Read Diospa Simin Qelqa OSEAS 1 Bible Online

OSEAS 1 - Diospa Simin Qelqa bible

OSEAS 1

¹Judá suyupi rey Uzías, rey Jotam, rey Ahaz, rey Ezequías kamachikushaqtinkun, Israel suyupitaq Joaspa churin rey Jeroboam kamachikushaqtin, Señor Diosqa Beeriq churin Oseasta rimaykurqan.

²Señor Diosmi Oseaswan llaqtaman rimaykuyta qallarishaspa Oseasta nirqan: Llaqtayqa wasanchawaspanmi t'aqakapuwan, chayrayku rispa rabona warmiwan casarakamuy. Hinaspa chay rabonapi wawakunata churiyamuy, hinan “wasanchaq warmiq wawankuna” nisqa kanqaku, nispa.

³Chaymi Oseasqa Diblaimpa ususin Gomerwan casarakurqan. Paymi wiksallikuspa qhari wawata Oseaspaq wachakurqan.

⁴Hinan Señor Diosqa Oseasta nirqan: — Chay wawata Jezreel[1] sutiwan sutichay. Kay pisi p'unchaykunallamantan rey Jehupa ayllunta muchuchisaq Jezreelpi runakunata wañurqarichisqanmanta, hinaspaymi wichay lado Israel suyuta chinkachipusaq.

⁵Chay p'unchaypin Jezreel wayq'opi Israel soldadokunaq atiyninta p'uchukachipusaq, nispa.

⁶Huktawanmi Gomerqa wiksallikuspa warmi wawata wachakurqan. Hinan Señor Diosqa Oseasta nirqan: — Chay wawata “Lo-ruhama”[2] sutiwan sutichay, manañan Israel runakunata astawanpas khuyapayasaqñachu huchankuta pampachashanaypaq.

⁷Aswanpas Judá suyu runakunata khuyapayasaq, hinaspan ñoqa kikiy Diosninku Señor Dios paykunata qespichisaq, ichaqa manan wach'ina p'eqtawanchu, espadawanchu, awqa-tinkuywanchu, caballokunawanchu, caballopi sillakuq soldadokunawanpaschu, nispa.

⁸Lo-ruhama sutiyoq wawata hanuk'asqan[3] qhepatataq Gomerqa wakmanta wiksallikurqan, hinaspan huk qhari wawata wachakurqan.

⁹Hinan Señor Diosqa Oseasta nirqan: — Chay wawata “Lo-ammi” sutiwan sutichay, manan qankunaqa llaqtayñachu kapunkichis, ñoqapas manan Diosniykichisñachu kapuni, nispa.

¹⁰Chaypas Israel runakunaqa lamar-qocha patapi aqo t'iyu hinan kanqaku, “Manan llaqtayñachu” nisqa cheqaspin “Kawsaq Diospa Wawankuna” nisqa kanqaku.

¹¹Chaypachan Judá suyu runakunapas Israel suyu runakunapas hukllaman huñuykukunqaku, ch'ulla kamachiqllata churakunqaku, suyunkupipas t'ikarinqaku. ¡Jezreelpa t'ikarisqanqa ancha hatun p'unchaymi kanqa!