Read Diospa Simin Qelqa OSEAS 7 Bible Online

OSEAS 7 - Diospa Simin Qelqa bible

OSEAS 7

¹Llaqtayta wakmanta t'ikarichiqtiymi, Israel llaqtayta hampiqtiymi, Efrainpa huchallikusqan rikhurin, Samaria llaqtaq mana chanin ruwasqan rikhurin. Paykunaqa q'otushallankupunin, wasikunamanmi suwakuq haykunku, callekunapitaq runakunata ch'utinku.

²Ichaqa manan sonqonkupi reparankuchu tukuy mana chanin ruwasqankuta yuyayniypi hap'ishasqayta. Kunanqa ruwasqankun paykunata mat'iykushan, chaykunataqa qhawashallanipunin.

³Millay ruwasqankuwanmi reyta kusichinku, llullakusqankuwantaqmi umalli runakunatapas kusichinku.

⁴Llapallankun wasanchaqkuna hina wasanchanku. Hornopi pisillata rawraq nina hinan kanku, masa chapusqaq poqonankama t'anta masaqqa mana allintachu rawrachin, chay nina hinan lep'eqenku.

⁵Reyninkuq hatun p'unchayninpin umalli runankunaqa vinowan loqheyanku, reytaq asipayaqkunaman k'askakun.

⁶Contranpi yuyaykuspankuñan payman qayllaykunku, sonqonkun horno hina, tutantin pisillata rawran, tutamantataq qallusparaq rawraykushan.

⁷Llapallankun horno hinaraq rawrarinku, kamachiqninkutapas oqoykunkun. Sapanka reyninkun urmaytakama urmanku, manataqmi mayqenninkupas waqyakamuwanchu.

⁸Efraín runakunan wak llaqtakunawan chhaqrukapunku, Efraín runakunan huk lado uyan chayasqa t'anta hina kapunku.

⁹Wak llaqtayoqkunan kallpanta tukurqan, paytaq mana chayta reparakunchu. Soqo umallañan kapurqan, paytaq mana chayta reparakunchu.

¹⁰Israel runakunaq anchaykachayninkun paykuna contra rimarin, chaypas manan ñoqa Diosninku Señor Diosman kutirikamuwankuchu, manan maskhallawankupaschu.

¹¹Efraín llaqtaqa mana yuyayniyoq urpi hinan, Egipto suyutan waqyakurqan, Asiria suyumanmi asuykurqan.

¹²Chayman rishaqtinkun, llikayta paykunaman wikch'uykusaq, phalaq animalkunata hinan paykunata urmachisaq, huñunakusqankuta uyarispan paykunata hap'isaq.

¹³Paykunaqa ñoqamantan t'aqakurqanku, ¡imaynaraqmi kanqaku! Paykunaqa awqaymi sayarirqanku, chaymi wañuchisqa kanqaku. Ñoqaqa paykunata kacharichiytan munarqani, paykunataq ichaqa ñoqa contra llullakuspa rimanku.

¹⁴Manan tukuy sonqochu waqyakamuwarqanku, aswanpas puñunankupin yanqalla llakipakushanku, trigota vinota mañakunankupaqmi mana iñiyniyoqkuna hina cuerponkuta kuchukunku. ¡Awqaymi sayaripushanku!

¹⁵Ñoqaña paykunata yachachirqani kallpacharqani chaypas, paykunaqa ñoqa contran mana allinkunata yuyaykunku.

¹⁶Mana valeq dioskunamanmi rinku, mana allin wach'i t'iwkachiq q'ewisqa p'eqta hinan kanku. Hatunchakuspa rimasqanku hawan umalli runankutaqa espada wañuchinqa, chaymi Egipto suyupi paykunataqa asipayanqaku, nispa.