Read Diospa Simin Qelqa OSEAS 8 Bible Online

OSEAS 8 - Diospa Simin Qelqa bible

OSEAS 8

¹Señor Diosmi nin: ¡Maqanakuypaq trompetata tocay! Ankan llaqtay contra hamun, rimanakusqayta p'akisqankurayku, yachachikuy simiytapas wikch'usqankurayku.

²Ñoqatan Israel runakunaqa waqyakamuwanku: Diosnillayku, reqsikuykikun, nispa.

³Paykunan ichaqa allinkaqta wikch'urqankuña, chaymi awqaqa paykunata qatiykachanqa.

⁴Mana simiymantan reykunata churakurqanku, mana yachasqaymi kamachikuqkunata churakurqanku. Qolqenkumantan qorinkumantan idolokunata ruwakurqanku, paykuna kikinkuta wañuchikunankupaq.

⁵Yaw, Samaria, qori torilloykitan millakuni. Qankuna contran k'arakta phiñakuni. ¿Hayk'aqkaman qhellillapuni kankichis?

⁶¡Yaw, Israel runakuna! ¡Manan chay idoloqa Dioschu! Artesanon chay torillotaqa ruwarqan. Chaymi Samaria torilloqa ñut'urqarisqa kanqa.

⁷Paykunaqa wayratan t'akarqanku, muyuq wayratataqmi ichhunqaku. Trigo tullupas mana ruruyoqmi, chaymi hak'uqa mana kanchu. Hak'uña kanman chaypas, wak llaqtayoqkunan mikhurqapunman.

⁸Israel suyuqa millp'uykusqan kashan, kunantaq wak suyukuna ukhupi kashan, mana munana t'uru manka hinan.

⁹Mana piniyoq salqa asno hinan Asiria suyuman rirqanku. Efrainmi munaqninkunata mink'akurqan.

¹⁰Suyukuna ukhupi munaqninkunata mink'akuqtinpas usqhayllan paykunata huñuykusaq, hinan huk pisi tiempollamanta umallikunaq reyninpa ñit'isqan muchunqaku.

¹¹Efraín runakunaña hucha pampachaypaq askha altarkunata perqarqan chaypas, chaykunaqa huchallikunallapaqmi kapun.

¹²Ancha askha yachachikuy simiytaña paypaq qelqapurqani chaypas, manapas paypaqchu kanman hinatan qhawarqan.

¹³Sacrificiokunata munaspankun sacrificanku, sacrificasqa aychatan mikhunku, ñoqa Señor Diosqa manan chaykunata munanichu. Mana chanin ruwasqankutan yuyarisaq, chaymi huchankumanta muchuchisaq, Egipto suyumanmi paykunaqa kutinqaku.

¹⁴Israel runakunan ñoqa Ruwaqninta qonqapuwarqanku, qhapaq wasikunatan perqarqanku. Judá runakunan allin perqasqa askha llaqtakunata sayarichirqanku. Ñoqan ichaqa chaykunata ninawan kanaykusaq, chay ninan pukarakunata ruphaykapunqa, nispa.