Read Diospa Simin Qelqa DANIEL 1 Bible Online

DANIEL 1 - Diospa Simin Qelqa bible

DANIEL 1

¹Kinsa kaq watapi Judá suyu rey Joacim kamachikushaqtinmi, Babilonia suyu rey Nabucodonosorqa Jerusalenman hamurqan, hinaspan llaqtata soldadonkunantin muyuykurqan.

²Señor Diosmi Nabucodonosorwan Judá rey Joacimta hap'ichirqan, hinallataq Diospa wasinpi serviciokunatapas wakinta apachirqan. Hinan chaykunata Babilonia suyuman apaspa diosninpa imaymanankunata waqaychana wasiman churarqan.

³Reymi oficialkunaq umallin Aspenazta kamachirqan Israel rey ayllumanta allichachaq runakunamanta wakin waynakunata akllamunanpaq.

⁴Chaykunan kanan qhali waynakuna, sumaq rikch'ayniyoqkuna, imaymana yachaqkuna, usqhaylla yachaqaqkuna, allin yuyayniyoqkuna, reypa wasinpi tukuy imapipas allin ruwaqkuna ima. Paykunamanmi umalli Aspenazqa Caldea runakunaq qelqaynintapas rimaynintapas yachachinan karqan.

⁵Reytaq chay waynakunaman sapa p'unchay mikhunan mikhuyta ukyanan vinota haywachirqan. Kamachillarqantaq kinsa watantin paykunata yachachinanpaq, hinamantataq reypa kamachin kapunankupaq.

⁶Chaykuna ukhupin kasharqan Judá ayllumanta waynakuna Daniel, Ananías, Misael, Azariaspiwan.

⁷Oficialkunaq umallinmi suticharqan Danielta Beltsasarta,[1] Ananiasta Sadracta, Misaelta Mesacta,[2] Azariastataq Abed-negota.[3]

⁸Danielmi ichaqa yuyaykukurqan reypa mikhunanwanpas vinonwanpas mana qhellichakunanpaq. Chaymi Danielqa valekurqan oficialkunaq umallinta, ama chay mikhunakunata qonanpaq

⁹Diostaq umalli Aspenazwan Danielta khuyapayachispa sumaqta qhawarichirqan,

¹⁰Hinan payqa Danielta nirqan: — Wiraqochay reytan manchakuni, paymi mikhunaykichistapas ukyanaykichistapas t'aqapurqasunkichis. Wayna-masiykichiskunaq uyanmanta aswan q'elluta uyaykichista rikuspa hinan, reyqa qankuna hawa umayta qhoruchiwanqa, nispa.

¹¹Aspenazmi Danielpaq, Ananiaspaq, Misaelpaq, Azariaspaqwan mayordomota churasqa. Paytan Danielqa nirqan:

¹²— Valekuykin kamachiykikunata probaykuwanaykikupaq. Chunka p'unchaynintin yuyukunata chaqallullatawan mikhuchiwayku, unullatataq ukyachiwaykupas.

¹³Hinaspayki uyaykuta tupachinki reypa mikhunan mikhuq waynakunaq uyantawan, hinaspa imaynatachá rikuwankiku chayman hina ruwawankiku, nispa.

¹⁴Hinan mayordomoqa uyakurqan, hinaspan paykunata chunka p'unchayta probaykurqan.

¹⁵Chunka p'unchaymantataq uyankuqa aswan allin, cuerponkupas aswan kallpachasqa rikhurirqan, reypa t'aqapusqan mikhunata mikhuq waynakunaq rikch'ayninmantaqa.

¹⁶Chaymi mayordomoqa paykunapaq t'aqasqa mikhunatapas ukyananku vinotapas mana qopuqñachu, aswanmi yuyukunatawan chaqallutawan paykunaman mikhuchiq.

¹⁷Chay tawa waynakunamanmi Diosqa qorqan yachayta, imaymana qelqakuna reqsiyta, imaymana entiendeytawan. Danieltaq imaymana rikhuriypa, mosqoypa imachus kasqanta sut'inchayta yachaq.

¹⁸Waynakunata pusananpaq reypa nisqan p'unchaykuna hunt'akuqtintaq, Aspenazqa paykunata Nabucodonosorman pusarqan.

¹⁹Reytaq paykunawan rimarqan, hinan llapanku ukhupi mana hukllapas karqanchu Daniel hina, Ananías hina, Misael hina, Azarías hina, chaymi paykunaqa reypa kamachin kapurqanku.

²⁰Reyqa imatapas yachayta entiendeyta munaspa tapuykuspanmi, chunka kuti aswan allintaraq paykunata tarirqan suyuntinpi llapan layqakunamantapas watuqkunamantapas.

²¹Danieltaq reypa kamachin kapurqan rey Ciroq kamachikuyta qallarisqan watakama.