Read Diospa Simin Qelqa JOEL 1 Bible Online

JOEL 1 - Diospa Simin Qelqa bible

JOEL 1

¹Kaytan Señor Diosqa Petuelpa churin Joelman rimaykurqan.

²Kurak runakuna, kayta uyariychis, suyuntinpi llapa tiyaqkunapas, maki uyariychis. ¿Hayk'aqllapas kay hinataqa rikurqankichischu? ¿Hayk'aqllapas kay hinataqa taytaykichiskuna rikurqankuchu?

³Kayta wawaykichisman willaychis, wawaykichispas wawankuman willachunku, wawankupas qhepa mirayman willachunku.

⁴Langosta kurun wakwamuspa q'omerkunata mikhurqan, chaykunaq puchuntataq uña langostakuna mikhurqan, chaykunaq puchuntataq hatun langostakuna mikhurqan, chaykunaq puchuntataq wak langostakuna tukuparqan.

⁵¡Yaw, machaqkuna, rikch'ariychis, waqaychis! ¡Yaw, vino ukyaqkuna, anchiychis! ¡Manañan upi vinoykichis kanqañachu!

⁶Kallpasapa askhallaña soldadokuna hinan suyuyman langostakuna hunt'aykamurqan, kirunkuqa orqo leonpa kirunkuna hinaraqmi, waqsankupas china leonpa waqsankuna hinaraqmi.

⁷Uvas chakraytan purunyachirqan, higos sach'aykunatan khaskarqan, llapallantan qaranta k'utuspa kumparqan, k'allmankunapas yuraq k'aspin kapushan.

⁸Llaqtay runakuna, waqaykuychis, imaynan sipasqa novion wañuqtin qhasqa p'achawan churakuspa waqan hinata.

⁹Manañan rurupas vinopas kapunchu Señor Diosman wasinpi haywanapaq, Señor Diospa kamachin sacerdotekunan khuyayta waqaykushanku.

¹⁰Campon purunyachisqa kashan, chakrakunan sonqo nanay kashan, manañan trigo cosecha kapunchu, uvas yurakunan ch'akipun, olivo sach'akunan naq'epun.

¹¹Manañan cosechanapaq kapunchu, trigopas cebadapas chinkapunmi, chayrayku, chakrayoqkuna, llakikuychis, uvas chakrayoqkuna, waqaykuychis.

¹²Uvas yurakunan ch'akipun, higos sach'akunan naq'epun, granada mallkipas, palmera sach'apas, manzana sach'apas, campopi llapa sach'apas ch'akipunmi. Runakunapas manañan kusikapunkuñachu.

¹³Yaw, sacerdotekuna, yana p'achawan lutokuychis, yupaychana wasi altarpi serviqkuna, anchiychis. Diosniypa kamachinkuna, yupaychana wasiman haykuychis, qhasqa p'achantin waqaspa chaypi illariychis. Manañan rurupas vinopas kapunchu Diosniykichispa wasinpi haywanaykichispaq.

¹⁴Diospa qayllanpi ayunanapaq llaqta runakunata kamachiychis, Diosmanta mañakunapaq runakunata huñuykuychis Diosniykchis Señor Diospa wasinman hamunankupaq, kurak runakunatapas suyuntinpi llapa tiyaqkunatapas waqyaychis, hinaspa Señor Diosmanta mañakuychis.

¹⁵¡Imayna manchakuyraqmi! ¡Señor Diospa muchuchinan p'unchaymi sispaykamushan! ¡Tukuy-atiyniyoqpa thuninan manchay p'unchaymi chayamushan!

¹⁶Qhawashaqtinchismi mikhunata qechupuwarqanchis, Diosninchispa wasinpiqa manañan kusikuypas, q'ochukuypas kanñachu.

¹⁷Tarpusqa muhupas k'urpa ukhupin ismupun, manañan cosechanapaq trigo kapunchu, chaymi mikhuy waqaychanakuna kumpasqa kapushan, taqekunan thunisqa kapushan.

¹⁸Khuyaytan uywakuna waqanku, khuyaytan waka t'aqakuna purinku manaña q'achu kapusqanrayku, ovejakunapas tulluyapushanmi.

¹⁹Señor Diosnilláy, qanmanmi waqyakamuyki, ninan q'achu pampata ruphaykapun, ninan campopi llapa sach'ata q'olaykapun.

²⁰Salqa animalkunapas qanmanmi qaparimusunkiku huch'uy mayukuna ch'akipusqanrayku, q'achu pampakunata nina ruphaykapusqanrayku.