Read Diospa Simin Qelqa OSEAS 9 Bible Online

OSEAS 9 - Diospa Simin Qelqa bible

OSEAS 9

¹Israel runakuna, ama kusikuychischu, Diospi mana iñiyniyoqkuna hinaqa ama q'ochukuychischu. Diosniykichismanta t'aqakuspaykichismi qhelli huchapi purirqankichis, trigo saruchinakunapi qhelli huchata ruwasqaykichismantan pago chaskiykuyta munankichis.

²Trigoykichispas vinoykichispas manan kawsanaykichispaq kapunqachu, upi vinoykichispas manan ukyanaykichispaq kapunqachu.

³Manan Señor Diospa suyunpi tiyankichisñachu, aswanmi Efraín runakunaqa Egipto suyuman kutinkichis, Asiria suyupitaq mana mikhuna qhelli mikhunata mikhunkichis.

⁴Manan vino ofrendakunata Señor Diosman hich'ankichischu, manan sacrificiokunatapas payman haywankichischu. Chay sacrificiokunapas ayaq kasqanpi mikhuna hinan kanqa, pipas chayta mikhuqqa qhellichakunqan. Mikhunaykichisqa yarqaynillaykichispaqmi kanqa, chay mikhuytaqa manan Señor Diospa wasinman apaykunkichischu.

⁵¿Imanankichistaq hatun fiesta p'unchaypi? ¿Imanankichistaq Señor Diosman qayllaykuna hatun p'unchaypi?

⁶¡Uyariychis! Muchunamanta ayqeshaqtiykichispas Egipto runakunan hap'isunkichis, Menfis llaqtapin p'ampasqa kankichis. Qolqe illaykichistan kisa p'ampaykapunqa, tiyanaykichispin khiska wiñaykapunqa.

⁷Muchuna p'unchaykunañan chayamun, ayni-kutichina p'unchaykunañan chayamun. ¡Israel suyu, chayamusqanta yachachun! Qankunan ninkichis: Profetaqa mana yuyayniyoqmi, Diospa yuyaychasqan runaqa waq'an, nispa. Hucha q'epi kaspan chaytaqa ninkichis, chaymi sinchita cheqnikuwankichis.

⁸Efraín runakunata qhawanaypaqmi Diosqa profetanta churawan, qankunan ichaqa tukuy ñanniykunapi urmachiyta munawankichis, Diospa wasinpipas ñoqataqa cheqnikuwankichismi.

⁹Gabaa llaqtapi sucedesqanta hinan sinchitapuni waqllipurqankichis. Señor Diostaqmi mana chanin ruwasqaykichista yuyarinqa, hinaspan huchallikusqaykichismanta muchuchisunkichis, nispa.

¹⁰Señor Diosmi nin: Israelta chayllaraq tarishaspayqa ch'inneqpi uvastapas tarishayman hinan karqan, ñawpaq rikhuriq higosta hinan, ñawpa taytaykichiskunataqa rikurqani. Ichaqa Baal-peorman chayaspankun Baal diosman sonqollikurqanku, chay munakusqanku ídolo hinan ancha millakuyman tukupurqanku.

¹¹Efrainpa hatun-kayninqa urpi hinan phalaripunqa, manañan kanqachu naceqkunapas, wiksallisqakunapas, wiksapi kamakuqkunapas.

¹²Wawankutaña uywanqaku chaypas, ñoqan llapallanta wañuchisaq. ¡Imaynaraqmi paykunaqa kanqaku paykunamanta t'aqakapuqtiy!

¹³Ñoqan Efrainta rikurqani Tiro llaqta hina munay cheqaspi sayarichisqata, chaywanpas wawankunataqa wañuchinapaqmi horqomunqa, nispa.

¹⁴Señor Diosníy, paykunaman qoy… ichaqa, ¿imatan qowaq? Wiksankuta sulluqman tukuchiy, ñuñunkutapas ch'alqe ñuñuman tukuchiy.

¹⁵Señor Diosmi nin: Gilgalpin mana chanillantapuni ruwashanku, chaypin paykunata cheqnikuni. Millaykunata ruwasqankumantan wasiymanta paykunata qarqosaq, manañan paykunataqa munakusaqchu. Llapa umallinkunaqa ñoqa contran sayaripunku.

¹⁶Efraín runakunaqa polvillo onqoyniyoq mallki hinan, ch'akisqa saphiyoqkunan, manañan rurupunkuchu. Wawayoqña kankuman chaypas, ñoqan luylusqa wawankuta wañuchisaq, nispa.

¹⁷Diosniymi paykunata wikch'unqa, manan Dios kasukuyta munarqankuchu. Suyukuna ukhupitaqmi tumaqaya purinqaku.