Read Diospa Simin Qelqa OSEAS 11 Bible Online

OSEAS 11 - Diospa Simin Qelqa bible

OSEAS 11

¹Señor Diosmi nin: Wawallaraq Israel llaqta kashaqtinmi, ñoqaqa payta munakurqani, chay churiytan Egipto suyumanta waqyamurqani.

²Ichaqa sapa kuti waqyaqtiymi, astawan ñoqamanta t'aqakuwarqan. Yanqa dioskunamanmi sacrificiokunata haywaqku, idolokunamanmi inciensota q'apachiqku.

³Ñoqan Efraín llaqtata puriyta yachachirqani, makinmanta hap'ikuspan purichirqani, chaywanpas paykunaqa manan repararqankuchu cuidasqayta.

⁴Sumaq sonqoywanmi, munakuyniywanmi, paykunaq sonqonta suwarqani, ñuñuq wawakunata hinan uyayman asuykachikurqani, paykunaman mikhuchinaypaqmi k'iraykurqani.

⁵Paykunan ichaqa mana kutirimuwayta munarqankuchu, chaymi Egipto suyuman mana kutinqakuchu, aswanpas Asiria suyu reymi paykunata kamachinqa.

⁶Llaqtankunapin awqankunaqa espada hap'intin phawaykachanqaku, allin perqasqa llaqtankupas thunisqan kanqa, yuyaykusqallankutaqmi paykunataqa chinkachinqa.

⁷Llaqtaymi ñoqamanta karunchakushallanpuni, Baal diosmanmi waqyakunku, chayraykun waqyakamuwaqtinkupas, mana uyarimusaqchu.

⁸Efrainlláy, ¿imaynan saqerparisqayki? Israel-lláy, ¿ñoqari wikch'urpariykimanchu? ¿Imaynan ñoqaqa Adma llaqta thunisqayta hina thuniykiman? ¿Imaynan ñoqaqa Zeboim llaqta ruwasqayta hina ruwaykiman? ¡Sonqoymi: Ch'allaq, niwan, anchatapunin llakipayashayki!

⁹Manan k'arakta phiñakusqayman hinapunichu ruwasaq, manan Efraín suyutaqa wakmanta thunisaqchu, Diosmi kani, manan runachu. Qanwan kaq Ch'uya Diosmi kani, manan phiñasqachu qankunaman hamusaq.

¹⁰Paykunaqa ñoqa Señor Diospa qhepaytan purinqaku, ñoqaqa león hinan qaparisaq. Qapariqtiymi wawaykunaqa chukchuspa inti haykuymanta hamunqaku.

¹¹Phalaq animal hinan Egipto suyumanta khatatataspa phawamunqaku, Asiria suyumantan urpi hina phalamunqaku, hinan paykunata wakmanta wasinkupi tiyachisaq. Ñoqa Señor Diosmi chayta nini.

¹²Efraín runakunan sapa kutilla llullakuwarqan, Israel llaqtan pasaq kutilla q'otuwarqan. Judá runakunaqa ñoqamantan t'aqarikuwanku, idolokunapaqtaq hunt'aq kanku.