llapanmanpunin phiñakuyniytaqa chayachisaq.

¹⁵Hawapin maqanakuy kashan, ukhupitaqmi onqoywan yarqaywan kashan. Campopi kaqkunan hatun maqanakuypi wañunqaku, llaqta ukhupi kaqkunataqmi onqoypi yarqaypiwan wañunqaku.

¹⁶Chaymanta orqokunaman llapan ayqekuqkunataq sapankanku huchankumanta waqanqaku qheswa wayq'omanta mancharichisqa urpikuna hina.

¹⁷Lliwpa makinmi sayk'upunqa, moqonkupas mancharikuymantan tiwlikinqa.

¹⁸Llakikuymantan qhasqa p'achawan churakunqaku, lliw ukhunkun chhaphchikunqa, hinallataq p'enqasqa uyantin chukchankupas ruturqosqa rinqaku.

¹⁹Qolqenkutapas qorinkutapas callekunamanmi q'opata hina wikch'upunqaku, manan qorinkupas qolqenkupas qespichinqachu Señor Diospa phiñakuyniy p'unchaypiqa. Qori-qolqeqa manapunin yarqaytapas thanichinmanchu, manallataq wiksamanpas hunt'aykunmanchu, aswanmi huchaman tanqaykurqan.

²⁰Sumaq k'anchaq alhajankuwanmi umata hoqarirqanku, chaykunawantaqmi millakuy diosninkuta ruwakurqanku. Chayraykun alhajankuta tukuchisaq paykunaq millakunanman.

²¹Wak llaqta runakunatan chayarqachimusaq suwarqonanpaq, kay pachantinpi cheqnisqa runakunan hamunqaku paykunamanta qechunanpaq, hinaspan qhapaq kayninkuta millakuyman tukuchinqa.

²²Ñoqataqmi kay llaqtamanta hataripusaq. Hamunqataqmi suwakuna, ñoqa yupaychana munasqay wasiman haykuspan millakuyman tukuchinqaku.

²³Suyuntinpin wañuchinakuy kashan, llaqtantinpitaq awqanakuy kashan, chayrayku fierro cadenata ruway.

²⁴Ñoqan pusamusaq kay pachantinpi cheqnisqa runakunata, paykunan kay llaqtaq wasinkunata hap'ikapunqa. Atiyniyoqkunaq uma hoqariynintaqa chinkachipusaqmi, wak'a diosninku yupaychana cheqaskunapas lliwmi qhellichasqa kanqa.

²⁵Manchay llakikuy p'unchay chayamuqtinmi, thak-kayta munanqaku, manataq tarinqakuchu.

²⁶Chayamunqan llakikunapas qati-qatiraq, mana allin willaykunapas yapa-yaparaq. Yanqanpaqmi huk profetata maskhanqaku paykunaman rikhuriypi rikusqanta willaykunanpaq, manan kanqachu sacerdotepas paykunaman Diospa kamachikuyninta yachachinanpaq, manallataq kurak runakunapas yuyaychaykunanpaq kanqachu.

²⁷Reymi yana p'achawan lutokunqa, kamachikuqmi khuyay llakisqa kanqa, llaqtataqmi khatatatanqa. Ruwasqankuman hinan muchuchisaq, imaynatachus hukkunata juzgarqanku chay hinatan paykunatapas juzgasaq. Ahinapin yachanqaku ñoqa Señor Diosqa kasqayta, nispa.