Read Diospa Simin Qelqa EZEQUIEL 8 Bible Online

EZEQUIEL 8 - Diospa Simin Qelqa bible

EZEQUIEL 8

¹Kamachi-kaypaq apasqa kasqaykumanta soqta wataq soqta killanpa phisqa p'unchayninpin wasiypi tiyakusharqani Judá suyu kurak runakunapiwan, hinaspan qonqaylla Apu Señor Diosqa llamiykuwarqan.

²Rikurqanitaq rawrashaq runata hina. Cinturanmanta uranmanmi rikch'akusqa nina hina, chaymanta wichayninmantaq allin llusk'achasqa bronce hina k'anchasqa.

³Chay runataq makiman rikch'akuqta haywarimuwaspa chukchaymanta hap'irqowarqan. Hinan Diospa Espiritunqa wayrapi hoqarirqowarqan, Diospa rikhuriypi rikhuriwasqanpin Jerusalenman apawarqan, hinaspan churaykuwarqan yupaychana wasiq ukhukaq pationpa wichay qhawaq punkunman, Señor Diosta phiñachiq idolonkuq kasqanman.

⁴Chaypin Israelpa Diosninpa lliphlli-kaynin kashasqa pampapi rikusqay hinallataq.

⁵Niwarqantaq: Qan, runaq churin, wichay ladota qhawariy, nispa. Ñoqataq wichay ladota qhawarirqani, hinaspan rikurqani punku haykuna altar qayllapi Señor Diosta phiñachiq idolota.

⁶Nillawarqantaqmi: Qan, runaq churin, ¿rikunkichu Israel runakunaq millay p'enqayta kaypi ruwashasqankuta? Chay ruwasqankuwanmi wasiymantapas aswan-aswanta karunchachiwanku. Kunanpas rikullankitaqmi aswan millaykunataraq, nispa.

⁷Chaymantataq apawarqan patio haykuna punkuman, perqapitaq kasqa huk t'oqo.

⁸Hinan niwarqan: Qan, runaq churin, t'oqota hatunyachiy, nispa. Ñoqataq t'oqota hatunyachispa haykunata tarirqani.

⁹Nillawarqantaq: Haykuy, hinaspan chaypi rikumunki mana chanin millay ruwasqankuta, nispa.

¹⁰Haykuspa qhawariqtiytaq, llapan perqakunapi kashasqa k'iñaspa ruwasqa imaymana rikch'aq suchuq animalkuna, wak millay qhelli animalkuna, Israel llaqtaq millay idolonkunapiwan.

¹¹Israel suyuq qanchis chunka kurak runankunan chaykunaq ñawpaqenpi sayashasqaku, paykunawanmi kashallasqataq Safanpa churin Jaazaniaspas. Sapankataq incienso q'apachina hap'intinkama, chaymantataq sankhu q'osñiraq sayarisqa.

¹²Hinan niwarqan: Qan, runaq churin, ¿rikunkichu Israel taytakunaq pakallapi idolonkuq wasichanpikama ruwashasqankuta? Paykunaqa ninkun: ¡Manan Señor Diosqa rikuwanchischu! ¡Suyunchistapas wikch'upunmi! nispanku.

¹³Chaymantapas nillawarqantaq: Aswan millay ruwashaqkunataraqmi rikunki, nispa.

¹⁴Apallawarqantaq Señor Diospa wasin wichay lado punku haykunaman. Chaypin warmikuna tiyarayashasqa Tamuz diosta waqapayaspanku.

¹⁵Nillawarqantaq: Qan, runaq churin, ¿rikushankichu kayta? Chaymantapas aswan millaytaraqmi rikullankitaq, nispa.

¹⁶Chaymantan apallawarqantaq Señor Diospa wasinpa ukhu pationman, yupaychana wasiman haykuna punkuwan altarpiwan tupaypin kashasqa iskay chunka phisqayoq Israel qharikuna, yupaychana wasita qheparparispanku. Inti haykuy ladoman qhawantinkama pampaman k'umuykukuspa intita yupaychashasqaku.

¹⁷Hinan Señor Diosqa niwarqan: Runaq churin, ¿rikunkichu kay ruwasqankuta? ¡Judá llaqta runakunaqa manan amikunkuchu kay hina p'enqay huchakunata ruwaspankupas! Chaymantapas awqanakuywanmi suyuntinta hunt'aykachishanku, kuti-kutirispan phiñachiwanku. Chaymi millay asnachisqanku senqayman chayamun.

¹⁸Chayraykun paykunata phiñakuspa muchuchisaq, manapunin khuyapayaykusaqpaschu. Qaparikuspaña waqyakamuwaqtinkupas, manapunin uyariqpas tukusaqchu, nispa.