Read Diospa Simin Qelqa EZEQUIEL 9 Bible Online

EZEQUIEL 9 - Diospa Simin Qelqa bible

EZEQUIEL 9

¹Chaymantapas uyarillarqanitaqmi kunkayoq waqyakuqta: ¡Ñan chayamunkuña llaqtata muchuchiqkuna, sapankataq makinpi thuninanpaq q'asunayoqkama! nispa.

²Hinan rikurqani hawakaq patioq wichay qhawaq punkunta soqta runa haykumushaqta, q'asuna hap'intintakama. Chawpinkupitaq hamushasqa linomanta yuraq qoysu p'achayoq runa, cinturanpitaq apamusqa qelqanakunata. Haykuspataq sayaykurqanku bronce altarpa qayllanpi.

³Hinan Israelpa Diosninqa lliphipispa hatarirqan querubinkunaq patanpi kasqanmanta, hinaspan yupaychana wasi haykunaman rirqan. Payqa cinturanpi qelqanayoq linomanta yuraq qoysu p'achayoq runata waqyarispan

⁴nirqan: Jerusalén llaqtata puriykacharqamuy, hinaspataq mat'inpi marcamunki llapan millay qhelli mana chanin ruwasqakunamanta llakikuspa khuyay kaqkunata, nispa.

⁵Chaymantapas uyarillarqanitaq wakin runakunata nisqanta: Llaqta ukhunta riychis chay runaq qhepanta, wañuchimuychis ama khuyapayaykuspa.

⁶Ñoqa yupaychana wasimanta qallarispataq wañuchimuychis llapan kurak runakunata, waynakunata, sipaskunata, wawakunata, warmikunatapas mana ch'ullapas puchunankama. Ichaqa aman llamiykunkichischu marcayoq runakunataqa, nispa. Hinan paykunaqa wañuchiyta qallarirqanku Dios yupaychana wasiq ñawpaqenpi kaq kurak runakunata.

⁷Chaymantapas nillarqantaq: ¡Riychis! Yupaychana wasita qhellichamuychis, runa wañusqa ayakunawan pationta hunt'aykachiychis, nispa. Chaymi paykunaqa lloqsispa llaqtantinpi runa wañurachiyta qallarirqanku.

⁸Chayta paykuna ruwashaqtintaq, ñoqaqa sapallay kasharqani. Hinaspan pampakama k'umuykukuspa llakisqa waqyakurqani: ¡Ay, Apu Señor Diosníy! ¿Phiñakuyniykita Jerusalenman kachaykamuspachu Israelpi puchuq pisi runakunatapas tukupunki? nispa.

⁹Señor Diostaq kutichimuwarqan: Israel suyu runakunan Judá suyu runakunapiwan sinchitapuni huchallikunku, suyunkun wañuchinakuywan hunt'a kashan, llaqtataqmi mana chanin ruwaywan hunt'a kashan. Paykunataqmi ninku: Señor Diosqa wikch'upunmi suyunchista. ¡Payqa manan rikuwanchischu! nispa.

¹⁰Chayraykun manapuni khuyapayasaqchu, manapuni llakipayasaqchu, aswanmi tukuy imaymana ruwasqankumanta cuentata mañaspa muchuchisaq, nispa.

¹¹Chaymantataq linomanta yuraq qoysu p'achayoq runaqa cinturanpi qelqanayoq kutirimuspa nirqan: Kamachiwasqayki ruwaytaqa tukuniñan, nispa.