Read Diospa Simin Qelqa OSEAS 4 Bible Online

OSEAS 4 - Diospa Simin Qelqa bible

OSEAS 4

¹Israel runakuna, Señor Diospa siminta uyariychis. Paymi kay suyupi tiyaqkunapaq phiñakun: Kay suyupiqa manan cheqaq-kaypas munakuypas kanchu, manan Diosmanta yachayta munaqpas kanchu.

²Aswanmi ñakaylla kashan, llullakuylla, runata wañuchiylla kashan, suwakuylla, wasanchaylla kashan, runaq yawarninta yapa-yapa hich'ayllan kashan

³Chaymi kay hallp'aqa ch'akipushan, kaypi llapa tiyaqkunapas pisipapushan, salqa animalkunapas, phalaq animalkunapas, lamar-qocha challwakunapas, wañupushan.

⁴Señor Diosmi nin: Yaw, sacerdotekuna, ama mayqenniykichispas quejakuychischu, amallataq mayqenniykichispas pitapas huchachaychischu, qankunallatapunin ñoqaqa huchachaykichis.

⁵P'unchaypachan laq'akunkichis, profetapas qankunawanmi tuta laq'akullanqataq. Mamayki Israeltapas chinkachisaqmi,

⁶llaqtayqa mana yachayniyoqmi, chaymi muchuchisqa kashan. Qankunaqa manan yachayniyoq kayta munarqankichischu, chaymi sacerdote-kayniykichismanta wikch'upusqaykichis. Ñoqa Diosniykichispa yachachikuy simiykunatan qonqapurqankichis, chaymi ñoqapas wawaykichiskunata qonqapusaq.

⁷Askhayasqaykichisman hinan astawan ñoqa contra huchallikurqankichis, qankunaqa allinpaq qhawasqan kashankichis, ñoqataqmi p'enqayman churasqaykichis.

⁸Llaqtaypa huchallikusqanwanmi qhapaqyashankichis, chaymi llaqtaypa huchallikunanta munaykushankichis.

⁹Llaqtawan sacerdotewanqa kaqkaman kanku, iskayniykichistan imaynatachus kawsasqaykichismanta muchuchisqaykichis, ruwasqaykichisman hinan kutichipusqaykichis.

¹⁰Mikhunkichismi, manataq saksankichischu, qhelli huchapin purinkichis, manataq mirankichischu, saqepuwaspaykichis wasanchay huchaman k'askakusqaykichisrayku, nispa.

¹¹Señor Diosmi nin: Qhelli huchapi puriywan, upi vinowan poqosqa vinopiwanmi llaqtaypa yuyayninta waqllichin.

¹²Paykunaqa k'ullu idolotan tapunku, k'ullutaq paykunaman kutichin. Qhelli huchapi puriyman k'askakuspan llaqtayqa pantay ñankunapi purin, wasanchaspan ñoqa Diosninmanta t'aqakun.

¹³Orqo patakunapin sacrificiota haywanku, moqo patakunapin inciensowan q'apachinku, allin llanthuykuq encina sach'a k'uchukunapi, kiswar sach'a k'uchukunapi, terebinto sach'a k'uchukunapipas haywanku. Chaymi ususiykichiskunaqa qhelli huchapi purinku, qhachuniykichiskunapas wasanchanku.

¹⁴Manan ususiykichiskunataqa qhelli huchapi puriqtin muchuchisaqchu, manan qhachuniykichiskunatapas wasanchaqtin muchuchisaqchu, qankuna kikiykichispunin rabonakunawan qhellichakunkichis, sacrificiota haywaspan ídolo yupaychaq rabona warmikunawan t'inkikunkichis. ¡Chhaynatan mana yuyayniyoq llaqtaqa waqllipun! nispa.

¹⁵Israel runakuna, qankunachus qhelli huchapi purinkichis chayqa, Judá runakunallapas amayá huchallikuchunchu. Ama Gilgalta riychischu, ama Bet-aventapas wichaychischu, amallataq niychispaschu: Señor Diospa sutinpin jurani, nispaqa.

¹⁶T'illa malta waka hinan Israel runakunaqa mana kasukuq kanku, ¿chaychu Señor Diosqa borregochakunata hina sumaq q'achu-q'achupi paykunata michinman?

¹⁷Efraín runakunan idolokunaman k'askakapushanku, ¡hinata saqerpariy!

¹⁸Ukyayta tukuspankun qhelli huchata ruwanku, kamachiqninkupas p'enqaykaqtan allinkaqmantaqa munanku.

¹⁹Wayran paykunata phukurparinqa, idolokunaman sacrificiota haywasqankumantan p'enqakunqaku.